بسم الله الرحمن الرحيم
السلام عليكم ورحمة الله وبركاته
طبق اليوم من عند السيدة مريم من طنجة
البايلا paella
المقادير
كيلو ديال الروز طويل اصفر مغسول و مصفي (نعبرو القياس ديالو بالزلافة و نديرو ضعفه ماء)
3 مطيشات محكوكين
4 بصلات مقطعين شرائح
ضامة بنة حوت
4 فلفلات ملونين مقطعين دوائر
زلافة ديال الجلبانة
2 خيزوات منقيين و مقطعين صغار
رابعة من هبرة اللحم مقطع طريفات صغار
رابعة ديال صدر الدجاج مقطع صغير
رابعة كلامار مقطع دوائر
رابعة كروفيت مصلوق و مقشر (نحتفظ ب 5 او 6 حبات للتزيين و كذلك نحتفظ بماء الصلق)
رابعة بوزروك مقشر
رابعة صوصيص مقطع صغير (نحتفظ ب 4 حبات للتزيين)
2 اوراق سيدنا موسى
زعفران + ملح + ابزار + سكينجبير
التزيين
3 بيضات مصلوقين
حامضة طرية مقطعة دوائر
حبات الكروفيت مصلوقين اللي نقصنا
4 حبات صوصيص نصوطيوهم فالزيت
الطريقة
في كوكوت نديرو مطيشة و البصلة و الضامة و الفلفلة و اللحم و الدجاج و كل العناصر اللي عندنا ما عدا الكروفيت و نديرو التوابل و نديرو معاهم الزيت ( نسات ماقالتها صاحبة الوصفة) ثم نسدو عليهم يطيبو من 15 الى 20 دقيقة ثم نديروهم في اناء خاص بالبايلا كيكون غارق شوية
كنديرو الروز في مقلة مع 2 معالق كبار زيت و شوية الملح و البزار و نخليوه يتشحر من 5 الى 7 دقائق حتى يصفار اللون ديالو ثم يضاف للعناصر اللي فالمول و نضيف الكروفيت و نديرو 2 قياسات ماء لكل قياس ديال الروز و نبداو بالماء اللي صلقنا فيه الكروفيت و نديرو كذلك الزيت الي قلينا فيها الصوصيص و نخلطو العناصر مزيان باش تنساجم مع بعضها ثم نديرو الاناء فوق البوطة على نار مهيلة و نضغطو على الوجه بملعقة باش يتساوى و نخليوها حتى يبدى الروز يدخلو الطياب عاد نزولو المول من فوق البوطة و ندخلوه للفران من 7 الى 10 دقائق
نزين الوسط البايلا بالكروفيت و الجناب بدوائر الحامض و نقسمو البيض على اربعة و نبداو نديرو قطعة بيض و حداها صوصيص حتى نكملو و يقدم الطبق بالصحة والراحة
يمكن نديرو عوض بوزروك بيبي مدخن
شيفلور معمر بالكفتة من عند السيدة زبيدة
المقادير
حبة كبيرة شيفلور
125g كفتة (نصف رابعة)
ملح و ابزار
بصلة متوسطة مشنفة
زيت
بيض مطرب
شابلير
طحين
الطريقة
ينقى الشيفلور و يغسل و يقطع و يصلق في ماء مع شوية الملح ثم نصفيوه و نمعسوه مزيان
نشحرو البصلة فشوية الزيت حتى تذبال ثم نضيف الكفتة و شوية الملح والبزار و نحركو و نخليوها حتى تطيب ثم نطفيو عليها و نخليوها تبرد شوية
نكورو الشيفلور قد البيضة و نديرو فيها حفرة الوسط و نعمروها بشوية كفتة جهد نصف ملعقة و نسدو عليها و منين نكملو الكويرات ندوزرهم اولا من الطحين ثم من البيض مطرب و نديروهم في لاشابلير ثم نقليوهم في الزيت الساخن و نديروهم فوق الورق النشاف لازالة الفائض ديال الزيت و نقدموهم كيجيو لذاذ بزاف
