التصويت على المواقف المطروحة بمسابقة اطرف موقف

الموقف الأول : محبة رسول الله

انا نبدا معاكم بواحد الموقف وقع لي ماشي بعيد بزاف
لمهم واحد النهار كانت عمتي دارت سبوع لولد ولدها وعرضات علينا بيني وبينكم الدجاج داك النهار كان بنيييييييين المهم مع واحد جارتها كانت ولدات شحال هادي وانا قلت مع راسي لابد من البياض ايلا لقيتها عند عمتي المهم خديت واحد 100 درهم من الصاك ودرتها فجيب جلابة باش ايلا تلاقيتها نعطيها ليها وانا تنسلم عليها حشومة قدام الناس يعرفو , وفعلا سلمت عليها اش خبارك افلانة واش خبار ولدك الى اخره من الاسئلة اللي فينا حنا العيالات , منين بغات تمشي لدارها سلمت عليها وعطيتها فايدها وهي تحلف وانا نحلف قلت ليها بياض ولدك حشومة هههههههه
ايوا ومنين سالا سبوع بغيت نمشي درت ايدي فجيبي نجبد كلينيكس لبنتي ولقيت 100 درهم باقا فبلاصتها , وهنا الصاعقة وبقيت مصدومة اشنو ندير سيفط عمتي عيطات عليها وقلت ليها ربي ايلا ما سمحي لي راني غلط كنت باغا نعطيك ياعرفت اش عطيتك , قالت لي عطيتيني مسيكة ههههههههه وبقيت تنضحك حتى بكيت بالدموع وفالاخير تصلح الموقف
هدا ما وقع

الموقف الثاني : نجمة البيضاء

ملي كنت صغيرة كنت فضولية ونبغي نعرف كلشي
ومن الحويج اللي كندكر واللي كليت عليهم طرحة ديال العصا واحد النهار كان في عمري تقريبا 6 سنوات وكنت كنشوف الاب ديالي كيحسن اللحية ديالو بجيليت وانا بقيت كنشوف فيه غير حطها وخرج انا هزيتها بقيت نقلب اشنو نحسن مبان لي غير حجباني كرطت حاجب وخليت الاخر ههههههههههههههههههههه
ملي بان لي راسي زبلتها درت فولار ونزلتو على عيني وكان واحد العرس في الحي دخلت نتفرج واحد النقيمية صاحبت ماما قالت لماما مال بنتك كانت في الحمام قالت ليها ماما لا معرفت مالها دايرة الفولار ومنزلاه على راسها وهي تقلبني ولقاتني مزبلاها حاجب ايه وحاجب لا بقات تضحك وقالت لماما اجي تشوفي هههههههههههههههههه
والله كليت طرحة ديال العصا وبقيت مدة تحك لي الثومة باش ناض الحاجب هههههههههههههههههه
المشكلة دابا فينما كنشوف جليت كنتفكر هد الفعلة وكنبقا نموت بالضحك

الموقف الثالث : الخالة نجاة

كان الاخ ديالي الصغير باقي كيرضع البزولة لان امي عمرها مارضعتنا بالرضاعة كان تبارك الله الخير كترضعنا وترضع اولاد الجيران المهم الواليدة كالسة هي والاب ديالي الله يرحمه وحاطة طابلة وكتقطع فاللحم للقطبان وبدا خويا كيبكي على البزولة وكان كيقول ليها زوزولا ههههه وهي مامسالياش ليه وانا نهز الفولات ديال الحولي او لمداكر كل واحد واش كيسميهم ودرت ليه وحدة في فمه وقلت ليه يالله رضع زوزولا والواليد جالس الدري سكت وبارك يمص يمص حتى حليب مانزل تلفتت امي بغمزة من الوالد الله يرحمه وماعرفتش التصرفيقة منين جاتني توضرت على الباب باش نهرب وتبعتني صندالة وكلمة سيري الله يمسخك وانا راه ماكنتش عارفة اشناهوما ههههههه وخويا راه دابا عنده 4 ديال الاولاد تبارك الله

