اليوم ان شاء الله بغيت نشارك معاكم وصفتي فتحضير البسطيلة د الحوت و للي تتجي لديدة و راااقية و طعمها مغاااير بشهادة كل من داقها, تبارك الله المنتدى غني بوصفات د البسطيلة و لي باينة حتى هي لديدة و لكن بغيتكم تجربوا وصفتي و تردوا عليا الخبار
يلاه نبدا بالمقادير لي تكفي لبسطيلة كبيرة د الفرح < انا حيت ما عندي فرح درت جوج متوسطين وحدة تغدينا بيها ووحدة خبعتها فالكونجلاتور>
كيلو ميرنا
نص كيلو كروفيط
نص كيلو كلمار
بكية كبيرة شعرية صينية
فلفلة حمراء مقطعة شرائح رقاق
كمية من المعدنوس
شوية د القسبور
3 ضروس تومة
ملح و ابزار
خيزوية كبيرة محكوكة او 3 صغار
معلقة كبيرة صوجا
شوية د الهريسة
2 كنور بقري
الشومبينيو اسود مرطب فماء ساخن و مقطع
معلقة كبييرة د الزبدة
نص معلقة صغيرة زيت رومية
كيلو و نص بورو
فروماج احمر
ورقة البسطيلة
زبدة دايبة
اول حاجة تندير المرنا فالكسكاس تتبخرو نرش عليها ملح و ابزار, ملي تطيب نخليها تبرد ونزولها الجلدة الرمادية و الشوك انا تناخدها فيليه باش تنقص عليا تنقيا د الشوك
الما لي بخرت بيه الميرنا هو لي نرطب فيه الشعرية الصينية لمدة خمس دقائق ثم نقطعها
في طنجرة ندير الكلمار و طريف د الليمون و الما و نسد عليه ثلث ساعة يتصلق
في طنجرة كبيرة كندير البورو مقطع الثومة المعدنوس القسبور ملح ابزار فلفلة حمراء شرائح خيزو الزبدة الزيت الرومية نخلط الكل و نخليهم يطيبوا على عفية متوسطة و انا مغطية الكوكوط بغطاتها بلا مانزيرها غي باش يتصهدوا حيت ما تنزيدش الما تيطيبوا غي بالما لي تيطلقوا الخضر
ملي نقلب الفلفلة و نلقاها نزلت نزيد الكروفيط
نقلب الخليط مزياان من بعد نضيف الشومبينيون اسود الصوجا كنور البقري الهريسة انا درت غي شوية حيت عندي حاااااارة
نحرك مزيان وملي ينشف من الماء تنضيف الشعرية الصينية و الكلمار ملي يتجانس الكل نطفي عليها قبل ماتتعجن الشعرية و نديرها فبانيو د ميكة باش تبرد قبل ما نجمع البسطيلة
سمحولي ما صورتش جميع المراحل حيت يدي بوحدي و كنت مزرووبة حتى للوحدة و نص عاد بديتها و مع الربعة كانت كتفترس فوق الطبلة ههههههه
بعدما بردت الحشوة نلويوا البسطيلة بالطريقة المعتادة ولكن خصني نتهلا فيها بالزبدة هادشي لي فالصورة ما قدنيش و زدت دوبت مرة اخرى
المهم هو انني ندير نصف الحشوة ثم الميرنا و الفروماج ثم الحشوة المتبقية و نسد و نزينها باش ما بغيت و ما ننساش الزبدة مدوبة فالاخير باش تجي الورقة مدهبة و مقرمشة
و هاهي بعدما وجدات و هاديك اليديدة دولدي ما صبرش حتى نصور ههههه
نتمني احبيباتي نكون توفقت فالشرح و نتمنى اكثر انكم تجربوها حيت تستحق
ما تنساونيش من شي دعيوة د الخير ربي يجعلي و ليداتي من الصالحين و يحفضلي مملكتي الصغيرة
احبكن في الله و دمتن بود
fs’dgjd ] hgp,j< ydddddddddddddddv hg[km
المشاركة الأصلية كتبت بواسطة فاتحة خير 
بالصحة و الراحة
بغيت نتهلا فيك بشي زرورة ساعة البزطام خااااوي
المشاركة الأصلية كتبت بواسطة ماما آدم ميرسي اسماء
المشاركة الأصلية كتبت بواسطة ام الياس وايناس بغيت نتهلا فيك بشي زرورة ساعة البزطام خااااوي
المهم هو نورك لي فالصفحة