السلام عليكم و رحمة الله
عواشركم مبروكة اخوتي و نتوما باش كتمنااو يا ربي
اليوم جاتني القنطة ههههه قولت نجي نشارك مع خواتاتي منتجاتي و اللي والماتني واللي ما والماتنيش و اللي مازالة قيد التجريب و نعطي تقييم حسب تجربتي الشخصية لكل واحد لكل منتج
نبدا على بركة الله و استسمح على الصور يمكن ما باينينش بزاف ايوا العتب على الكاميرا ديالي ههه
اولا
بوماد سيكاطريس كنت خديتها للسيكاطريس اللي في ذقني حيت كتجيني حبوب ذهنية و كتمشي هي ماشي كتزول بزاف ليطراس لكن كتخفف ما بيهاش ثمنها 149
ما نوليش نشريه حيت ماشي شي حاجة واو عادي و صافي و تمنوو اغلى من مفعولو
__________________________________________________ _____
فوندوتان دريم فلويد و بودر ديالو غزاااال داك الفوندوتان و عاد اول مرة نشريه انا مولفا بالثاني اللي مات لكن حتا هذا والمني حيت في الصيف بشرتي كتنشششف بزاااااف و تمنو 100 د اما البودر قليل جداااااا فاش كنديرها
اكيد نولي نشريه مي يسالي حيت زوين و كيعطي منظر طبيعي للبشرة و كيغطي العيوب
__________________________________________________ _____
غاسول سيتافيل انا اولا كنموت على منتجات هاد الشركة لانها اولا طبية و موالماني بزااف و ماتخافش منها غا خاص تاخدي نوع المناسب لبشرتك و تمنو 119 د
اكيد نولي نشريه حيت هادي تاني مرة ناخدو و غادي ناخدو مرة و زوج و تلاتة
__________________________________________________ _
هههههه الكريمات اللي كنظن موجودين عند جميع المغربيات كينطا و او بلاستين انا كنت خديتهم لغرض تبييض المنطقة الحساسة لكن لا حياة لمن تنادي ولا اي تغيير مازالة كيف هي تمنهم معروف كينطا نسيت لاني خديت الكبيرة و جابها لي غا الواليد الله يخليه ليا اما اوبلاستين تمنها 25 د
____________________________________________
الكريم الاول د سيتافيل المرطب زوين بزااااااااف و هادي 4 مرة كنشريه و موالمني لان بشرتي مختلطة يعني حنيكاتي جافين و نيفي و جبهتي و دقني دهنيين و واقي شمسي من افين زوين واخا انا قليل جدااااا فاش كندير واقي شمسي يعني ماشي من الناس اللي ضروري من الواقي الشمسي اني نديرو ممكن نخرج في الشمش و مادايراهش هههه تمنهم كريم مرطب بي 119 د و افين واقي شمسي يمكن ب شي 180 درهم او اكتر شوية نسيت والله .