الموقف الرابع :إلــــــــــــهام أم ســــعد

سلام عليكم
بسم الله الرحمن الرحيم
وحد نهار كنت خارجة بعد صلاة العصر ، وهو يبان ليا وحد راجل عجوز بزززاف وقليل الصحة مي لاباس مزيان ونقي مشاء الله وواقف وسط ممر اللى كنت ماشية فيه
وكان مكان قريب من محل كيبيع التلاجات والات الغسيل وما شبه
مهم راجل مسكين بقا فيا وانا نقول ليه واش تبغي تڭلس ما جوبنش حرك غير راسو صافي
وقبطتو من إدو وهي تبان ليا وحد الكرطونة د التلفزة كبير قريبة منا
وحنا نمشو ليها وقولت ليه ڭلس هنا ترتاح شوية بقا ما كملاتش الجملة حتى ما جبرتش السيد بين إديا لأنو نزل كلوووووووووووووو في الكرطونة بقو كيبنو غيررجليه والعكز ديالو
وراسو صبح التحت
هههههههههههه
مبقتش قادرة نمسك نفسي من ضحك باش نجبد راجل من الكرطونة
مهم في نفس اللحضة جا واحد الراجل ومعه وحدة سيدة وانا مازال كضحك وكنساعد فيهم باش يجبده وهو يتزاد علينا وحد الشاب وناس بدو يتجمعو وما فهمو ولوووووووووووو انا كنضحك وراجل في كرطونة
مهم راجل وهو مازال مخشي وما كيبان غير رجليه وهو يبدا يقول
عـــــــــــــــلى الله عــــــــــــلى الله عـــــــــــــلى الله ومخرج إدو من الكرطونة لما بانت ليه الجوقة د الناس
وتمكا صاااااااااااافي وأنا نفجر كتروكتر بضحك وحتى دموعي نزلو وحتى من ناس بقو يضحكو من شدة المنضر
في صراحة لكلام ماشي فحال اللى شفتو المشهد
كان خطير للغاية
كنت غادي نقتل الراجل غير بالضحك
ههههههههه
الله يسمح ليا

الموقف الخامس : حنانoum ayoub

واحد نهار دخلات لوليدة ديالي دوش على صبآآآآآح بكريييييييي وكانت كتلغالي باش نحك ليها دهرها إيوى أنا كان فيا لموووووووووووت ديال نعاس قتلها أنا جايا ودآآآآآتني عيني وملي دربتني لفيقا مشيت كنجري لدوش عينيا عاد مغمدين وبقيت كندفع فلباب وداك شي كيدفع من داخل وهو لواليد الله يرحمو كان دخل منوراها هو يدفع وأنا ندفع هو كيقولي سيري عند مك راها فلبيت وأنا نقوليه خليني نحك ليها ظهرها هههههههههههههه حتى غوت عليا بجهد وأنا نحل عينيا نيشان مشييت كنجري عند لوليدة كنموووووووووت بضحك ههههههههه هاد الموقف عمرو ميتنسا ليا

الموقف السادس : wiames

انعاود ليكم واحد الموقف طرالي مع استاذ الفيزياء.
كنت ف 6ème année, هاد الاستاذ كان معروف عليه صعيب, كينوض للصبورة على غفلة وادنى خطأ, ميخليش لينا بالسبان والمعيور, مني كتسالي ساعتو, اووووف عاد كنطلعو النفس, وكان ديمااااا بنفس اللبسة صيف وشتاء عمرو بدلها تنهار وقعت الواقعة هههه…
المهم واحد النهار تغيبات استاذة العلوم وباش يخرج مع 16h, جمع الافواج بجوج والقسم عمررر, وضطرينا نجيبو طاولات, حينت البياس مكفاناش, وانا وصحبتي جلسنا فطاولة مقابلة مع الباب, بدا الدرس وكالعادة جا داك السيد المكلف بالغياب والاستاذ عمر الورقة, مني جا يمد الورقة, بانتلي الجاكيطة ديالو فيها واحد مولاتي تشريكة قداشنيهية, درت فصاحبتي بزربة قلت ليها وييييحااااا شوفي على تشريكة عندو فالجاكيط, مجيت فين ندور تلقيت واقف علية وكيشوف فية, نريييييييي ههههههه, قالي: هادشي اللي حاضيين, حاضيين غير التبركيك, انا تكوووووفرررت فبلاستي, صاحبتي جاتها هستيرية ديال الضحك والتلاميذ تحد مفهم الموضوع من غيرنا ب3, هههههه, مشا من حدايا وطلع للصبورة وهو يقولي "هاد اللي حاضيين, حاضيين هير التبركيك" المهم لباس اللي مطردنيش وخرجات بسلام هههههه
من داك النهار, والله العظيم, عمرو مجا بديك الجاكيط وولا كل خطرة جاي بلبسة ههه, سبحان الله.

