السلام عليكم الحبيبات
عواشركم مباركة
و الله يكتب لينا اجمعين فهاد الايام المباركة نيل المغفرة و العتق من النار
الله يتقبل منا و منكم الصيام و القيام و صالح الاعمال
هاد الوصفة غزالة بزآآف و انا اكيدة غتعجبكم
ممكن نقارنو مذاقها بالڭوفريت المعروف تويكس twix لكن هي احسن بعدة مراة
و مقاديرها و طريقة عملها بسيطة لو تتبعتم المراحل
كتليق تعمل كحلوة او طارط كبيرة للتقديم
او تتقطع و تتقدم فالقويعطات كدواز اتاي بحال الزليجة
و ممكن تضيفو عليها المكسرات و الفواكه الجافة و طبعا كتجي آحسن
و البسكوي الاساس ديالها هو الوصفة للي سبق قدمت لسابلي او غريبة الشورت ط¨ط±ظٹط¯ فهاد الرابط
ان شاء الله تنال اعجابكم انا شخصيا "لا استطيع مقاومتها "ههههه على قولت الاشهارات
واخا تبان ليكم المراحل كثيرة راها تستاهل
و لما كتعملوها مرة كتولفوها و تجيكم ساهلة التطبيق متخلعكمش الصور
نخليكم مع المقادير و الطريقة :
ldgd,kdv a,vj fvd] fhgw,v hgltwgm ;hguh]m lk ;,.dkjd jvd] w,vm
بالنسبة للبسكوي شورت بريد و هو الطبقة الاولى
80 غرام سكر ڭلاصي (او 100 غرام الى عزيزة عليكم الحلاوة )
200 غرام زبدة مالحة بدرجة حرارة المطبخ
250 غرام دقيق فورص
50 غرام مايزينا
بالنسبة للطبقة الثانية و هي الكاراميل :
50 غرام سكر
120 غرام زبدة لينة
2 معالق كبيرة عسل
1 علبة حليب مركز محلى (390 غرام)
بالنسبة للطبقة الثالثة ديال الشكلاطه
200 غرام شكلاطة بالحليب بتركيز 38 % شكلاطة
او شكلاطة سوداء بدون حليب بتركيز 75 % حسب الذوق
او شكلاطة بيضاء
2 معالق كبيرة كريم فريش او ملعقة زبدة (اختيارة ممكن الذوبو الشكلاطة بوحدها دون الحاجة لاضافة )
ممكن اضافة مكسرات( لوز ، ڭرڭاع، نوازيت، كاجو … ) للكراميل او للشكلاطة اما يخلط او يضاف للوجه كيعطي قرمشة مميزة
bent bladi
اولا كنبداو فتجهيز العجينة بنفس طريقة الشورت بريد يعني
ناخذو الزبدة و السكر ڭلاصي نعملوهم فإناء و نبداو نخلطوهم و ندعكوهم مزيان
حتى يوليو بحال پوماد او كريمة ملسين و متمازجين مع بعض
ثم نضيفو ليهم المايزينا
و الدقيق
و نعجنوهم مزيان
حتى نحصلو على عجينة متمازجة و لينة
نشكلو بها كرة ملسة
راه العجين كيكون رطب كيف مبين فالصور
كناخذو العجينة ديالنا و نطلقوه بالدلاك فوق سطح العمل او ورق الزبدة
نعملوها بالسمك للي بغينا غليضة او رقيقة انا عملتها بالسمك العادي للطرطات
ناخذو مول انا اختاريت المول الخاص بتركيب الكيك بشكل مربع
قطعت العجين الزائد بعد مخليت سنتيميتر بين حاشية المول و العجينة كيف مبين فالصور
و كنفزڭ صبعي بشوية ماء
و ندوزو على الحواشي
و نرشها بشوية دقيق
و نلصقها على جانب المول كيف واضح فالصور
بهاد ‘لطريقة كتجي العجينة لاصقة بالجانب الخارجي للمول
و كتسهل علينا العمل من بعد (غتشوفو فالصور الاتية قصدي)
السبب لاش فزڭت جنبات العجين بالماء باش تلصق مزيان و متزلقش
كيف واضح فالصور قابطة مزيان
كنتكو العجين البفرشيطة باش ميتنفخش
و كندخلوه للفرن مسخن على درجة حرارة 150 C° بين 15 و 20 دقيقة اقل او اكثر حسب سخونة الفرن ديالكم
خصها تكون ذهبية اللون و ردو معاها البال حيت دغيا كطيب ممكن تحرق
انا تشغلت مع الكاراميل و كانت غتحرق لي العجينة
لما نكملو الطبقة الاولى وهي العجينة
كنبداو فتجهيز الطبقة الثانية و هي الكاراميل
كنجهزو الكاراميل بالطرقية التقليدة
اي اننا كنخلطو الحليب المركز المحلى مع السكر و العسل و الزبدة
و كنعملو الكل فكاسرولة و نديروه فوق عافية مهيلة يذوب
