محتاجة مساعدتكم فالشباكية الانيقات الله يجازيكم بخير

آ الحباب آ الصحاب راني جربت الشباكية لأول مرة هذا الصباح و راني مصهطة فالفراش من هول الفاجعة.أنا مزاوكة فيكم و اللي كاتعرف تصاوبها و كاتقنها تكتبلي الطريقة بالتفصيل راني شوهت ديك الشباكية مسكينة ،و نحكيلكم حكايتي: درت يا الغزالات فيها نصف كيلو دقيق،نصف كأس لوز محمر و مطحون و نصف كأس زنجلان محمر و مطحون،ملعقة نافع،ملعقة قرفة،نصف كأس زيت بلدية،نصف كأس زبدة مذوبة،نصف كأس ماء الزهر،ربع كأس خل،زعفران و بيضة باردة.المهم مابغاتش تعلك،درتها كويرات و بديت كانطلق بالدلاك و كانت كاتقطع،بديت كانخرصها و يا ريتني ما بديت غير كاندبز و صافي،شي صغير شي كبير شي غليظ شي رقيق،إيوا درتها تقلى تنفخو و تغمضولهم العينين و حصلت فالتلي على لبوزات.المهم في الأخير درتهم في العسل و دقتهم جاو كايقطعو بالحلاوة.إيوا هادي هي حكايتي.أنا مزاوكة فيكم ما تبخلوش علي.آه نسيت صاوبتها واحد العام أنا وماما جات ضربي بيها الراس يتفلق و هي ما تهرشس

---

lpjh[m lshu]j;l thgafh;dm hghkdrhj hggi d[h.d;l fodv

والله الحبيبة يما كنعرف لها لان اختي كل عام هي لكتصاوبها ولكن اش هدي نقولك حلوة ديال العظمة يلا تصبري عليا شي يومين نجيبلك الطريقة ديالها

شكرا أحبيبتي على الرد.فاش كنت فدارنا كنا غير كانشريوها،و فاش تزوجت غير لوايساتي اللي كايصيفطوها لينا.فالحقيقة كايصاوبوها غزالة ولكن هاد العام ما جاي حتى حد باش يجيبها معه.

1 كيلو طحين – كاس زانجلان مطحون – كأس ما زهر – ناس كأس زيت رومية – ناس كأس زيت بلدية – nass كأس خل- بيضا – معلقة ص قرفة – ناس معلقة نافع
نص معلقة ص حبة حلاوة – شوية خميرة معجونة- شوية خميرة كيماوية شوية د ملحة يوا جمعي خليط زيدي شوية ديال لما خليها قاسسحا و عالك مزيان و و قسميها كويرات مني ترتاح ل عجينة بداي تخدم و مني تسالي قليها محيت صيف دابا ترجاعلاك فيها لخميرا يلا خليتها بزاف خاص زيت يكون بزاف ف شي مقلة غريقة خاليه يسخن مزيان و رمي شي واحدة يلا شفتيها طلعت و تباوقات عرفها خامره و درها ف عسل مباشرة بعض ل قلي

اختي الى جات على خاطرك بدلي العنوان
راكي خلعتني

هاهم المقادير انا درت نصفهم في الماكينة باش تعجن مزيان ونقدر نكمل التشباك قبل ما تخصر العجينة احكاش انا غير بوحدي لي ساوبتها والشباكية تبغي المعاونة ياكو

المقادير
2 كيلو الفورص الدقيق-1 كاس الزيت تنخلطو البلدية مع الرومية-1 كاس الزبدة-زلافة اللوز محمر ومطحون-2 معالق نافع-معلقة القرفة-زعفران-1 كاس زنجلان مطحون-1 خميرة حمراء-شوية خميرة معجونة-شوية مسكة الحرة-ربع كاس الخل-نصف كاس ماء الزهر-ماء دافئ-زيت للقلي-عسل-زنجلان للتزيين

غادين نخلطو في الول المواد الجافة عاد السائلة وخاص العجينة ما تكونش جارية هي بالعجين باش تترخف

ثم تنقطعوها كريسات و نغطويها بالميكة ناخدو غير الي نستعملو تندوزوها في ماكينة سباكتي الى عندنا اوتنطلقوها غير بالدلاك تنقطعو مسطيلات والصور تشرح اكثر

بالنسبة للتشباك تنديرو 4 ولا5 خمسة ديال خطوط و من الافضل 5 باش تجي الوردة غزالة تناخدو الثالت تنديروه فوق اللاول و الرابع فوق الثاني و تنلصقو لقنث مع لقنت و نحلو الوردة تنقليوها في الزيت خاص تكون كثيرة و نعسلوها وتنسقطروها ونزوقو بالزنجلان والى ما فهمتوش انا معاكم و الي جربتها ترد عليا الاخبار ودعيو معايا

شكرا أ حبيبتي بزاف.واش فاش نطلقها بالدلاك نرققها بزاف ولا شنو حيت فاش قليتها جات غليضة ؟

الله يرحم الوالدين على الإفادة.المشكل فالتشباك ما عرفتش كاع

أختي سمحيلي ولكن ماعرفتش نبدلو

حبيبة حاولي بشوية بشوية و لا ماعرفتيش تشبكيها ديرها على شكل وردة بحال لي حاطة الاخت ايمان فمنتدى رمضان راه الموضوع مثبت هانتي دخلي و تشوفي اكثر
و غير ماتقلقيش احبيبة كون تشوفي فضيحتي انا اول مرة درتها
غير بشوية عليك و ما تعصبيش اختي و هي سرها الزيت بلدية و الزبدة راه هما لي كيجيبوها هشيشة اختي
و طبعا البنة كتبقى فالقوام
و عنداك تنساي ماتغربليش اللوز احبيبة
الله يوفق اختي و الله يسر الامور يا ربي امين