02/06/2019 
سلو صحي بطريقتي 
دارت كيلو الا ربع دقيق زرع مغربل فالغربل الرقيق لامانة انا جبتو من طاحونة مغربل نصف كيلو زنجلان منقي نصف كيلو لوز مغسول ونخوي عليه الماء طايب ونخليه واحد نصف ساعة ونقيه نافع اخديت 5 دراهم بعدما تطحن ناخد معلقة كبيرة حبة حلاوة حتا هي خديت 5 دراهم بعدما طحنتها خديت منها معلقة كبيرة شوية مسكة تقريبا دارت 6 حبيبات دقيتهم معا نصف معلقة صغيرة سنيدة معلقة كبيرة القرفة حتا هي طحنتها فالدار نصف كوزة محكوكة اختيارية شوية ملح عسل حر ايلا ماكانش نعودو ب سكر كلاصي تقريبا 300 غ زيت العود تكون حلوة الا ماكانتش نعودها بزبدة مدوبة ومصفية تقريبا نصف كيلو 
اول حاجة نحمرو دقيق فكوكوط معا تحريك حتا يتحمر 
اللوز نرش عليه الزيت وندخلو الفران ومرة مرة نقلبو باش يطيب ويتحمر 
زنجلان حتا هو دخلتو الفران فنفس الوقت 
نافع وحبة حلاوة غير نسخنهم ونطحنهم ونغربلهم مزيان 
شوفو اللوز كيف كيجي محمر 
من بعد نطحن زنجلان ونقص منو زلافة صغيرة واللوز حتا هو نقصت منو زلافة 
انا خلطت غير لقياس هاكا تيبقا ديما جديد وماكيمحنيش فالجميع زعما دايرة 10 كيلو هههههههه 
لعسل دوبتو فحمام مائي 
اهنا خلطت جميع المقادير ونبقا ندلك فيها باش كاع العناصر تنسجم مزيان 
من بعد نزيد زنجلان صحيح واللوز مهرمش 
من بعد خديت 3 زلايف وزدت عليها نصف كاس عسل + كاس زيت العود وندلكو مزيان بالنسبة لعسل والزيت تيبقاو اعلى حسب الدوق 
بالصحة والراحة نتمنا نكون فدت المبتدئات اللي اول عام ايصوبو سلو 
السلام عليكم تبارك الله عليك حبوبة احلى تقييم
تبارك الله عليك أحلى تقييم
تبارك الله عليك اختي حتا انا كندير نفس اطريقة او كنزيد عليه أيلان او زريعة الكتان عطاك الله اصحة
تبارك الله عليك اختي نور الغد ورمضان كريم
السلام عليكم تبارك الله عليك حبيبتي أمينة أحلى تقييم ليك وتوحشنك فين غبرتي 
بالصحة والراحة كيشهي تبارك الله على الحادكة فين كتغبري علينا
تبارك الله عليك انا كنحماق عليه وفرمضان بيه كنفطر مع قهيوة بالحليب طريقتك سهلة الله يعطيك الصحة
الله يعطيك الصحة ، ختي واش ممكن نحمر الطحين الفورص فالكوكوط ?
ماكاين ماحسن من الصحي الله يحفظك اختي ويكمل رجاك احلى تقييم