كيكة بالتفاح من عند السيدة منانة
المقادير
3 بيضات
9 معالق كبار حليب
9 معالق كبار سنيدة
9 معالق كبار دقيق
6 حتى 7 معالق كبار زيت
2 خمارات
2 فاني
2 تفاحات مقشرين و مقطعين شرائح
الطريقة
نخلطو البيض و سنيدة و الفاني ثم نضيف الحليب و الزيت و نخلطو ثم الطحين و الخمارة و نديرو الخليط في مول مدهون و مرشوش بالطحين او في المقلة ديال الحرشة و نستفو من الفوق شرائح التفاح و ندخلوه للفران حتى تطيب الكيكة و تتحمر شوية من الفوق (ماتكونش غليضة)
;g lh s[gji td fvkhl[ hggrhx hglj,p hgljkd
* لازالة بقعة المداد ديال الستيلو من الملابس نديرو عليها شوية ديال معجون الاسنان و نخليوه حتى ينشف ثم تغسل عادي
* لازالة بقعة الصدا نديرو عليها عصير الحامض و الملح و نخليوهم شوية ثم نفركو و نغسلو عادي
* للتخلص من العياء و التعب خصوصا بعد القيام بمجهود ناخذو 2 خسات و نغليوهم في 1 لتر ماء مدة 20 دقيقة ثم نصفيوهم و نبقاو نشربو الماء ديالهم كلما حسينا بالتعب
وصفات الجمال لهذا اليوم من عند الاخت سكينة من فاس
وصفة لازالة حب الشباب
ناخذو حفنة ديال الخس مقطع و نغليوها فالماء مدة 10 دقائق و نصفيو الماء و نمسحو بيه الوجه مزيان و نخليوه مدة 20 دقيقة ثم يمسح بماء الورد
تستعمل يوميا حتى يزول حب الشباب و هي وصفة مجربة و نتائجها فعالة
وصفة لازالة الكلف
ملعقة زيت خروع
ملعقة جليسيرين
ملعقة زيت لوز
ملعقة من مسحوق السنسول ديال الحوت الابيض بعدما حمرناه مزيان حتى يولي بحال الرماد و طحناه (يكون ديال الحوت اخضر ماشي طايب)
نخلطو جميع العناصر و نديرو الخليط على الوجه في الليل قبل النوم و نغسلوه فالصباح بالماء دافي و الصابون
تستعمل الوصفة يوميا حتى يزول الكلف
2 معالق كبار من الزعتر مسحوق مزيان نديروهم في ماء بارد مدة 24 ساعة و نصفيو الماء و نبقاو ندلكو بيه فروة الراس يوميا قبل النوم او يمكن نديروها فالصباح و فالعشية نمشيو للحمام
*وصفة 2 لتساقط الشعر
ملعقة كبيرة من حبوب المعدنوس مدقوقين نديروها في ماء دافي مدة 12 ساعة و نبقاو ندلكو بيها فروة الراس و نخليوها 3 ساعات ثم تغسل
تستعمل مرتين في الاسبوع
وصفة لعلاج قشرة الشعر
المكونات
كاس زيت زيتون
نصف كاس زيت خروع
10 نقطات من زيت الصبار
الطريقة
نخلطو الزيوت و ندلكو بيها مزيان فروة الراس و نخليوها مدة فالشعر اما نديروها فالصباح و نغسلوها فالليل او نديروها فالليل و تغسل فالصباح
تستعمل 3 مرات فالاسبوع
نديرو مقدار حفنة من مسحوق عرق السوس في 1 لتر من خل التفاح في قرعة و نغطيوها على الضوء ونخليوها مدة اسبوع ثم نبداو ندلكو بيهم فروة الراس و نخليوهم شوية ثم يغسل الشعر