مرطب سيتافيل اكيد غا نشريه لانه زوين و والمني بزاااااف و الاهم انه بلا رائحة يعني يفيد اللي بشرتها حساسة
اما افين لا ماعجبنيش بزاف و تانيا انا مكنحملش ندير واقي شمسي يعني ما نشريه لا هو لا غيرو
___________________________________________
افشل تجربة ليا هي مع هاد الكريم ديال ديبي وايت اللي نويت اني غادي نتهنا من اسمرار اللي عندي بين فخادي و والووو غا ضيعت فلوسي تقريبا شي 337 درهم و والوووووو لا ريحة لا مفعول يعني لا زين لا مجي بكري
اكيد ماغاديش نشريه لانه غا تضييع فلوووس و وقت بلا فائدة
_____________________________________
كريم جليسوليد مرطب زوين خصوصا ليدين مي كنغسل الميعنات خيتكم ما عندهاش مع الليكات كيعجبني نفزك يديداتي بالما و الصابون هههههه لكن نافعني الحمدلله اللي يشوف يديداتي تبارك الله ما يقولش راني كنشقا و فازلين الليمون كنديرو لرجيلاتي لكن مرة مرة
هههه اكيد ناخدهم حيت زوينين واخا رخااص
__________________________________________________
اكتيان مرطب للبشرة الجافة هو زوين لكن منصحش بيه لي بشرتو حساسة حيت فيه الريحة تمنو تقريبا شي 90 درهم او 100
ما نوليش نشريه حيت سيتافيل والمني اكثر
____________________________
مرطب للوجه ديرماجور هو بيني و بينكم ماااا والمنيش ابدااااااااااااااااااااااااااااااااااااا لكن لقيت فيه ميزة مي كنت نديرو كيقلل من ليطراس د الحبيبات اللي كانو فيا و ها هو مازالا كنستعملو ليدي هههههه تمنو بي 80 درهم من
حتا يتسالا بعدا هذاا هههههههه اصلا ماغاديش نشريه حيت خايب اللي باغا ترطب بيه حيت كيجيني بحالا كيجير الوجه و خلاص و يمكن ما والمنيش حيت معطر و انا وجهي شوية حساس
______________________________________
بوربوووو اللي كنتفكر بيه طفولتي ههههه كانت ترشو لي ختي مي كنت كنطيب مي كنت صغيرة ومازالة كتديرو دابا ولفتو ههههههههه
ç____________________________________
بخلاصة ضيعت 25 درهم في الهوا علا هاذ غارنييه غسول جربتو غا في يدي رجع نااااااااااشف و فيه الحكة خفت نديرو لوجهي لا يتشوط و انا عاد داويتو و خليتو لرجيلاتي و يديداتي حشاكم نبقا نغسلهم بيه انا جاني خايب يمكن حيت فيه الليمون
اكيد لااااا ما نشريهش لي وجهها ناشف او حساس راه تخرج عليه لا دارت هذاا حيت فيه الليمون
__________________________________________________ __
عاد شريتو يعني مازال ما بديت نستعملو و اللي جرباتو شي وحدة تفيدني بيه تمنو 48 درهم اسمو غسول و مقشر يومي من كلين اند كلير .
مازال ما جربتو باش نحكم عليه
__________________________________________
هذا كريم لتجاعيد العين خيتكم مسيكينة يالله 20 عام و شي تجاعيد ناضو فيا غا الله يستر بسبب حساسة كانت في عيني الله يحفظكم و كنت نحك عيني ونلعب فيها حتااااا مرضت جفوني و تكمشو ان شاء الله يفيدني و ما يضرنيش و خديتو بي 399 د ديال فيشي هادي يوماين يعني مازال ما نقد نقول واش فادني او لا
مازالا يالله 3 يوم يمكن او 2 يوم باش جربتو يعني في قيد التجريب باش نشوف واش يفيد او نبقا مكمشة اهئ اهئ اهئ 
_____________________________________
و هاد الصابونة ديما كنفيد بيها البنات اللي هنا حيت زوينة و هي اللي كانت عاونات وجهي مي كان نشف و ناضت ليه القشرة اليابسة زوينة بزاااااااف هادي 3 مرة نشريها و غا بي 30 د بزيت الخزامة مصايبة وسميتها برديرم
اكيد غادي نشريهاااااااا واخا قللت من الاستعمال ديالها لكن لا ناضت شي حبوبة او احمرار غادي نغسل بيها
_____________________
فوندوتان د بيبي كريم من غارنييه زوين الصراحة واخا كيسمر شوية لكن زوين والمني و قليل فاش كنديرو يعني كنخلط هههههههه ثمنو 80 درهم
