طاجين السمـان بالبسباس مبتكـر من كـوزينتي وبالصور وسسسسسسسساهل

الـسلام عليـكم ورحمة الله تعـالى وبركـاته ، هاد الطويجين واةداه من كتـاب ديال أمهـاوش
خفيف وكيجي حلو واحد الحلاوة طبيعيه غالبـاً كيندار باللحم ولكن هاد المرة جربتـوا ب فريخات
السمان حتاش ماكانتش عندي باقي اللحم في الثلاجة ..
لذلك أنـا غنعطيكم المقادير بالسمان ولكن نتوما عملـوه باللحم عادي .


4 فرخات سمان ( أو كيلو اللحم من الأحسن غنمي )
زيت الزيتون مخلطة بالزيت العادية .
2 فصوص ثوم
بصلة مشلظة
زعفران حر
م ص سكين جبير
ملح
بزار
م ص الحامض
بقدونس مفروم
وبسباس حسب الأشخاص

ـ بديت بالسمان نضفتوا مزيان وشوطت ليه كل شعيرة رقيقة مابغاتش تجبد لي باليد .
وشرملتوا بالمليحة والبزار ولاسكين جبير طري ( لأن ماكانش عندي المدقوق) والزعفران
شعرة وواحد المعيلقة ديال عصيرالحامض وحكيت الثوم وزدتوا عليهم و خليت الفريخات
يترقدوا مزيان ، سديت عليهم بفيلم وخليتهم في التلاجة حتى وصل وقت العشا ( بديتهم مور الغدا
ونصبتهم للعشا ) باش عاد يتنسموا مزيان ( لأن ماكثرناش العطور ).

ـ من بعد شرملت البصيلة حتى دبالت وعاد ضفت ليها السمان مع الشرمولة ديالوا اللي طلق
فيها . وخليتهم حتى بدات كتحمر البصلة وحيدتها من الطنجرة .

ـ في الطاجين ديالي درت واحد القاعدة ديال دوائر البصلة وعاد حطيت السمان والبصلة
المشحرين من قبل ( باش مايتحرقش ليا التحت ويبقى مدغمر ) .

ـ كنمرق واحد الشوية مانكثرش الما و نخليهم يطيبوا واحد العشر دقايق ( لدرتي اللحم
كتسناي تقريبا 30 دقيقة ) .

ـ في هاد الأثناء نقطع البسباس المنقي لأرباع أو أثمان على حسب كبر الطاجين
عندي وواحد الطريف ديال الحامض مصير هادي مانستغناش عليها هههههه
لما يمر الوقت نضيف البسباس ونحليه يطيب ربع ساعة أخرى .

ـ ومرة مرة كنطل على الطويجين واش نشف من الماء نزيد نرويه .
لما يطيب نطفي عليه ونزينوا بالبقدونس مفروم ونقدموا بالصحة
والراحة .