البنات عفاكم عاونوني أنا مزوجة هادي عام ؤ عندي رضيع عندو شهرين المشكل أني مقدرتش نوفق بين الخدمة ؤ الولد ؤ شقا لدار أما الإهتمام بنفسي و بزوجي لغيتهم من شحال هادي ؤهاد المشكل عندي من نهار تزوجت حيث مكنتش كنشقا في دارنا كنت مقابلة غير الخدمة ودار فاش جيت لداري من بعد شهر حملت ؤ كنت دايرة السبة بالحمل و الوحم ولكن دابا ولدت ؤ مابقا عندي عذر
للإشارة أنا ساكنة بوحدي خدامة بعيدة على الدار ولكن عندي السياة ؤ ولدي كنخليه عند ماما آله إخليها ليا كنحطه في الصباح ؤ كنجيبو في العشية ؤ هي قريبة ليا عافاكم نصحوني كيفاش نقاد وقتي ؤ أشنو لحوايج لي إساعدوني نربح الوقت خصوصا في مجال الطبخ باش نقدر نشقا ؤ نقابل ولدي ؤ نجمع داري ؤ نهتم بنفسي قبل ميدخل راجلي في ليل
كنطلب من مزوجات سواء خدامات أو أميرات في بيوتهم إقولو لينا البرنامج ديالهم
lshu]m lk l,qthj hgph];hj ]dhgkh lkqthj hgph];hm ]dhg,h
وثانيا ولدك رضعيه او بدلي ليه او حطيه ينعس أو فالكرسي ديالو او قدام التلفزة
او بداي الطيران….ههاهاهاه
ديري دورة جمعي فيها الأزبال والملابس اللي مشتة
دوزي واحد الشطيطيبة
او دخلي إلى الحمام جمعيه و قادي حالتك تما أو ديري شي ماسك مهم شي حاجة خاصة بيك
او ماتنسايش وليدك ساعة ساعة طلي عليه
او عاد دخلي لكوزينة غسلي الماعن أو الطياب
حاولي الويكاند ديري الشغل لكبير أو جيبي شي وحدة تعاونك مرة ف السيمانة
باش تبقى الدار نقية والآلات الكهربائية تاهي كتعاون
او حاولي تكوني خفيفة فشغلك
نتمنى نكون أفدتك وخا غير شوية لأنني عانيت فحالك كنت مفششة فدارنا اولقيت راسي واحلة فداري
حتى انا موظفة وعندي ولد عندو سنة ونصف
كل نهار كنجي كندخل للكوزينة نييييييييشان قبل ميبرد فيا الدم كنوجد الكوتي لينا وفي نفس الوقت كنصب الغدا ديال الغدليه
كنخليه يطيب كنجلسو ناكلو كنجمع الطبلة إلى خلاني ولدي نشقا كنجمع الكوزينة وانا كلعب معاه وانا كنجمع الدار نهار نشطب
نهار نجفف
نهار مندير والو
المهم هو اي حاجة رديها لبلاصتها نيشان باش متجمعش الروينة
النظام اليومي غادي يفيدك ونقص عليك الشقا بزاف
في الاول كان هادشي صعيب ولكن من بعد وليت كلقا الوقت ندير كيكات وشهيوات
شوفي هادا واي استفسار انا رهن الاشارة
قبل ماتخرجي من الخدمة ديالك واحد ربع ساعة شدي وريقة و ستيلو و كتبي فيها داكشي الي خاصك ديري فاش دخلي للدار هاكذا غاتمشي مبرمجة على المهام ديالك وماتبقايش تافة.
و نهار الجمعة بالليل عاود خوذي وريقة وكتبي فيها كاع داكشي اللي غاديري في الويكاند ورتبي داكشي باش يجيك ساهل في التنفيذ.
أما الاشياء اللي كاتساعد و تختصر الوقت في الكوزينة فهي مثلا:
الربيع مقطع محطوط في الكونجيلاتور
التومة حتى هي مطحونة في قريعة في الثلاجة
مطيشة مطحونة مفرقة في بواطات او ميكات في الكونجيلاتور
شرمولة موجدة حتى هي من قبل.
و نزيدك الى استطعت تشري مكينة ديال غسيل المواعن راها كاتعاون بزاف.
