نداء لكل الاخوات وخصوصا المغتربات أو الموظفات المزوجين بأجانب

أنا موظفة وظيفة حكومية ومن فترة تعرفت على شخص أمريكي الجنسية وللصراحة شخص أخلاقو جيدة ودينو مزيان وشحال من حاجة متشاركين فيها تعرفت عليه فموقع للزواج مع العلم أن هاد الموضوع كان اخر شيحاجة نفكر فيها قبل لكن فاش كيكون العمر ديالك صغير نظرتك للأمور كتكون مختلفة تماما ولكن فاش كتلقاي راسك كتكبري وماكاين اللي مسول فيك (الحمد لله على كل حال) مع العلم أنني ولله الحمد ماناقصني حتى حاجة لكن كل شي نصيب وتقريبا اغلب اللي تقدم لي كان يا اما مزوج أو مطلق وعندو الدراري وماكنت كنقبل بطبيعة الحال يعني في البداية كنت كنفكر نقرا ومن بعد وليت نفكر ندير شي تكوين ومن بعد خاصني نخدم وخدمت فوظيفة مع الدولة ولكن مالقيتش راحتي مية بالمية الحمد لله على كل حال رغم ذلك متمسكة بالعمل ولكن كنشوف من منظور ثاني يعني تكوين أسرة زواج وولاد تربيهم وتشوفيهم يكبرو قدامك ,, وكيفما قلت السن ماكيرحمش يعني البنت فاش كتبدا تكبر فالعمر فرص الزواج كتقل وكل وحدة فينا عندها داخلها حاجات خصوصا معنويا بما انني ولله الحمد ماديا ماخاصني حتى حاجة
المهم هاد السيد تعرفت عليه والامور تطورت بسرعة لانه سبحان الله بعد صلاة الاستخارة تيسرت الأمور وفواحد الوقت غير متوقع جا للمغرب تقدم وتعرف على العائلة ديالي وطبعا الاهل سولو على أدق التفاصيل وبحث شامل واسئلة كثيرة وهاد الشي طبعا من حقهم وفاش جلسو معاه وهضرو ارتاحولو وقالو اللي فيها الخير وطبعا خلاو الاختيار ليا بما أنني المعنية بالأمر وقالو إلى كنتي مقتنعة بيه ومتفاهمين مانزيدوكم غير الخير والله يوفقكم ,
خلاصة الأمر أنه الان بغا يجي على ود الزواج وأنا ماعرفت شنو ندير
المشكلة اللي عندي ماشي أنا لانني مقتنعة بيه كشخص المشكلة اللي عندي هي أنني ديما كنقول شغادي يقولو عليا الناس وهادا غادي يهضر وهادي غادي تقول وهادا وهادي وفالخدمة والتعليقات والخ الخ مع العلم أنني ماعنديش علاقات بزاف يعني خدمة للدار والدار الخدمة وحتى فالخدمة ماعنديش مع الهضرة الكثيرة ماشي حينت منطوية لا بالعكس يعني نهضر فالوقت المناسب وعلى شي حاجة معقولة لان أكثرية فمجال الخدمة شي كينمم فشي وكتشوف بعضهم كيضحكو مع بعضهم وغير يخرج واحد منهم يبقاو شادين فيه النميمة
يعني مسألة اش غادي يقولو الناس…؟؟ مخلياني مترددة مع العلم أن هاد السيد ماشفت منو غير الخير وديما محترمني ولا مرة سمعت منو شي هضرة ناقصة أو ممزايناس أو حسيتو مخبي شي حاجة ابدا
ومن ناحية ثانية الخدمة يعني موظفة مع الدولة ماشي بحال بريفي أو ماخداماش
واهلي نصحوني أنني ندير رخصة طويلة ديال الاستيداع بدون مرتب مدة عامين إلى عجبني الحال راني نكمل ماعجبنيش ححتى الى رجعت نلقا خدمتي كتسناني

وسواء المرأة أو الرجل مهما بلغ من منصب أو مال ديما كيحتاج لمرأة أو راجل معاه فحياتو ووليدات باش يحصن نفسو ويعيش بما يرضي الله,