نصائح للامهات الجدد حسب خبرتي المتواضعة.

اللهم صل على محمد وعلى آله وصحبه أجمعين

حبيت نكتب الموضوع من تجربتي الخاصة في تربية ولادي واتمنى ان الامهات الجدد

يستفدن.

اول حاجة مللي تدخلي في الشهر السابع ضروري توجدي الحقيبة اللي غادي تاخذي معاك للكلينيك او مكان الولادة.

تعملي فيها 3 تبادل ليك بكل لوازمها و 4 للبيبي بكل لوازمها.

ماتنسايش تشري الفوط الصحية كبيرة الحجم الخاصة بالنفاس كيكون مصور فيها الفيل.

وحاولي تجتنبي اولويز لان فيها مواد كيميائية خطيرة.

بعد ماتولدي بالسلامة وتبغي تخرجي ماتهزيش انتي التربية خلي ماماك او الزوج يهزو لانك انتي مريضة يللا تهزي راسك.

مللي توصلي لدارك قولي دعاد الدخول وسيري لسريرك ارتاحي وحطي ولدك او بنتك في الكونة ديالو

هذي نقطة اساسية اخواتي عمركم ما تحطو ولادكم حداكم في السرير لان النعاس خو الموت كيفما كيقولو يمكن ليك تقلبي وتعفسي عليه لا قدر الله.

اللهم تحطيه في كونة صغيرة قابلة للحمل وتحطيه حداك.

العناية بالبوط ضرورية ديما الدوا لحمر وفاصمة معقمة فوق منه عاد لكوش.

وقبل مايطيح البوط ديما فوطة مبللة ومسحي ليه داتو كاملة وخصوصا تحت العنق والثنيات.

بعد ما يطيح ليه البوط خص الدوش كل صباح..من بعد رضاعة الصباح الباكر ومللي توصل الساعة مابين 8 و9 عمري سطل بالماء الساخن ومن الافضل تعبري بالتيرموميتر بدرجة 37 .

حطي البانيو ديال البيبي في بيتك في الارض فرشي فيها شي قلع بلاستيك
وقفلي الباب والسراجم وحطي حداك سطيلة بها ماء نظيف للتشلال.

فوق السرير وجدي فوطة التربية مفتوحة وحداك كل الملابس ديالو واجدين.

زولي للتربية الحوايج بشوية ودخليها للبانيو اللي فيه ثلاثة ارباع ديال الماء.

يدك اليسري دائما تحت الرقبة ديالو ويدك اليمني هي اللي خدامة

تكوني من قبل فزكتي الخرقة الرطيطبة ديالو ودهنتيها مزيان بالصابون باش مللي تجيبي التربية تعاود تغطسيها ثاني في الماء باش ترغوي

دوزي عليه كامل وانتبهي للثنيات: تحت الابط بين الفخدين وخاصة العنق.

كنفضل عدم استخدام الشامبو لان به مواد كيميائية غير الصابونة الطبيعية كافية للشعر.

ومللي تخوي الما انتبهي لا يمشي ليه لوجهو ويتخنق لا قدر الله دائما كبي الماء من الامام للوراء في الراس.

مللي تسالي شللي بالماء النظيف اللي حداك وهزيه بالزربة وحطيه في الفوطة وسديها عليه.

عاوني بفوطة اخرى لمسح باقي الاجزاء في حالة كانت الفوطة الاولى صغيرة.

لبسي له حوايجو وانتبهي للطياب ديال الكوش.. الا لقيتي المؤخرة حمرة استعملي

كريم مرطب او بومادا او زيت اللوز..افضل بومادا في نظري هي ميتوزيل.
في حالة ان الطياب مابغاش يمشي بدلي ليه نوعية الكوش وبصراحة بامبرز هي اسوء كوش وكلها مواد كيميائية لانها كلما قالو

كتشرب اكثر كلما زادو ليها المواد الكيميائية وهذا نفس الشي للفوط الصحية النسائية.

احسن حفاظة للاطفال في رايي هي toujour وصي عليها اللي كيبعيو الكوش ومواد التنظيف هما اللي كيجيبوها.

ماتنسايش تمسحي لودينات وتنقي الانف الا فيه شي خنونة :p

من بعد مالبستي الحوايج شبعيه حليب سواء صدرك او حليب الصيدلية ومن بعد كرعيه بضربات خفيفة على الظهر وانتي هازاه او حطيه فوق ركابيك على بطنو غادي يتكرع ايضا.

من بعد قمطيه وحطيه في بلاصتو ماشي في نموسيتك باش يتعود على بلاصتو.

غادي ينعس ماشاء الله ساعتين على الاقل .

