تبث في : 16/05/2019
من طرف : Romaysati
السلام عليكم ورحمة الله وبركاته
هاد الشهيوة معروفة
و كنظن كلشي كيعرف ينصب الجلبانة خضراء
و هذا وقتها لله الحمد
لكن مافيها باس نوريكم طريقتي
المقادير:
حسب عدد الاشخاص
جلبانة خضراء طرية
لحم بقري مقطع (اي جزء كتفضلو انا عملت الفخض)
بصلة كبيرة مشلضة
معدنوس
ضرس كبير ثوم
ملعقة صغيرة ملح
ملعقة صغيرة كامون
نصف ملعقة صغيرة سكنجبير
نصف ملعقة صغيرة خرقوم
نصف ملعقة صغيرة راس الحانوت
ملعقة كبيرة زيت الزيتون
مطيشة
زيتون
بودرة تنسيمة ط§ظ„ط¨ڭط±ظٹ ( اختيارية)
حامض مرقد
ماء للنصب
الطريقة :
اولا كنقيو الجلبانة
و بعدها كنرقدوها فالماء معصور فيه حامضة
و من الافضل نخليوها فذاك الماء مدة فالثلاجة مثلا ساعة
حتى يتحيد منها الرواسب
و فنفس الوقت الحامض كيقتل الطفيليات
و كيحافظ على لون الجلبانة باش ميتاكسد و يولي لونوها بني بدل الاخضر لما طيب
بعدها كنصفيوها و نعاودو نشللوها بالماء
و نبداو فتحضير الطبق
فالكوكوط كنديرو اللحم و البصلة المشلظة
مع التوابل : ملعقة صغيرة ملح + ملعقة صغيرة كامون
+ نصف ملعقة صغيرة سكنجبير + نصف ملعقة صغيرة خرقوم
+ نصف ملعقة صغيرة راس الحانوت + ملعقة كبيرة زيت الزيتون
كنخليو الكل يتشحر مع ملعقة ماء باش متحرقش لينا التوابل او العطرية
بعد متتشحر اللحم و البصلة كنضيف الثوم و قياس الماء الكافي فاش غيطيب الكل
و كنسد الكوكوط حتى يطيب كلشي
بعد متكون اللحم طابت كنضيف الجلبانة و ملعقة صغيرة بودرة تنسيمة البڭري
(كتعطي طعم مميز لان الجلبانة اصلا فيها طعم حلاوة و طبعا ليكم الحرية فاضافتها او لا )
و كنضيف الزيتون و المعدنوس مشلض رقيق و مطيشة مشلضة و الحامض المرقد
و كنسد عليهم و نخليهم يطيبو واحد 3 دقائق
و نخلي المرقة تتبخر شوية باش تجي واقفة و ثقيلة
التقديم :
و بعدها كنقدم الكل فطاجين او طبق التقديم
كنستف اللحم اولا ثم الجلبانة ثم الزيتون و الحامض المرقد
و بالصحة و الراحة
ملاحظة:
الجلبانة معروف عليها دغيا كطيب لذلك طيبت اللحم اولا عاد ضفت ليها الجلبانة باش متدوبش
و طبعا ممكن تنقيو الجلبانة و تنظفوها بالطريقة للي ذكرت الماء و عصير الحامض
و لو كنتو عتحفظوها فالثلاجة قبل الطبخ قطروها من خليط الماء و الحامض
و ديروها فميكات بلا متشللوها باش تبقى محافظ على لونوهافالثلاجة لحين وقت الطبخ
او جمدوها باش تبقى عندكم طيت السنة جاهزة للاستعمال فاي وقت
ان شاء الله تعجبكم طريقتي و تفيدكم
اللهم لك الحمد و الشكر كما ينبغي لجلالك على نعمل الكثيرة اللتي لا تحصى و لا تعد
اللهم ادمها نعمة و بارك لنا فيها و اكتب لي بها حسنة طيبة و احفظها من الزوال
الله يرزقنا و إياكم خيرات الدارين و لا يحرمنا من طيبات الجنة و نعيمها
دمتن في رعاية الكريم
اختكن أمنــار
أم ريـَّــان
وعليكم السلام ورحمة الله وبركاته
lvrm hgfڭvd fhg[gfhkm hgoqvhx fhglvhpg hglw,vm ;hguh]m hgfڭvd
الله يعطيك الصحة
كيفما قلتي كلشي كيعرفها ولكن من يدياتك تجنن
تبارك الله عليك متميزة كعادتك (حفظك الله)
اللهم ادمها علينا نعمة واحفظها من الزوال
و عليكم السلام ورحمة الله وبركاته
بارك الله فيكن جميعا حبيباتي
كل باسمها
ردودكن فرحاتني
الله يفرح قلوبكم
و يجزاكم عني خيرات الدارين
على دعواتكن الطيبة ياطيبات
الله لا يحرمني منكن
