واش حتى انتوما كتعانيو من هاد المسألة مع وليداتكم ، أحب ما عندنا فحياتنا :)

هادي مدة وانا حايرة مع المشكل ديال الماكلة لي كيديو وليداتنا معاهم للمدرسة ، سميتها مشكلة لأنها فعلا مشكلة كنواجهها كل نهار وماكنكونش راضية على شنو كنوجد لوليداتي

ندخلوو لصلب الموضوع، عندي بنتي مازال ف la moyenne section، وكنصوب لها الغديوة ديالها كتاخدها معاها فالصباح ، المدرسة لي هي فيها فيها la cantine ، ولكن أنا عارفة الماكلة ديال بنتي ماكتبغيش تاكل بزاف ديال الحوايج ، + ماكنتيقش ، كنخاف تمرض أو أو ….. ما علينا

طلبي هو أن الأنيقات ديالنا يتفضلوو ويقدمو لنا شي وجبات للصغار لوجبة الغداء ، لي تكون عملية وكيحبوها الصغار

نبدا بنفسي ، الوجبات لي كنحضر هي أساسا :

طبق أللحميات : كفتة ، داند عادي أو معمر بلفرماج ولاداند فيمي ، دجاج ، سوسيس ، حوت : إما مشرملين وطايبين مع بصيلة أو غير مشحرين مع لاشابلير فشوية ديال الزيت

المعجنات : الأكترية ابلي مع مطيشة وكاشير مقطعين ، أو بطاطا فريت ، أو بطاطا مسلوقة مشرملة، سباغيتي ، أو les pattes ، وغالبا ماكتالهومش

مرة مرة بطيبيتات معمرين + بيتزات صغار

سلطات : مطيشة + كاشير + زيتون مقطع ، أو لوبيا خضرة مشرملة وهادي قليل فين كتاكلها لي !! صافي هاد 2 أنواع لي كتاكل فقط فقط

كنبغي ندير لها شوارما ولكن منين كتبرد كتولي حالتها حالة، وبالتالي ماكنديرهاش ليها

اوا ماكرهتش الله يجازيكم بخير انكم تنزلو أفكاركم باش نكونو مع وليداتنا ، يكفيهم التكرفيس ديال الفياق إبتداء من هاد السن ، ايوا ننوعوو لهم شوية فالميكلا ديالهم فالوقيت لي ماكيكونوش فيها معانا