تستعمل مرة في الاسبوع
لطيفة الطبايلى مراكش
الشوا ديال الزلافة
ضلعة
2 الى 3 زلايف الماء
2 م ك السمن المدوب
1 م ك الكامون
1 م ك الملح
5 البصلات كبار وصحاح
1 كاس كبير الطحين
الماء
نديرو الماء فى طنجرة كبيرة ونقلبو فى الوسط زلافة على فمها تم نديرو البصلة فوق الزلافة ونحطو عليها الضلعة بعد ما ندهنوها بالسمن المدوب والكامون والملح ونقفلو الطنجرة ونسدو الغطاء
بعجين الطحين والماء ونزلوه على المجمر بعد ما تنزل النار شوية
من 4 الى 5 ساعات تم نقلبو الغطاء على الطنجرة ونديرو الرماد
والفحم اما المرق اللى بقى نسقيو بيه الروز ويقدم كطبق مرافق
كدلك نديرو كمية قليلة من اللحم حسب افراد العائلة
طريقة السمن المدوب
كيلو الزبدة البلدية او الرومية
كموصة الزعتر من الاحسن فاصمة
1 م ك الملح
1 م ص الدشيشة الغليظة
تنديرو الزبدة على نار ميلة مع الزعتر والملح حتى تدوب مزيان عاد نديرو الدشيشة ( البلبولة ) حيت هى اللى كتصفى الزبدة
تيبقى الماء تحت والسمن فوق تنصقيو السمن غير بشوية بلا ما نخدو اللى التحت وتنديروه فى قرعة الزاج ومانقفلوش عليه حتى يبرد تماما عاد نسدوها
يمكن نديرو القزبور لوحده وكدلك المعدنوس
زينب اكادير
القراشل
250 غ الزبدة
4 الكيسان الزيت ( العنبة )
2 خمارات
2 فانى
شوية خميرة الخبز
500 غ السنيدة
4 البيضات
شوية النافع
شوية الجنجلان
قبصة الملح
2 كيلو الطحين
حفنة الحرش
2 كيسان الماء او حسب الخليط
نحكو الزبدة مع السنيدة تم نضيفو كل المقادير وتجمع بالماء تحربل رقيقة وتقطع بالسكين او المقص وتدخل للفرن
وصفات الجمال لهذا اليوم من عند السيدة ربيعة من القصر الكبير
لوسيون للبشرة الحساسة
المكونات
2 معالق كبار شوفان (خرطال)
ماء معدني القياس اللي يغطي لينا الخرطال
اصفر بيضة بلدية
3 معالق كبار زيت اللوز
الطريقة
نديرو الشوفان في زلافة و نغطيوه بالماء المعدني و نخليوه مدة ساعة غذي يتضاعف الحجم ديالو ثم نعصرو الشوفان من الماء و نصفيوه في منديل نقي و غذي يولي عندنا حليب الشوفان هو اللي غذي نستعملو
نديرو اصفر البيضة فالخلاط الكهربائي و نخلطو مزيان ثم نبداو نزيدو زيت اللوز قطرة قطرة مع التطراب حتى يعقد الخليط بحال المايونيز ثم نزولوه من الخلاط و نزيدو عليه حليب الشوفان مصفي و نخلطو حتى تنسجم العناصر و نديرو اللوسيون اللي حصلنا عليها في قرعة و كل ليلة نبداو نغسلو الوجه ديالنا مزيان و ننشفوه و نديرو قطن فاللوسيون و نمسحو بيه الوجه مزيان فالليل و فالصباح كيصبح الوجه منور بحالا دايرين ليه كريم الاساس ( fond de teint)
يمكن استعمال الوصفة حتى للبشرة الجافة و كذلك يمكن نديرو غير حليب الشوفان بوحدو
المكونات
2 معالق كبار عصير الصبار
