موضوع للنقاش ~~المولود الثاني~~

السلام عليكم ورحمة الله وبركاته

اتمنى ان يلقى موضوعي هذا تفاعل من طرف الامهات كي تعم الفائدة

جميع النساء المتزوجات كيحلموا يصيروا امهات..مع قدوم ط§ظ„ظ…ظˆظ„ظˆط¯ الاول تعم الفرحة الجميع..لكن طفل واحد ما كافيش و كنفكرو من بعد واحد المده باش نخاويوه و لكن…..

عندي بعض الاسئلة يا ريت كل وحدة في الامهات تجاوب عليها بصراحة:

1-واش ملي ولدتي مولودك الاول كانت عندك فكرة الحمل للمرة الثانية واردة في راسك???
2-واش ملي قررتي تحملي واش جاء قرارك بعد دراسة للميزانية و الحالة الاقتصادية و لا نتي كتقولي معا راسك~الولد اللي كبجي كيتزاد برزقو$$$$?
3-شحال المدة الزمنية اللي درتي بين الولادتين????

كنتمنى موضوعي يلثى تفاعل..انا عندي بنية في عمرها عامين لكن وضعي المادي و العملي مخليني كنتردد و نفكر الف مرة قبل اتخاذ القرار.الوقت صعابت و غير بنتي بوحدها كنخسر عليها 1300 درهم في المدرسة و 700درهم بين الحليب و ليكوش و شمبوان و صابون..ناهيك ع الطبيب و الحوايج

---

l,q,u ggkrha ZZhgl,g,] hgehkdZZ hgl,g,] hgjhkd

او 6 مشاهدة بدون رد!!!

هو الإنسان مخصوش كلشي يدرسو بالورقة وستيلو إلى جينا على هاكاك را منديرو حتى حاجة فحياتنا والأرزاق بيد الله ولكن فنفس الوقت لا ضرر ولاضرار يعني الإنسان مشي يشوف راسو ضروفو صعيبة ويبقى كيسربك فالأولاد والإنسان ممكن يباعد مبينات الولادات يعني حتى كيفوت واحد مرحلة الحليب وليكوش عاد يزيد لاخور والمدرسة ممكن يدخلهم المدرسة على قدو وكلا واحد وعلى حساب ضروفو أنا ولدي عندو عاماين و4 شهور ومزال مكنفكرش نولد دابا لان المسألة ماشي غير مسألة إمكانيات مادية أنا بالنسية ليا كلا وليد خاصو ياخد الوقت ديالو فالرعاية والحنان ماشي شي فوقمن شي كتولي المرا غير معصبة وكتغوت هادا ماشي جو ديال التربية كتجني على راسها وعلى ولادها وحتى الله راه حدد فترة عاماين للرضاعة يعني فديك العاماين مكاينا ولادة ومناين تفطمو عادتخرج تولد حتى الوليد تكون عندو 3 أو 4 سنوات فكيكون واحد الشوية الفرق أنا هدا رأيي

انا معا هدا الرإي;
بالنسبه ليا انا اعيش المعاناة ولدي عندو عامين و تسع شهر و بنتي إحدا عشر شهروالحمل دايال بنتي داز عداب نسيت فيه ولدي انا حملت بالخطا والحمد لله وانا خدامه و ماكينش لي شد ليا ولادي والمصاريف بزاف وعاد انهم واخدينش حقهم من الحنان والوقت كل نهار تقريبا تنبكي مني تنشوفهم باغين يبقاو لعبو معايا وانا مهدوده وخصني نطيب و……

اختي الدراري ديال هاذ الوقت صعابو انا ولدي التان ولدتو عند بنتي الاولى 4سنين ونصف ومع ذلك ماشي انا اللي بغيت غير حبست الفانيد ضرني وماشدش ليا الحساب
ومن موراه ولدت الثالت بينو وبين التاني عاااام المعانات ديال المعقول ماديا الحمد لله ماشي بزااف غير هو انا ولا فيا العصاب وليت غير كنغوت حيت الصغير جا صعيييب بزاف ماينعسش مزيان
انت اختي دبا بنتك باقة صغيرة عيشي معاها هاذ الفترة الزوينة وماتسمعيش راي اللي يقول لك ولدي ولادك يكبرو معاك راه العذاب اختي والمرض خصوصا الى كانو الوليدات واعرين اما المادة كل واحد وظروفو وهو كيكون ادرى بها وربي اللي كيرزق

