مستحضراتي التجميلية المتواضعة

فوقاش دخل للقصر ؟ البارح ف العصر ههههه هادي كاتنطبق عليا ، انسانة راكبها العكز من راسها لرجليها و عاد بديت ندير النفس هاد الشهر ، ايوا وشفت البنات كايحطو المستحضرات ديالهم ، تبارك الله عليكم و جاتني الغيرة هههه قلت و الله حتا ندير النفس حتا أتا و نبدا نتهلى ف راسي و المشكلة ان المستحضرات عندي و ما كنتش كنستعملهوم ، المهم بلا ما نزيد نطول ، ها هو داكشي اللي قسم الله

بسم الله نبدا بمستحضرات العناية بالشعكاكة

من اليسار الى اليمين : شامبوان Elsève ، هادي تقريبا عامين و انا كانغسل بيه هو و الماسك دياله ، وافقني بزاف و كايخلي ملمس الشعر ناعم و لامع
هاديك القرعة الصفرا ، سيروم زوين ديال لوريال ، كنت شريتو من بعد ما وصاتني واحد الكوافيرة الله يجازيها بالخير
و هاديك القرعة الاخيرة سيروم ديال أملا ، عاد خديتو حتا هو زوين ، الا بغيتو تاخدوه سيرو لمرجان حيت صحاب الماكياج عندهم غير التقليد ماشي الأصلي

مستحضرات الدوش

من اليمين الى اليسار : القرعة الكبيرة الصفراء بان دوش رائع عجبني بزاف و ما غاليش ، سلعة ديال الشمال و لكن كايخلي الجسم رطب و ريحتو زوينة
هاديك neutrogena كوماج و لكن ما عجباتنيش بزاف
القرعة الثالثة بان دوش حتا هي من Yves Rocher ناااري ريحتو شحال زوينة ديال الفاني ، عاد خديتو و عجبني بزاف
هاديك naturalia ديال الكوماج زوينة حسن بزاف من neutrogena
و المنتوج الأخير ديال المنطقة الحساسة ، قمة الحيوية و النشاط ههههه

الكريمات

من اليسار الى اليمين : العلبة الدائرية الصغيرة كريم ديال الورد كنستعملها لرجلي كترطب و كتحارب التشققات
Garnier لتبيض البشرة ، ما بيهاش ، كنديرها ف الليل حيت الا درتيها و خرجتي وجهك غايرجع زيتونة
Nivea démaquillant الحبيب ديالي ، فيه حلبيب و ديماكيون ، كايرجع الوجه صافي و منور
كريم للجسم ديال yves rocher عاد شريتو ، من الاستعمال الاول بانلي زين
Le petit marseiller كريم لليديدات ، رائع بمعنى الكلمة

ماكياج

أول حاجة طبعا ماء ورد
من اليسار الى اليمين : بودر ديال أوريفلام ، ما عجباتنيش بزاف
كريم الأساس ( fond de teint) من أوريفلام سميتو giordany زوين و ما كايبانش باللي دايراه
بلاشر ( فاراجو ) ديال أوريفلام حتا هي ، زوينة غير خاص تختار اللون و الدرجة اللي تناسبك ، أنا عندي الأورانج حيت ماشي بيضا و ماشي سمرا
Mousse Maybeline معروفة و غزالة بزاف

أقلام العين

قلم ابيض ، قلم أسود هو هاداك الصغيور ، من أوريفلام ، قلم ازرق من bourjois زوين زوين زوين ، و آي لاينر ما حملتوش و ما بقيتش كنستعملو

Anti cernes

هادو anti cerne من أوريفلام و correcteur جاني كادو زوين و كايخفي عيوب البشرة

الماسكارا

الكحلة ديال اوريفلام و الثانية ديال مايبلين

و اخيرا العكاكر و الغلوس

ايوا هادشي اللي عطا الله ، ماشي شي حاجة غير دعيو معايا ندير النفس وما نعكزش على راسي

في امان الله