لأول مرة فحياتي كنحس بالنقص

السلام عليكم
الصراحة من بعد الله سبحانه و تعالى نتوما الملجأ الوحيد ليا اللي كنبغي نخوي فيه قلبي و نفضفض بكل ما كيدور في خاطري
بلا ما نطول عليكم غنعاود ليكم بخلاصة شنو وقع ليا أنا كنت واحد الإنسانة مرحة ما كنعرفش شنو هي التقليقة و لا اكتئاب و كانت شخصيتي قوية الحمد لله و دايرة بلاصتي المهم دابا عام و الزيادة تجوجت الحمد لله عن حب و مفاهمة مع راجلي و لكن طريقة تفكيره في الدين غير طريقتي هو متعصب و أنا متفتحة هادا المشكل الأول الحاجة الثانية أن خدمته على قد الحال و هادشي قبلت بيه النهار الأول و حتال دابا حامدة الله و شاكراه و لكن تخيلو معايا خلصته 2200 درهم كتمشي منها 1300 درهم فجوج كريديات بلا ربا الحمد لله باش فرشنا الأساسيات فالسكنى اللي عاطينا دارهم و ديك 900 درهم فيها ما و ضو و مركوب ديالو للخدمة و مصاريفنا بجوجنا مع العلم أنني حاملة و الحمد لله كنبريكوليو فالدار ب الحلاوي د العراسات و لكن ماشي دائما و أنا كنت خدامة و لكن كنت مرضت و كلست من الخدمة المشكل أننا ما كيبقاش لينا باش نفكرو فالكماليات يعني اللبس ولا الخروج أو الماكلة على برا و الله ما نكدب عليكم إلى جوج عبايات اللي شريت ملي تجوجنا مازال كنبدل بيهم حتال دابا حيت ما بغانيش نلبس الرومي من بعد و هادشي والله ما كنكولو باش نكسب الإستعطاف بالعكس حنا عايشين غير بنفسنا و كرامتنا و ثيقو بيا إلى كلت ليكم لا عائلتي لا عائلتو عارفين بلي عندنا هادشي ولا كنتخلصو بهاد القياس و اللي خلاني نبدا نحس ط¨ط§ظ„ظ†ظ‚طµ هو هادا وليت كنكره نتلاقى بالناس اللي كنعرف أو نختلط بيهم حيت ديما كيشوفوني بنفس الحوايج و وليت مفرطة فراسي بزاف كنبان فحال شي مرا شارفة و وليت مكتأبة
أنا تعمدت ما نكتبش موضوعي فبلاصة المشاكل الإجتماعية حيت أنا محتاجة فعلا حلول نعاود نطور بيها راسي من جديد و نبدا الخطوة الأولى في تحسين الدخل لأن مشكلتنا بالأساس مادية و أنا الحمد لله عندي طاقة كبيرة و مؤهلات و لكن ديما كنخاف من الخطوة الأولى هادشي غير قلت ليكم غنختاصر هههه سمحو ليا و شكرا

---

gH,g lvm tpdhjd ;kps fhgkrw lg,g

السلام عليكم اختي
نتمنى من الله يتمم لك حملك بالخير
اول حاجة طبعا هي الحمد لله على كل حال مزيان ان الواحد افكر اطور من راسو و يبحث على مكسب رزق حلال هادشي علاش انا متنسميش للي نتي فيه نقص بالعكس نتي الحمد لله بصحيحتك و براجلك و دارك و هادو راهم نعم ناس خرين كيتمناوهوم و لكن انتي دابا كتقلبي باش تحسني الوضع ديالك
اختي بما ان الارزاق بيد الله فانت قبل ما تقومي باي خطوة طلبي الله و ادعيه بألحاح قومي الليل و تنصحك بمأ نك دابا كالسا في الدار علاش متجربيش تخدمي في الانترنيت راه كاين مواقع خاصة بالعمل عن بعد حاولي تقلبي عليها و توكلي على الله و اي خطوة صلي فيها صلاة الاستخارة باش تطمئني و متبقايش هازا الهم بزااف راه نطلعو نزلو كا ندو غير رزقنا
الا كانو عندك معارف بزااف من جيرانك بقاي تجيبي ليهم سلعة و تاجري معاهم بالتقسيط هادشي او الا كانو عندك جارات امهات موظفات تقابلي ليهم دراري كمربية اطفال و نتمنى من الاخوات افيدوك كثر و الا بغيتي تبداي اي مشروع استاشري مع الاهل ديالك باش يوقفو معاك
في امان الله حبيبتي و دعواتي لك بالنجاح في حياتك

اختي ربي يسر امورك ويرزقك من حيث لا تحتسبين،،،،، مععندي باش نفيدك كنتمنى الاخوات يفيدوك

ان شاء الله تنوضي بالسلامة من النفاس وتفكري مزيان كيف تبداي من جديد حياتك العملية
لاتقلقي بزاف دازو بحال هد الوضع وربي حن عليهم ديري رجاك فالله
لي عجبني فيك روحك المعنوية خليها ديما عاليه

شكرا أختي على ردك و فعلا كنحمد الله على بزاف د النعم ناعم عليا بيها و ما كنعتارضش غير وكان أنت فهمتيني أنا غرضي نحسن وضعنا المادي حيت راجلي داير كتر من جهدو و لكن الغالب الله و بالنسبة للعمل ما كنفهمش فشي حاجة من غير الطياب و الحلوة و باش نبدا هاد المشروع خاصني المعارف و لكن من سلبيات الوضع اللي أنا فيه علاقاتي ولات محدودة شفتي هادشي شحال مرون ههه

شكرا أختي را غير هاد دعوة فيها لخير و البركة و ما كين ما حسن منها

لهلا يخطيك أختي و بنادم شنو كيسوا بلا إرادة و روح معنوية قوية شكرا على تشجيع

الله ايسر لك امورك هدا الشي باش نقدر نفيدك

السلام عليكم
الالتجاء الى الله هو اول الحلول فالله تعالى هو الرزاق ثم ياتي من بعد ذلك السعي الى الحلول الاخرى اختي علقي قلبك بالله معمرو يخصك شي خير
الله افتح ليك ابواب الرزق ويرزقك من حيث لا تحتسبين ويغدق عليك الرضى والسعادة في الدنيا والاخرة وكل المسلمين والمسلمات

امين يا رب و ييسر لجميع لمسلمين شكرا على الإهتمام