طارطا بالكريم والبنان والبسكوي بنينة

السلام عليكم

ثبت الموضوع من طرف
أم أســـــامة

04-02-2019

هاد الطارطا درتها اليوم فالعشية والله العظيم الى تسطات عليها خالتي وجارتي دارو معاي الكوتي
هاد الحلوة دارتها واحد صاحبتي وخديت من عندها المقادير والطريقة وجربتها
نخليكم مع الصور والمراحل

فالاول كنضرب اربعة البيضات مع شي ستة المعالق سنيدة و قبصة ملح

وكنضربهم مزيان

وهادو باقي المقادير
4 دراهم الشكلاط 3 خمارات نص رابعة الزبدة الدقيق على حسب تقريبا شي 14معلقة

كندوب الزبدة ونضيف ليها الشكلاط ونحركهم باش يبردو

كنضيفو الدقيق والخمارات ونستمروا فالتحراك و نصب الخليط فالمول مدهون بالزبدة ومرشوش بالدقيق وندخلها للفران

[IMG)
https://www.anaqamaghribia.com/pic/im…1wnme6z0ol.jpg[/IMG

مين كطيب الكيكة كناخدو معلقة كبيرة وكنخويو الوسط ديال الكيكة وكنحتفظو بديك العمارة ديال الكيك
من بعد غانقول لكم اش غندير بيها

كنخدو 4 بنانات مقطعين دوائر وكنستفهوم فقاع الكيكة

وهادو المقادير ديال الكريم

ربع لتر الحليب الكريم شونتيه 3 بسكوي طاكير او طانكو
انا صاحبتي دارت بيمو اوريو كيدير ب 8 دراهم للواحد ولكن ملقيتوش عند السوبر مارشي
كنطلع الكريم شونتيه ونخليها تبرد
وكنفتت بيمو نزيد ليه شوية الكريم من بعد ما بردات
والي بقات كنخليها هكاك
الصور غيوضحو ليكم

كنصب الكريم الي فيها البسكوي فوق البانان

ونبسطها ونخوي فوق منها الكريم الي بقات لي

هاديك العمارة الي بقات لي ديال الكيكة الي خويتها
فرتتها وزدت ليها شوية الشكلاط محكوك وخلطتهوم

وهوما الي زينت بيهم الكيكة من فوق كيجي المنظر رائع
كندخلوها للثلاجة تبرد ومن الاحسن تبات فالثلاجة
انا مع الزبة و موجتهاش بكري دخلتها للثلاجة غير واحد الساعتين وخرجتها
راه كتجي فالمذاق كتحمق و السر كولو فهداك الكريم الي بالبسكوي تواحد
مكيعرفها باش معمرة