السلام عليكم و رحمة الله تعالى و بركاته:
أسال الله تعالى أن يجعل هدا ط§ظ„طھط¬ظ…ط¹ دا فائدة و نستطيع من خلاله جمع ملف متكامل لمتاعب الحمل و كيفية تجاوزها من خلال تجاربنا الشخصية.
الفكرة بسيطة جدا : كل واحدة منا مرت بمشاكل عديدة أثناء حملها : الله اجعلها مغفرة للدنوب.
و كل واحدة بذلت كل جهدها لسؤال من سبقوها أو طبيبتها أو البحث في الكتب : اوا علاش الحادكات ما نعطيو لغيرنا النتائج اللي توصلنا ليها بلا ما يضيعوا اخوات اخرين وقتهم فالسؤال و الالم .
اذن : المطلوب من كل أنيقة حاملة دابة او سبق ليها عاشت التجربة أو حتى عندها افكار واخا مازال ماولدات تدخل و تقول لينا بالتفصيل الممل شنو داز عليها وكيفاش تخطات المصاعب.
الفكرة دابا واضحة و كلها داخلة فاطار من فرج عن مؤمن كربة من كرب الدنيا فرج الله عنه كربة من كرب الاخرة فربما دخلات أخت عاد حملات و تقرا و تلقى حل.
غادي نبدا براسي:
1- حيت تزوجت كان عندي 30 سنة لهدا ما استعملتش الكينة خوفا من السن ديالي و نهار بغيت نحمل سهل الله تعالى.
2- البداية كانت فشهر 6 حسيت بتعب وقيئ و غمة فقلبي : القيئ داويتو بالماكلة خفيفة و متقطعة النهار كامل عني ماكناكلش بحال راجلي غير شوية و نبقى واحد الساعة أو نعاود ناكل و هكدا النهار كامل. الغم النفسي سبب لي مشاكل مع راجلي و غير دزت عند الطبيبة و تاكدت من الحمل قلت ليه : راك عارفني كنت صبارة و ماكنخسرش ليك الخاطر دابا خصك توقف معايا هاشنو كنحس بيه .
البكا مالقيتلو حل : غير كانقلب على المناسبة باش نبكي مازال لدابا كنبكي لابسط سبب.
بديت كنشرب كينة دالحديد و هي تدير لي امساك حاد .
الحل اللي لقيت : عصير الليمون أو مطيشة محكوكة +زيت بلدية أو خضر مسلوقة.
الفترة اللي دوزت قبل مانلقى حل للامساك بداو البواسير .
الحل اللي لقيت ليهوم : كنتوضى بما سخون و ندهن البلاصة بزيت بلدية و نحاور ندفعهوم بديك الزيت باش ارجعو للداخل.
مرة ضربني الرواح و تخلعت خفت من أنفلونزا الخنازير .
الحل : منين مافي سخانة و لا تعب قلت راه رواح عادي : خديت بصلة حمرا قطعتها دوائر و عملت عليها سنيدة خليتها شوية طلقات الما ديالها و بديت نشربو بحال السيرو و الحمد لله دازت النزلة بسلام.
مشكل الجوع و الخدمة : شريت تمر رطبة و بديت كناخدها معايا للخدمة كلما لقيت شوي دالوقت كنديرها ففمي بلا ما نعيق بالماكلة و يشوفوني الناس.
مشكل الحموضة عاد بداني فالشهر السابع : الحل ديالو خيزو كناكل خيزو خضر من بعد مابقاش اقضي في عطاتني الطبيبة كينات ريني .
مشكل الملابس : اكنة فمدينة صغيرة و مالقيت ما نشري و معا البرد جواكطي و المنطويات كيبينو الكرش ماعجبنيش المنظر ، خديت غير les caps كانلبس حوايجي عادي و ندير الكاب من الفوق يستر الكريشة و يسخني.
مشكل الحكان : رجعت بحال المعضرة دالزيت من قوة دهين الزيت البلدية .
مشكل الوزن : كل مرة كاتقول لي الطبيبة مازدتي والو و لكن الحمد لله احسن نكون ضعيفة و لا نغلاض حتى اوحلو فالجنن منين اخرج.
الحالة النفسية كنحاول بالدكر و قراءة القران نفاجي على راسي شويةو حتا فالخدمة كنت معصبة بزاف نعلت الشيطان و دايرا كثر من جهدي نبقى هادئة : ماحملاش بالجمل هههههههههههههه
الدوا دايرا فوق جهدي مانشرب والو .
اللي عندي فيه مشكل هاد الاسبوع النعاس كيطير لي نجرب ان شاء الله الحليب و اللويزة على الله.
هادشي اللي تفكرت نتمنى تلقاو فيه شي افادة و اللي تكرمت علينا بتجربتها الله اجعلها ليها فميزان الحسنات.
hgj[lu hgh,g gplg f],k ljhuf> ljhuf
نتمنى الأخوات يزيدو يفيدونا بتجاربهم
الله يجعلها فميزان الحسنات
اش هادشي ألبنات رجعت من الخدمة و فتحت الموضوع قلت غادي نلقى الحايحا نايضا لقيت رد واحد ديال الاخت مغتربة .هاني غادا نبكي هههههههههههههههههههههه