حلوياتي بمناسبة العيد

السلام عيكم أنيقاتي بغيت نقوليكوم عيد سعيد عليكوم كاملين و على جميع المسلمين و كنهديكم هاد البلاطو لي صايبت لبارح المقادير : بالنسبة لكعب غزال: العجينة: كيلو فورص رابعة زبدة، زوج معالق كبار ديال العسل قبصة دلملحة، قبصة مسكة حرة، أربعة معالق كبار زيت رومية،و نجمعو لعجينة بماء الزهر تقريبا زوج كيسان و خص لعجينة تبقى قاسحة و تدار منها كويرات و نخليوها ترتاح فشي بلاستيكة, العقدة: اللوز نرطبوه فماء طايب نفسخوه و نخليوه حتى ينشف من الماء و نطحنوه المرة الأولى بلا سكر الثانية بالسكر و نضيفوليه زوج معالق كبار زبدة إلى كان ممزيتش ،قبصة مسكة حرة روح الزهر وروح اللوز ماشي ضروري، ماء الزهر شوية ديال القرفة،أما الطريقة والصور أنا غادي نحاول ننزلهوم قريبا إنشاء الله ، الصابلي : كيلو فورص، رابعة زبدة كاس ونص زيت نص خمارة حمرة ، فاني قبصة ملحة، زوج كيسان سنيدة ، ثلاثة بيضات، نخدمو الزبدة و السنيدة والفاني و نضيفو البيض وحدة وحدة مع الخدمة مزيان و نضيفو الزيت و الطحين شوية بشوية حتى تولي عندنا العجينة ما قاصحة ما رطبة. و ندلكو و نشكلو الأ شكال لي بغينا ونزينو بالقطاعات و السكر كلاصي على حسب الدوق دكل واحد أنا هنا الشكل ديال لي فيه ثلاثة ديال إطاجات درت فيه فالعجينة فلان ديال الشكلاط و فلان ديال الفريز و شكلتهوم بالقطعات على شكل وريدات جمعتهوم بالناباج الشكل الثاني العجينة عادية و جمعتهوم بالكونفيتيور الأشكال الاخرى انا غادي نزل قريبا الطريقة و المقادير، عيد مبارك سعيد,