ملعقة صغيرة من ماء الزهر الطبيعي المقطر
ملعقة صغيرة عصير البومبلوموس
ملعقة كبيرة صلصال اخضر
3 حتى ل 4 نقط من زيت الحامض
الطريقة
نمزجو العناصر كلها مزيان بالفورشيت و نخليو زيت الحامض حتى الاخير عاد نزيدوها و نخلطو شوية ثم ندهنو الوجه بالخليط و نديرو ليه حمام بخار على الاكثر مدة نصف ساعة مع تغطية الوجه بفوطة باش يبقى البخار مجموع و من بعد نمسحوه و هو باقي مندي بقطن مبلل بماء المعدنوس و سنلاحظ ان النقط بدات تختفي
تستعمل الوصفة مرة في الاسبوع و كيبان الفرق من اول مرة
كيفية تحضير ماء المعدنوس
ناخذو كمية من المعدنوس و نقطعوه رقيق و نغطيوه بماء معدني بارد و نخليوه ليلة كاملة ثم يصفى و يستعمل كيعطي نتيجة هائلة
(الوصفة الاصلية تستعمل فيها عشبة اسيوية تسمى بالهاماماييس و بما انها غير موجودة بالمغرب عوضاتها السيدة ربيعة بمازهر مقطر و قالت ان له نفس المفعول)
*للمعلومة فالسيدة ربيعة كانت تقطن ببلد عربي و كانت تشتغل مع ناس كيصاوبو الوصفات و يبيعوها باثمان مرتفعة و هي دابا كتكرم بيها على مستمعات اللقاء المفتوح دون مقابل لانها مابقاتش فهذاك البلد فلنطلب من الله عز وجل ان يجعلها في ميزان حسنات
كيفية معرفة نوع البشرة (دهنية , حساسة, عادية , جافة او بين و بين)
البشرة الدهنية
كنحطو منديل ورق على الجبهة و الانف و الخدين و الا بانت لينا فيه مادة دسمة (دهون) فالبشرة دهنية
البشرة الحساسة
هي اصعب انواع البشرة لانها تتاثر بجميع مستحضرات التجميل حتى و ان كانت ذات جودة و تتاثر بتغيرات الجو و كيكون فيها احمرار و بعض الاحيان حكة خفيفة
البشرة الجافة
عندما تمسح بمنديل الورق لا تظهر اية دهون و كنحسو بالوجه مشدود و مجبد
البشرة العادية
عندما نمسح بالمنديل ما كنشعروش بالوجه كيتجبد او باي شد فالمكان كما ان الورق كيبقى صافي
البشرة اللي بين و بين
بشرة مافيها لا شد لا جفاف و لا دهون
وصفات الجمال لهذا اليوم من عند السيدة ربيعة من القصر الكبير
ماسك لتقشير الوجه (الكوماج يصلح لجميع انواع البشرة)
المكونات
2 معالق كبار شوفان (خرطال) مطحون غبرة رطبة
3 حبات فريز ممعوسين مزيان بالفورشيت
ملعقة كبيرة كريما (او حليب البقر نغطيوه و نخليوه حتى الغذ و نزولو الوجه اللي غدي يتكون الفوق كيكون خاتر و نستعملوه )
الطريقة
نخلطو جميع العناصر حتى نحصل على كريم نديروه للوجه و نخليوه مدة 10 دقائق ثم نبداو نزولوه بعملية دائرية برؤوس الاصابع حتى يتقشر و يخرج معاه بحال الوسخ حيت كتزول الجلدة الميتة ثم نغسلو الوجه بماء دافي و بعده ماء بارد و نمسحوه بماء الورد و من بعد نديرو اي كريم كنستعملوه للوجه
بعد استعمال الماسك و تقشيره نلاحظ فرق كبير لانه كيرد الوجه رائع حسب صاحبة الوصفة