هاد البرنامج خصو يكون كل نهار.. الدوش كيخفف لوليدات ماتقوليش كاين البرد لا ضروري من الدوش كل نهار.. ودائما السراجم والباب مسدودين.

مللي يفيق فكي قماطو وغير بشوية بداي تحكي له ظهرو بحركات دائرية غادي يبدا يتكسل هههه

وعملي ليه شوية ديال الرياضة غير بشويش خذي ايديه وعمليهم فوق راسو بشكل متوازي

ومن بعد عملي ليهم فحال كروا او حرف x غادي يبقى يتكسل حتى يفيق اوا دابا وجدي صدرك وخليه يشبع او الرضاعة.

في الليل ايضا قمطيه باش ينعس مزيان وحاولي تكون آخر رضاعة في 11 باش مايفيقش في الليل.

في حالة الا فاق حاولي تميكي عليه باش يرجع ينعس ومايتعودش على رضاعة اليل

الا مابغا يسكت جيبيه حداك ورضعيه ورديه بلاصتو.

دائما ناخذو احتياطنا.. كلنا باغيين نرضعو رضاعة طبيعية ولكن هادشي مايمنعش اننا نشريو رضاعة تكون واجدة عندنا وعلبة حليب اللي كتبها ليك طبيب الاطفال قبل ماتخرجي من الكلينيك.

وجدي ماء مغلي لمدة 5 دقائق وحطيه في طرموس.. وقرعة سيدي علي او اي ماء طبيعي.. باش تبردي ماء الطرموس.

الرضاعة اللي خصها تكون مغليه في ماء وطرف حامض لمدة 10 دقائق وحطي هادشي كامل عندك في بيت النعاس.. ودائما يكون عندك موجود في البيت.

باش ماشي تكوني سخونة وتخرجي للبرد.

اخواتي اي حاجة بغيتو تولفوها لوليداتكم خصكم تبداوها من الاول.

ممنوع التربية تنعس حداك غادي تولف وماتعودش على بلاصتها.

ممنوع الرضاعة في الليل الا في حالة الضرورة .

ممنوع نرك الطفل بدون حمام يومي.

ممنوووووووع الهزان بزااف غادي يولف الايدين وتوحلي معاه.

لا تنسي الرقية اليومية.

قلبي التربية كل نصف ساعة باش مايطيبش من المؤخرة الا وسخ وبقا فيه.

دائما غيري مكان نوم طفلك يعني ماشي ديما على الظهر.. مرة حطيه على يمينو مرة على شمالو مرة على ظهرو.. ومللي يكون فايق حطيه على ركابيك كيعجبهم الحال.

مرة مرة خذي شوية العسل عمليه في اناء شفاف وحطيه في الميكرووند باش يتعقم.. ومللي يبرد هزي شوية بطرف صبعك النظيف ودوزي ليه على فمو من الداخل.

اؤكد العسل الحر فقط لانه مهم جدا وكينمي المناعة ديال الاطفال

ولادي من الصغر نعطيه ليهم والحمد لله قليل فين يمرضو تبارك الله ماشاء الله.

الا حسيتي ان التربية فيها القبط خدي عصير برتقالة خذي منو 3 معالق صغار وعملي معاهم 2 معالق ماء طبيعي وعطيهم ليه.

اما الا كان الاسهال فالدوا اللي جربتو وكيمنع اسهال الاطفال هو العسل.

نصيحة اخرى اخواتي ماتكثروش الحوايج ماشي تقولو البرد وتلبسوهم طون دلحوايج.

قطعة اللي كتسد من الاسفل فوقها تريكو قطن بالاكمام وفوقهم اللبيسة الكرونويير.

وراه مغطي بالمانطا ومقمط.

مللي تحسني للتربية في السابع خذي هذاك الشعر عمليه في كلينيكس وديه عند مول الدهب يعبرو بميزان الدهب وصدقي الثمن ديالو.

الا كان وليد من الافضل تختنيه قبل ماتخرجي من الكلينيك..غادي تهناي ودغيا يبرا.

او ختنيه قبل مايعمل 5 شهور غادي يبقا يتقلب ويتقسح.

المسائل اللي ضروري تكون عندك في الدار في حالة المرض لا قدر الله.

ميزان الحرارة.. قويلبات دوليبران حسب الوزن مايخطاوكش.

سيرو ديال الحرارة حتى هو .

الطفل محتاج فيتامينات باش يكبر وواحد الفيتامين كيتكون غير بالشمس..

الا عندك الشمس في الدار حطي الطفل ديالك في كونتو وقبليه مع الشمس .. الراس فقط يكون بعيد علي الشمس.