هادشي اللي تفكرت دابا نتمنى الاخوات يدخلو و يفيدوك اكثر.
okhti om ayman wa amjad lah ikhali lik wlidatak 9oli liya kifach ndir touma fi telaja omaticha kankhaliha sayna ila dartha fi frigo fach radi nasta3malha ocharmoula kifach nwajad
lah ikhali lik wlidatek lama fidini achno ndir
اختي نور الدجى شكرا على الدعوات ديالك ولك بالمثل… انا نجاوبك على اأسئلة ديالك.
بالنسبة للتومة خودي كمية منها تقريبا رابعة نقيها وطحنيها في مولينكس ديال العطرية مع شوية ديال الملحة أو في هاديك ال 1 2 3 أحسن الى كانت عندك ثم ديري معها شوية ديال الزيت تقريبا شي كاس و ديريه فشي قريعة و حطيها في الثلاجة وها هي عندك التومة واجدة.
بالنسبة للشرمولة خوذي 2 قبطات ديال القسبور و وحدة ديال المعدنوس نقيهم و غسليهم مزيان ثم خليهم حتى ينشفو و قططعيهم و ديريهم حتى هما في 1 2 3 وطحنيهم جميع من بعد طحني كمية ديال التومة اللي تقدهم تقريبا شي 5 أ 6 ديال الريوس وخلطي الكل مع شوية ديال الملحة و الزيت وديريها في قريعة و غطيها بالزيت و حطيها حتى هي في الثلاجة. ممكن تزيدي معاها حت التحميرة و الكامون و الهريسة أو السودانية و ها هي عندك شرمولة واجدة و تبقى ليك حتى شهر.
بالنسبة لمطيشة غسليها وقسميها على 2 بلا ماتنقيها خوي ديك الزريعة فشي زلافة. صفيها و زيدي داك الماء على مطيشة و حطيها فشي طاوة مع شويييية المليحة وخليها فوق نار معتدلة حتى تهبط شوية ماشي بزاف و طحنيها في مولينكس بقشورها راه ماكايبانوش و قسميها حصص على قياسك ودخليها للمجمد كاتصلاح في كولشي العدس اللوبية السباكيتي الزعلوك الكفتة الحوت …..حتى البيض و مطيشةههههههههه.
نتمنى نكون فدتك أختي.
بغيت نسولك كنت قريت هنا شي عظوة كتجمع العططرية ديال النصيب كاملة في قرعة الزاج ؤ تديرها في الطاجين واش عنندك شي فكرة
المهم انك خدامة امر ماشي ساهل و عندك تربية الله يخليه ليك امر أصعب
و عندك دار و راجل و كاينا حتى نتي
هادشي بزاف معادلة صعيبة لكن ممكن تحقيقها بحاجات ما تغفليش عليها
اولها السيارة غادي تسهل لك الامر و الواليدا ديالك استافدي من الموضوع
بحال هانتي كاتخلي عند ماماك ولدك مزيان علاش ما تبداش ماماك طيب لك معاها مرة مرة نهار طيبي نتي و نهار طيب لك معاها هي
جيبي ليها تقدية و خليها طيب بالزايد لك و ليها هدا ادا ماكانش مانع عندها
الدار في نهاية الاسبوع خمليها
او مرة في الاسبوع عطي لماماك السوارت و تجيب شي مرا تخمل لك وتصبن لك الصابون الثقيل
السبت و الاحد صاوبي حاجات و ديريها في الفريكو
بحال بيتزا المسمن … وخا انا ملي جيت للمغرب لقيت كلشي كايتباع
المسمن البغرير حتى كيكا و خبز الدار كلشي
عرفتي ملي ولدت ولدي الاول كنت خداما
وواحد المرا الله يرحم والديها قالت ليا واحد الكلمة عمري ماننساها
وهي
ادا تعارضت الخدمة مع ولادك و دارك و راجلك من الاحسن بلاش منها
وانا نقول لها ايوا الواحد كايعاون شوية
و هي تقول ليا شتي بنادم عمرو ماكايتمر فيه حاجا
نهار غادا يكون شي تقصير منك عمر بنادم ماغادي يقول حقا راه كانت خداما باش تعاون
ونهار غادا تقصري مع الوليدات سواء من ناحية تواجدك معاهم او اهتمامك بهم
غادا تندمي
في وقت الندم مامنوش
و حتى حاجا ما تستاهل
لذلك انتي أدرى بأمورك
ادا خدمتك مصيرية لازمك تخدمي ديري كيما قلت لك و عاوني شوية من هنا شوية من هنا
اما ادا كان ممكن تستغناي عليها
فأنتي أدرى
الله يسهل لك امورك