يستعمل الماسك منين نشوفو الوجه ذبال لانه يجدد نضارة الوجه يعني مرة فالشهر
المكونات
نصف ملعقة صغيرة من زهر البرتقال
2 معالق صغار عصير الصبار (نطحنو الصبار او نحكوه فالحكاكة رقيقة باش يطلق الماء ديالو)
3 حتى ل 4 نقيطات عسل حر
2 حتى ل 3 نقط من زيت الازير
الطريقة
نخلطو المكونات و نديروها في بخاخ (رشاشة) و نرشو الوجه و اليد باش نرشو تكون بعيدة على الوجه باش يعطي مفعول احسن و نخليوه مدة 15 دقيقة ثم يمسح الوجه بالقطن بلا ما نغسلوه
يستعمل مرة في الاسبوع
الرفيسة (هدى من المضيق)
المقادير
دجاجة ديال كيلو و نصف
2 بصلات كبار مشنفين
كاس صغير زيت مائدة
قزبر و معدنوس مربطين
ملح و ابزار
نصف ملعقة صغيرة جنجلان
شوية زعفران ملون
شوية زعفران حر مسخن
العجين العادي ديال لمسمن او التريد طايب و من بعد نلويو ثلاثة او اربعة ورقات ديال التريد و نقطعوهم رقاق ثم نديروهم فالكسكاس حتى يطيب المرق و نفوروهم
التزيين
لوز مفسخ و مقلي و مهرمش
الطريقة
نطيبو الدجاجة صحيحة مع البصلة و الزيت و باقي التوابل و العناصر اللي عندنا حسب الطريقة المعتادة و منين تطيب نزولوها من الطنجرة و ندخلوها للفران تتحمر و نخليو المرق يختار
نفورو التريد اللي قطعنا فالكسكاس و نديرو فرشة من التريد في الطبق و نديرو فيها حفرة الوسط و نحطو الجاجة فالحفرة ثم نديرو عليها قبة ديال التريد و نصفيو البصلة و نحطوها الفوق و نسقيو بالمرق سخون و نزين باللوز مهرمش من الفوق و يقدم الطبق
المقادير
كيلو ديال الكفتة
3 بيضات كبار
2 ضروس ثوم مدقوقين
شوية معدنوس مقطع
2 كيسان صغار شابلير
شوية ملح
شوية تحميرة
(يمكن الا بغينا نديرو التوابل الاخرى)
التزيين
كيتشاب (او اي صلصة اخرى)
البطاطا مصلوقة و مطحونة مزيان بحال الكريم و مخلطة مع شوية الزبدة و الملح و ابزار ابيض
الطريقة
نخلطو الكفتة مزيان مع البيض و المعدنوس و لاشابلير و باقي العناصر و نقسموها على ثلاثة
ناخذو لاطات مدورين مدهونين و نبسطو في كل وحدة مقدار ديال الكفتة و نقادوها مزيان من الفوق (او الا كان عندنا غير مول واحد نطيبو كل وحدة بوحدها)
ندخلو الكفتة تطيب فالفران ثم نخرجوها و الى بانت لينا تنفخات شوية من الفوق نقادوها بالسكين
نحطو دائرة ديال الكفتة و نسرحو عليها الكيتشاب و نديرو دائرة اخرى ديال الكفتة و نسرحو الكيتشاب ثم نديرو الدائرة الثالثة ديال الكفتة و نغطيوهم كاملين من الفوق و الجناب بالبطاطا مطحونة (خصها تكون سخونة باش تتسرح بسهولة) و نقادو الفوق و الجناب بالسكين باش تجي بحال الطورطة ثم نديرو شوية من البطاطا فلابوش و نديرو وريدات الفوق و فالجناب ديال الطورطة و نزوقوهم بنقيطات ديال الكيتشاب ثم نزين الوسط بوريقات نعناع و تقدم الطورطة دافية
كفتة على شكل طورطة (مليكة من اولاد تايمة)
