تبت بواسطة المغرب وطني
21/12/2019
lgt ohw f,wthj lvq hgs;vd>>>>ikh hg]v]am ,hgv],] > hgs;vdikh
المشاركة الأصلية كتبت بواسطة دعاء آلقلوب 
السلام عليكم ورحمة الله وبركاته
تبارك الله عليك اختي المتفائلة خيرا موضوع مهم ومميز جعله الله لك في موازين حسناتك اختي
انا يااختي راه مدوخني الوليد عندو 9 سنين دبا جاه السكرى وهو ف سن 7 صراحة كنت مانعة عليه كلشي وتنعطيه الاكترية كلشي مفور دبا مبقااااش باغي الخضرة مفورة وليت تنطيب ليه طويجين منوع من الخضرة واللحم او الدجاج او الحوت وولى تيبغي الخبز يعني هو داك الربع معندو ميعمل ليه تنبق تنشوف وتنزيدوا وتنقول احنا لي ماشي مراض ومعند ربع تاع الخبز معندو ميعمل لينا اش غنقوووليك راني وليت فصراعات معاه الا شاف الكيك او الفانيد او الشكلاط او الكلاص كلشي باغي منو وليت حت تنعبروا ليه ونلقاه نازل ونعطيه من هدشي
ولي مدوخني اكتر تصوري بعض المرات تيبات ف 3 غ وزيادة والصباح تيصبح ف 0.80 والله يااختي الا هد السكر تيسطي وتيدوخ حت متتبقاي عارفة متعملي
على فكرة الخبز ديما نعجن الدقيق الكامل خصوصا ليه هو متنخلط معاه والووو
الله يفتح عليك ابواب الخير اختي والله يشافي مرضانا ومرضى المسلمين كافة اجمعين
Read more: https://www.anaqamaghribia.com/vb/sho…#ixzz2FSblyyKw
عليكم السلام و رحمة الله و بركاته .
أختي دعاء…أكيد ها المرض صعيب التعامل معاه…خاصة مع وليد صغير في هاذ السن باغي الشكلاط و الحلويات….الكبار و نلقاو معاهم مشكلة….و لكن خاصك تحاولي تردي البال . أولا من الناحية النفسيه….خاصك تناقشي معاه و تشرحي ليه بشوية و بالخاطر و تحاولي تعوضيه بحوايج أخرى اللي تنسيه في أهميه هاذ الحاجات….شوفي أشناهي الحاجة اللي ممكن تكون عزيز عليها و ديري معاه اتفاقيه..ولكن تشرحي ليه الأسباب و علاش و راه هاذي مصلحتو و بوسيه على راسو …يعني حاولي توصلي معاه أنه هو يولي مقتنع ….و عملي ليه مكافآت و علاش لا ؟؟؟
بالنسبه للخبز …أختي دعاء أنتي في المغرب…عجني خبيزات بالنخاله أو البلبوله و خليه يأكل براحتو ….راه هذا غادي يشبعوه دغيا حيت فيهم كمية ألياف كبيرة غادي تحتفظ على السكر في الدم و تشبعو مزيان…..
بالنسبه للغذا…أنتي حاولي طيبي طياب واحد صحي ليكم جميع….خاصك تفكر لنفسية ولدك قبل كل شي…راه أهم حاجة بالنسبة للطفل …..و منين غادي يكبر و يوعى هاذيك الساعه راه كيولي يقلب على مصلحتو .
حاولي أختي…منين تعملي شهيوات بحال الكيكات و الحلويات منين يكون هو في المدرسه…أنتي كذلك خاصك تنازل على قبلو….غير حتى يولي يفهم شوية….لأنو تسع سنين راه باقي مواعيش ….راه تعطيه كرطون الحلوى و تقولو ليك كامل غادي ياكلو كامل .
حاولي تفاجئيه مرة بشي كيكة صغيورة فيها قليل الزيت و السكر ديال فرمسيان ….زوقيها بالشكلاط المر….راه كيتباع في المحلات الكبيرة..
بالنسبة لمنظم السكر اللي قالت أم عبد الرحمان…هو على حسب أية نوع سكري عند ولدك …لأنو المنظم يصلح للنوع الثاني .
منين يكون نازل لو السكر و تعطيه كيكة أو حلوى باش تطلعو ليه….راه المشكل يطلع و ينزل بسرعه…و هذا هو اللي كيقضي على البنكرياس أختي .
إن شاء الله …نحاولو جميع نصيبوا وصفات اللي تخلي جميع يولي راضي ….و أهم حاجة أختي دعاء الحوار مع وليدك….الله يشافيه و يعافيه و إن شاء الله يخترعوا شي علاج فعال لهاذ المرض .
عندي كتاب الدكتور عبد الباسط …إن شاء الله غادي نصور صفحة الخاصة بالأعشاب اللي نصح بيها و نحطها بموضوع الوصفات .
و أنتي بلا ما تقلقي و توتري….حاولي أنك تقنعي راسك أولا أن هذا مرض مثل أي حاجة كنصادفوها في حياتنا و خاصنا نتمشاو معاها .
نت
أتمنى من الأخوات معذرتي لإعادة تنزيل الملف من جديد….و أتمنى منهم درج وصفاتهم في رابط الوصفات …..و الردود تكون هنا…حتى لا تضيع وصفات بين الصفحات …..و جزاكن الله خيرا أخواتي .