لا ماغاديش نشريه ماشي شي حاجة اللي خارقة عادي و صافي
_____________________________________
اما هادا صديقي العزيز ههههه ما نقدش نستغنى عليه ديريه وبلا ما ديري لا بودر لا والو و كيغطي لي ليطاش انا كنفضلو على جميع لي فوندوتانات اللي جربت و تمنة 90 درهم و عنداكو من ادوزيام ديالو خدو من مرجان ولا شي بلاصة معرووفة
اكيد و مؤكد غادي نشريه 3 و 4 و 5 مرة ان شاء الله
______________________________________
احسن بومادا للحبيبات اللي كينوضو ولا الحبوب هادي كانت داوات لي جبهتي مي كنت كليت الزبدة في الصيف داك العام و مع انا من محبات الزبدة هههههه مخلات لي لا حبوب لا اتار و دابا هاهي عام و زيادة و ماولاش رجع و دابا راني دايراها لدقن ديالي حيت فيه حبوب ذهنية واخا تمنها 9 دراهم الا ان مفعولهاااااا غزال و عن تجربة واسنها داليبووور
اكيد غانشريها راني عشرة معاها عام و زيادة ههههههههه
________________________________________________
بان دوش د نيفيا زوين الصراحة و ريحتو زوينة و كيرطب تمنو 25 درهم
عجبني ريحتو منعشة و مرطب زوين اكيد نولي نشريه ان شاء الله
—————————————————————————–
زيت جنسون غزال و ريحة يا سلاااااااااااااام ديال الصبار و كيرطب الجيم بشكل رهييييييييييب تمنو نسيت والله يمكن 22 درهم
اكيد غا نشريه لان ريحتو و مفعولو في الترطيب زوين بزااااااااااف
__________________________________________________ ___
و طبعا زيت الورد و الجليسيرين و اللوز ما يخطاونيش و انا كنديرهم غا لشعري مع زيت الزيتون و لافوكا
او مع دانون و زنجلان و هاد الزيوت و نطلي لشعري
______________________________________________
هادي لاسير فغواد اول مرة ناخدها لكن حاااارة كتزول من الجدر بي 20 درهم
و ان شاء الله نولي نشري هادي زوينة احن من مادونا و فييت اللي غالية
__________________________________________________ _
و هادي لاسير د الجسم و ليبوند الكل يعرفها اكيد
س
سيتياااااال غزال كانت نصحاتني بيه كبرياء انثى اللي كنشكرها و بسبابها خديتوو زوين و كنديرو غا مرة في الاسبوع تمنو نسيت الصراحة لكن ما يتعداش 30 درهم وكيدوووووووووز
اكيد نداوم علا استعمالو لانو منعش و الاهم انو من الخزامة وغادي نبقا نشريه
سيتافيل هذا كريم منظف للوجه يعني بحال الغاسووول لكن كيفضل استعمالو مرة في الاسبوووع و تمنو غالي شوية شي 250 درهم و راه كيدوززززز بزااااف من شهر 6 و هو عندي و مازاااال تبارك الله ما وصل للنص لكن غزال في تنظيف البشرة من الاعماق
غادي نشريه اكيد مي يتسالا لانه منظف زوين و كينقي الوجه يعني كيجيني بحالا كوماج
و اخيراااااااا السوااااااك المغربي اللي كنفضل نتسوك بيه مرة في الاسبوع علا حساب اللون ديالوو و كيبيض سنينات بزاااف و اللي اي عربية يكون عندا بطبيعة الحال
نتمنى يعجبوكم منتجاتي اللي حبيت ظ†ط´ط§ط±ظƒظƒظ… بيها و نفيد باللي مجربة واللي مازال و اللي عند اخواتاتي اي استفسار مرحبا
و طبعا كل وحدة و بشرتها و لا بغات تشري شي حاجة على الاقل تسول الصيدلانية و على حسب نوع بشرتها و ممكن جدا الحاجة اللي تفيدكم تضرني و اللي تفيدني تضركم لذا لازم التأكد من نوع بشرتكم و اللي يوالمكم و انا للاشارة بشرتي حساااااااااااسة و مختلطة يعني حنيكاتي ناشفين و نيفي و جبهتي و دقني دهنيين
و سمحولي حيت ماعرفتش ندير الاسم ديالي في الصور ديالي
و السلام عليكم
fydj kahv;;l flkjh[hjd hgj[ldgdm ,hg’fdm hgl[vfm lkd lkn
المشاركة الأصلية كتبت بواسطة omaymakhaled 
والله الا حرااااااااام