المقادير
كيلو ديال الكفتة
3 بيضات كبار
2 ضروس ثوم مدقوقين
شوية معدنوس مقطع
2 كيسان صغار شابلير
شوية ملح
شوية تحميرة
(يمكن الا بغينا نديرو التوابل الاخرى)
التزيين
كيتشاب (او اي صلصة اخرى)
البطاطا مصلوقة و مطحونة مزيان بحال الكريم و مخلطة مع شوية الزبدة و الملح و ابزار ابيض
الطريقة
نخلطو الكفتة مزيان مع البيض و المعدنوس و لاشابلير و باقي العناصر و نقسموها على ثلاثة
ناخذو لاطات مدورين مدهونين و نبسطو في كل وحدة مقدار ديال الكفتة و نقادوها مزيان من الفوق (او الا كان عندنا غير مول واحد نطيبو كل وحدة بوحدها)
ندخلو الكفتة تطيب فالفران ثم نخرجوها و الى بانت لينا تنفخات شوية من الفوق نقادوها بالسكين
نحطو دائرة ديال الكفتة و نسرحو عليها الكيتشاب و نديرو دائرة اخرى ديال الكفتة و نسرحو الكيتشاب ثم نديرو الدائرة الثالثة ديال الكفتة و نغطيوهم كاملين من الفوق و الجناب بالبطاطا مطحونة (خصها تكون سخونة باش تتسرح بسهولة) و نقادو الفوق و الجناب بالسكين باش تجي بحال الطورطة ثم نديرو شوية من البطاطا فلابوش و نديرو وريدات الفوق و فالجناب ديال الطورطة و نزوقوهم بنقيطات ديال الكيتشاب ثم نزين الوسط بوريقات نعناع و تقدم الطورطة دافية
بسطيلة مشكلة بالدجاج و الحوت و السبانخ
**حشوة السبانخ
3 قبطات سبانخ
2 بصلات كبار مشلضين
بكية فرماج مربع (كيري)
شوية الكوزة
شوية ملح و ابزار
بيضة
**حشوة الدجاج
دجاجة (كيلو او جوج كيلو)
بصلة مقطعة شرائح
ملح + ابزار + سكينجبير + زعفران
شوية سمن
عود قرفة
رابعة لوز مفسخ و مقلي و مهرمش
قزبر و معدنوس مقطعين
10 بيضات
شوية الزبدة
سكر كلاصي (تقريبا 150 غرام)
كيلو ديال الورقة (او كيلو الا ربع)
ملعقة قرفة
**حشوة السمك
ميرنا و كروفيت و كلامار حسب الموجود
شعرية صينية
قزبر و معدنوس مقطعين
ضامة بنة
فطر اسود
ملح صيني
سودانية و ملح و ابزار و كمون و تحميرة
صلصة الصوجا
زبدة و زيت
الطريقة
** نغسلو السبانخ و نقطعوهم رقاق و نديروهم في مقلة يتشحرو مع شوية الزيت او زبدة و الملح و البزار
نحمرو البصلة فشوية الزيت و الملح و البزار
نقطعو مربعات الفرماج و نخلطو كلشي مع بيضة و شوية الكوزة
** نديرو الدجاج في طنجرة مع البصلة و الزيت و السمن و التوابل و الربيع و منين يطيب نزولوه من الطنجرة و نفرتتوه و نطيبو البيض فالمرق ديالو ثم نخلطو كلشي مع اللوز و سكر كلاصي حسب الذوق (يمكن اضافة بيض مسلوق محكوك)
** نديرو الحوت في مقلة فيها شوية الماء و الربيع و الضامة و التوابل اللي عندنا فالمقادير و الزيت و الزبدة و نبداو بالكلامار (مصلوق شوية من قبل) ثم نديرو ميرنا و الكروفيت و الفطر و نخليوهم يطيبو
ثم نصفيوهم من الماء ديالهم و نديرو فيه الشعرية الصينة الا خصنا الماء نزيدوه ثم تصفى و تقطع و نخلطوها مع الحشوة