الموقف السابع : أم عبد الرحمان7

المهم انا درت العقد قبل من العرس ب 4شهور و حملت ومن بعد العرس كاينة العادة ديال المخفية ما عرفت اش كيسموهاالمناطق الاخرى المهم كيفورو فيها الكسكس كيديرو معاه العسل و الزبدة ذايبين فزلافة فالوسط. و كيغطوك انتي و راجلك و شي واحدة بايزار و كتعطيك تاكلي من ظهر ايدي…. اختكم دارت ديك الضغمة فمها و ما بغاتش تسرط ليا كنمضع كنمضع والو ومع الوحم شوي ما نرد ليهم فوق القصعة راجلي اللي عاق بياحيث حتى واحد ما عارف واش حاملة و شير ليا نوض نمشي للتواليت الناس جالسين وانا نايضة كنجري للتواليت باش نرد حاشاكم ما فهموا والو وان حشمت ومركت

الموقف الثامن : m_fatiha1

نعاود ليكوم واحد الموقف حتى أنا جرى لي ملي كانت عندي شي 13 عام, واحد النهار كنت غادة بالخبز للفران أ دايراه فوق راسي بغيت نختاصر زعمة الطريق دزت من واحد العرصة طار ليه الزرب أ بقاو غير السلوكا أ ولاو الناس يدوزو منها باش ما يطولوش الطريق, المهم باش دوزي من تما خاصك حتى تحناي واحد الشوية لحقاش كاين السلك علاش تاي وقفو الزرب داكشي لي درت نيت دزت خرجت للشارع غادية للفران زعما أ هي تعيط لي واحد المرأة جاي من الطريق الرئيسية وقفت نشوفها أشنو بغات قالت فين غادية, قلت ليها للفران, قالت أ فين هو الخبز باش غادية جيت نشوف لقيت غير الوصلة هي لي فوق راسي أ الخبز بقا معلق في السلك بخبزو رجعات معايا مسكينة لقيناه للأسف وصل للأرض أ عمر تراب, جمعتو أ رجعت للدار أ عاودنا خبز أخر, من تما وليت نطول الطريق على سعدي أ وعدي هههههههههههههههههه

الموقف التاسع : berrada.chems

حتى انا بغيت نعاود ليكم واحد الموقف طرا ليا نموت ومنساه اول مرة غادي نركب في طيارة طلعنا بركت في بلاصتي جات واحد سيدة بركات حداية انا كنت حاملة غي طلعت طيارة وانا نعس اوا شوية فقت لقيتهم جابو الاكل والسيدة لكانت حداية مكايناش كليت حقي وكليت حقها ومسحت ايدي وهي تبان ليا لمرة جايا كانت غي في الحمام وانا كيصحاب ليا راني برزتها ملي نعست ومشات لبلاصة اخرى عرفتي ملي شفتها تصرفقت هههههههههههه حتا من الما مخليتوش هههههه ومسكينة بقت غي كتشوف وانا حشمت ورجعت نعست هههههههههههه

الموقف العاشر : touria hafid

أجيو تسمعو الموقف الي حطنا فيه خويا الصغير واحد النهار الوليدة بغات تمشي الحمام ودات معاها خويا كان يله يتعلم يهدر وملي تحمم خلانا حتى تجمعنا على الطابلة وقلنا في الحمام كاين بزاف بزولات ههههههههههههههه هو كان كيقولها زيزة وقالنا بزاف ديال زيزات وعرفتو انا وخواتتي احشمنا قدام اخوتي لولاد بقا كل واحد شاد الضحكة ديالو