الماء الغير الصالح للشرب

السلام عليكم..
بغيت نفتاتح مدونتي بهاد الموضوع الشائك لي كنعانيو منو في المدينة الكبيرة الدار البيضاء.. الما عندنا موسخ.. طبعاً قالوها فوسائل الإعلام العربية والعالمية.. ونشروها حتى في صفحات الجرائد الوطنية.. عندنا في مدينة الدار البيضاء الما حلو مخلط مع الما ديال الواد الحار.. يعني داكشي لي كنحطو حاشاكم في الطواليط كيدور ويدور ويرج علينا من الروبيني باش نشربوه ونعاود نحطوه حشاكم في الطواليط.. هدا أمر واقع.. وبما أننا كشعب وساكنة لمدينة الدار البيضاء فرحانين بالوضع.. وساكتين وحامدين الله.. وكل شهر كنخلصو لليديك داكشي لي حسبت لينا وخا هيا ممخلصاناش في داكشي لي كنحطو ليها في الطواليط وكتعاود تبيعو لينا من الروبيني.. ولكن كين شي ناس لي خيفين على وليداتهم وعلى صحتهم.. هاد الناس العياقة بحالي.. إما كيمشيو يشريو الما أو إلا كاانو مافحالهمش بحالي.. كيعمرو المقارج وكيطيبو الما باش يشربو.. أنا هنا بغيت نعطي واحد الفكرة.. يعني ماخصناش نعيرو ونمشيو.. لا خاصنا نساهمو في حلول ترقيعية ولكن تخدم صحة المواطن.. لأننا كيما عارفين.. ماكين لا طب ولا طبة ولا سبيطارات.. وحتى الروضة عمرات.. المهم الحل هوا صفايات الما.. كينين آلات كتصفي الما.. إما كيركبو في الروبيني أو كيتحطو بحال هادوك لي كنشوفو في التلفازة في المكاتب والبيروات برا.. المهم ألة كتشد ليك قنت في الكوزينة.. وكين حتى الغرارف لي كتعمري فيهم الما من الروبيني وهوا كيصفيه بواحد الفيلتر مني كيتوسخ كيخصك تعاود تبدليه.. الفكرة لي عندي.. أن هاد الألات لي كيتركبو في الروبيني كيكونو غالين.. يعني لطبقة الميسورة أو المتوسطة.. أما الغرارف فكيكونو رخاص شوية غير الفيلتر لي كيولي حتى هوا ميزانية.. وكين آلات أخرين كيصفيو بالفاخر والحجر والرملة.. أنا عندي وحدة كتهز شي 10 لتر.. شريتها ب500 أو 600 درهم.. كنعمرها وفيها روبيني كنكب منو الما.. الفكرة لي بغيت نقول أن كل وحدة تشارك هيا وشي جارة أو جوج ويشريو وحدة ومن الصباح لصباح يعمرو القراعي منها ويديروهم في الثلاجة.. ولي سهل عليها الله تشري ديالتها.. غير هاد الحل راه كينفع الناس لي ساكنين في عمارات أو بيوت مع الجيران أو العائلات لي ساكنين في دار وحدة.. المهم نساهمو في التخفيف من الأمراض لي ولات دابا كتنتاشر بحال الكوليرا.. والتسممات المتكررة ولي السبب ديالها ديما .. هوا الما… والله لا يحرمنا منها نعمة..