نسرحو الورقةو ندهنوها بالزبدة مدوبة و نديرو نوع من الحشوة و نلويوها بحال المحنشة ثم نديرو ورقة اخرى و ندهنوها بالزبدة و نديرو حشوة اخرى و نزيدوها على الاولى و نلويو كذلك بحال المحنشة ثم نديرو الحشوة الثالثة بنفس الطريقة و هكذا حتى نكملو و ندهنوها بالزبدة و تدخل للفران او نسرحو ورقة و نديرو فيها شوية من كل حشوة و نلويو بحال المحنشة
او يمكن نديروها بسطيلة عادية على شكل طبقات
السيدة اللي عطات الوصفة راه ماشرحاتش المرحلة الاخيرة مزيان حيت سالى الوقت و مابغاتش ترجع تكمل مع 11h . فالاول قالت بسطيلة و فالاخير صدقات محنشة
المهم الحشوات هما هادو و كل وحدة تعمر حسب ذوقها
ماسك للبشرة الدهنية (مع المداومة عليه كتولي البشرة عادية) (السيدة ربيعة)
المكونات
تفاحة مصلوقة و ممعوسة مزيان بالفورشيت حتى تولي بحال الكريم
نصف ملعقة صغيرة كريما (وجه الحليب الطبيعي اللي كيتكون الفوق)
نصف ملعقة صغيرة عسل حر
ملعقة كبيرة شوفان مطحون مزيان (خرطال)
نصف ملعقة صغيرة قرفة
الطريقة
نمزجو جميع العناصر مريان بالفورشيت حتى نحصل على كريم كثيف و نديروه على الوجه من 10الى 15 دقيقة (الى كانت البشرة دهنية بزاف) ثم نزولو الماسك بقطن نظيف و نغسلو الوجه بماء دافي ثم ماء بارد و ندوزو عليه مكعبات ثلج ديال ماء سلق الخضر (منين نسلقو الخضر نديرو ماء السلق في قوالب الثلج و نجمدوهم و نبقاو نستعملوهم للوجه)
بسطيلة بالحوت و صدر بيبي
*المقادير
نصف كيلو صدر بيبي مقطع مكعبات بحال القطبان
نصف كيلو كروفيت
نصف كيلو هبرة الفرخ
200 غرام فرماج محكوك
200 غرام شعرية صينية
رابعة ديال الورقة
*مقادير الشرمولة
2 معالق كبار صلصة الصوجا (او نصف كاس عصير الحامض)
2 معالق كبار تحميرة
2 معالق كبار قزبر و معدنوس مقطعين
ملعقة صغيرة كمون
2 معالق كبار هريسة (او حسب الذوق)
نصف ملعقة صغيرة ملح
الطريقة
نسلقو بيبي فالكوكوت مع الحامض و الملح و نصفيوه
نديرو الفرخ فالطحين و نقليوه فالزيت
نحمرو الكروفيت مع الزبدة و شوية الملح و البزار
نسلقو الشعرية الصينية شوية و تصفى و تقطع
نخلطو مقادير الشرمولة و نقسموها على ثلاثة حصص
نخلطو بيبي مع ثلث ديال الشرمولة
نخلطو الفرخ و الكروفيت مع الثلث الاخر من شرمولة و نخلطو الشعرية مع الثلث الاخير
نفرشو الورقة فالصينية ديال البسطيلة بالطريقة المعروفة و ندهنوها بالزبدة مدوبة و نديرو طبقة ديال بيبي ثم طبقة ديال الحوت ثم الشعرية الصينية و نديرو الفرماج محكوك و نطويو الورقة و ندخلوها للفران تطيب و تتحمر و نديرو عليها شوية فرماج محكوك من الفوق و تزين بشرائح الحامض او حسب الذوق
كتجي زوينة و غير مكلفة