الشمس ضرورية ليهم وايضا الهواء النقي ديال الصباح.. مللي تفيقي الصباح قبل ماتدوشي ليه ديما حلي السراجم باش الغرفة تهوا ويدخل هوا نقي.

ولفي ليه كلشي الضو شاعل والهدرة يعني ماشي يتعود ينعس في الظلام والصقيل

يولف كوولشي حيت انتي اللي غادي تعبي معاه .. لان الناس من بعد الاربعين غايمشيو وتبقاي بوحدك.

نتمنى الا خوات يستافدو واي اخت عندها اضافة تتفضل مشكورة.

---

kwhzp gghlihj hg[]] psf ofvjd hglj,hqum> hglj,hqum

تبارك الله عليك، نصائح جد جد رائعه او مفيده
غ تنفعنا بزاف، خصوصا حنا لي فلغربه او بعاد على وليدينا
ان شاء الله نعمل بيها
جزاك الله كل خير
او الله اجعلهم في ميزان حسناتك يا رب

شكرا اختي على النصائح

شكرا بزاف
الله يجازيك بخير استافدت بزاف من موضوعك والله يفكنا على خير ياربي

شكرا لكن على المرور الكريم وان شاء الله تستفيد باقي الاخوات

شكرا لك اختي موضوع زوين
غادي ينفعني بزاف خصوصا او اني غدي نولدلاول مرة
دويتي لينا في موضوعك على بعد الولاد وكفاش نتعامل مع الطفل
انا بغيتك توي لينا على قبل ما نولد
او اش خصنا نشريو او كيف نوجدو
انا انشاء الله غدي نولد في 17/07/2019
الا كنتي في مراكش مرحبابكي عندي لسبوع

مرسييييي حبيبة معلوماتك افادتني كثيرررررررخصوصا ملي قلتي الحفظات ديالت النفاس كاع ماعرفت وقلت انشاء الله ندير غير اولويز بس

بس حابة نعرف اش اسم الحفاظة الخاصة بالنفاس؟

وكمان شحال تسيبقى صرة ديالت بيبي عاد تطيح ؟يعني المدة؟وكيف ديري باش صرته من بعد تبقى داخلة وماشي بارزة كما كنشوفوبعض الدراري كبرووصرتهم خارجة شوية وهدشي مزعج.

وشكرا بزاف على الافادة والنصائح فيما يخص النوم والعسل والاستحمام
اشياء كثير كنت اجهلها ومعرفتي بها سطحية.

جزاك الله كل خير حبيبة

[frame="1 80"]
شكرا بزاف اختي نصائح قيمة الله يجازيك بكل خير

انا اول مرة غدي نولد انشاء الله ف 20 ابريل الله يفكنا جميع على خير وراني ماعارفا والو

انشاء الله نطبق هادشي لي قولتي وياريت تزيدي تفيدينا انتي والاخوات لي عندهوم تجربة حيت محتاجين بزاف لهاد المعلومات وشكرا جزيلا
[/frame]

انا في الدار البيضاء والا جيت لمراكش نحضر للسبوع الله ياودي ههه. الله يفكك على خير.

°°°°°°°°°°°°°°°°°°°°°°°°°°°°°°°°°°°°°°°°°°

بنت مغتربة مرحبا اختي

حفاضات النفاس معروفين عند اصحاب مواد التنظيف والماكياج

باكيتهم كبيرة فحال حجم اومو الكبير وفيهم صورة فيل احمر او ازرف لا اذكر

وهما عبارة على حافظة قطنية مستطيلة وكبير الحجم بدون اجنحة وهي طبيعية من القطن فقط واحسن من الويز الذي به مواد كيميائيية خطيرة.

بالنسبة للصرة غالبا تسقط في اليوم السابع واما قبله او بعده

لذا ضروري العناية اليومية بالصرة بالدوا لحمر والفاصمة المعقمة ومانخليوش التربية تبكي بزاف

لان البكاء المستمر هو اللي كيخرج البوط وممكن تكون عوامل وراثية .

في حالة ظهور الصرة ناخذو 10 دراهم بياسة ونعملوها وسط فاصمة معقمة ونحطوها فوق الصرة ونربطوها برباط القماط او اي رباط آخر المهم اننا نوركو على البوط باش يرجع.

°°°°°°°°°°°°°°°°°°°°°°°°°°°°°°°°°°°°°

شكرا لكن على المتابعة الكريمة

شكراااااااا بزاف
عالله نلقاها هنا بجدة
غانسول ونشوف.

بارك الله فيك وانشاء الله ادااحتج لمعرفة شي غانسولك ههههه

تحيتي