حتى انا اختي بنتي عندها عامين انا دابا حاملا فالتاني يلاه عندي 3اشهر الحمل ديالي مكشن مخطط ولكن الحمد لله على كل حال حنا ولله الحمد الحالة المادية مستورين غير حسيت براسي مارتاحتش مزيان رضعت بنتي عام ونص وملي ولا عندهت عامين حملت جاتني بحال الى زربت وزيد عليها هدا هو العام التاني عندي فلافاك ماعرفت كغاندير ليه المهم الله يعاونا ويسر لينا

السلام عليكم أختي أنعود ليك تجربتي هههه
أنا مني تزوجت داز تقريبا عام عاد ولدت ولدي الأول الحمد لله دازت الأمور مزيان وبالنسبة لفكرة مولود ثاني أنا كانت عندي قبل مانتزوج هههههههه كانقول نولد 3 لوليدات إلى بغى الله
من بعد 4 سنين ولدت ولدي الثاني دابا عندو عام و4 شهور لكن مكانفكرش نزيد دابا حتى دوز واحد 3 سنين إن شاء الله لأني كانولد بالفتيح
وبالنسبة لجانب الإقتصادي فالوليدات كايبغيو المصروف كسوتهم مالتهم لعبهم عاد مصاريف المدرسة المهم الرزق عند الله الإنسان غير يتوكل على الله ويحسن الظن به أيد مايخيبوش والوحدة هي اللي تعرف كف تسير أمورها الزواج مؤسسة إلى عرفتي كيفاش تسيريها أكيد أتنجحي

انا نقول لك رايي انا بنتي قبل مانولدها كنت تنقول بغيت 2 وليدات سوا ولد و بنت او 2 ولاد او 2 بنات عادي، من بعد ماحملت ببنتي كنت باغاها بزاف ماكملت العام حتى حملت الحمد لله، المهم هي اول حفيده الكل تبغيها و عزيزه بزاف عندنا كاملين و حيت ولدت الفتيه و تعدبت شويه من مورا الولاده الحمد لله، و بنتي ماعند معها حتى مشكل ماسهرتني ماوالو و معاونيني دارنا عليها بزاف، اما المصاريف مانهضروش عليها كنت تنشري حليب تقريبا 23 او 25 اورو تدي لي نهار و نصف، اما اللباس كل شي تشري لها بزاف و لحد الساعه تنعطيها حليب الفرمسيان ولكن شكل اخر ،والحمد لله معاونين كاملين عليها ماما خوتي بابا راجلي خالاتي خوت راجلي خالي الكل تشري، الولاد الى قلت لك باغه نزيد ولكن ماشي دبا حتى تكبر بنتي شويه، ولكن واحد الحاجه بغيت نسول الاخوات عليها ، انا بنتي من كتر ماعزيزه علي مابغيتش نولد غير باش مايجيش شي واحد ياخد شويه من معزتها، و حتى دارنا مابغاونيش نولد حيت خافو لانمرض وتقولو لي بحال ياسمين ماكينش اللي ياخد بلاصتها

ولكن انا رايي ضروري الواحد يفكر في مستقبل داك الولي ماشي غنبقاو نولدو و حنا ماعندنا باش نشريو ليكوش او لحليب، خاص سكن لائق، خاص فلوس التطبيب، خاص مستقبل، را غير الالعاب راهم ميزانيه كبيره، را كاينه مصاريف ، عاد الانسان خاصو يكون مستعد لهم ماشي واحد ديما معصب و يولد يولي مساكن دوك الولاد غير يبرد فيهم غدايدو، و تاني خاص الام و الب يكونو مفاهمين ماشي هما ديما الصداع و يزيدو الولاد مساكن يعيشوهم في المشاكل لا، الولاد راهم مسؤوليه كبيره خاصنا نكونو قادرين بها

شكرا اخواتي لتفاعلكن