مع التحريك المستمر باش ميلصقش لينا السكر فقاع الكسرولة
لما كتتمازج المكونات مع بعضها كنزيدو فجهد العافية و حنا كنحركو
حتى كتبان لينا الكريمة بدات كتغلى و كتعمل فقاعات كيف مبين فالصورة
هنا غيبدا لونها يتغير للون الكاراميلي
ننقصو عليها العافية و نبقاو مستامرين فالتحريك
حتى تعقد و تثقال و تولي على شكل كراميل مع لون ذهبي جميل
متكثروش ليه الطياب و الا غيتحرق
غير كيجهزالكراميل كنكبوه و هو باقي سخون على السابلي للي طاب و هو باقي فالمول
لانه الى خليتوه غيبرد و غيجمد ميبغيش يتكب لانه كيف قلت كراميل
كنسرحوه على كل سطح السابلي بشكل متساوي
و نحاولو نقادوه و هو باقي سخون حيت غير كيبرد كيولي صعب يتسرح
كنخليو الكراميل يشد راسو و ياخذ شكل المول
الطبقة الثالثة ديال الشكلاطة
انا اختاريت شكلاطة بالحليب بتركيز 38% كاكاو
كندوب فحمام مريم مع الكريم فريش مع التحريك المستمر
لما كتذوب مزيان و تولي لامعة
كنكبها على الكراميل و هي باقي سخونة
و نحاول نحرك المول و ندورو فكل الاتجاهات
باش نسرح طبقة الشكلاطة على كل سطح الكراميل بتساوي قبل متبرد
كندير تحت الحلوى كتطونة الحلويات باش يساعدني نهزها لطبق التقديم
او ممكن نحطها فطبق التقديم مباشرة
كندخل المول للكونجيلاتور ليلة كاملة افضل شيء
و لو كنتو مزروبين دخلوها للكونجيلاتور واحد 4 ساعات لكن كتجي افضل لما كتبات
لما كنخرج المول من الكونجيلاتور كنحيد الزوائد ديال العجين باش كنت لصقت جنبات المول
كيف واضح فالصورة (الزوائد كناكلها ههه او كنستعملها فالديسيرات و الحلوى )
و كندوز موس بين الحلوى و المول باش نفرقهم
و كنحيد المول من الحلوى فوق طبق التقديم
هذا سبب استعمالي لمول مربع مفتوح من الجانبين
باش يسهل عليا الديمولاج و تقديم الحلوي دون عذاب
و هاهي خرجات و الطبقات باينة
السابلي فوقو الكراميل فوقو الشكلاطة
ممكن تعملو الطبقات بنفس السمك او اقل او اكثر حسب ذوقكم
لما بغيت نقدمها زينتها برقائق اللوز
فالجنبات و على شكل وريدات
زينو حسب ذوقكم بالشكلاطة البيضاء او باي مكسرات او كريمة
و هاهي جاهزة للتقديم
تحفظ فالثلاجة او الكونجيلاتور لحين التقديم
تقدم باردة
او بدرجة حرارة المحيط
بالصحة و الراحة
ان شاء الله تنال اعجابكم و تجربوها وتردو عليا خبر
و ان شاء الله نقدم ليكم طريقة اخرى لتقديم الميليونير شورت بريد
اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد
اللهم ادمها نعمة و بارك لنا فيها و اكتب لي بها حسنة طيبة و احفظها من الزوال
الله يرزقنا و إياكم خيرات الدارين و لا يحرمنا من طيبات الجنة و نعيمها
دمتن في رعاية الكريم
اختكن أمنــار
أم ريـَّــان
وعليكم السلام ورحمة الله وبركاته
أختي بالنسبة لزبدة وش ضروري زبدة مالحة ؟؟؟؟؟؟؟؟
تسلم الايادي
دااااااائما متألقة
احلى تقييييييييييييييييييييييييييييييم
بارك الله فيكن جميعا حبيباتي
كل باسمها
ردودكن فرحاتني
الله يفرح قلوبكم
و يجزاكم عني خيرات الدارين
على دعواتكن الطيبة ياطيبات
الله لا يحرمني منكن
عواشركم مباركة
و الله يبارك لينا فرمضان الكريم
و يكتب لينا فيه الصحة و العافية و الخير …
و يجعلنا ممن تغفر ذنوبهم و تقبل عباداتهم في هذا الشهر الفضيل
المشاركة الأصلية كتبت بواسطة – نور الهدى – 
أختي بالنسبة لزبدة وش ضروري زبدة مالحة ؟؟؟؟؟؟؟؟
الله يبارك فيك احبيبة
بالنسبة لزبدة كل مرة واش كنعمل حسب المتوفر عندي مالحة او مسوسة
ممكن تعملي اي نوع زبدة ديال العبار او الباكية
المهم تكون زبدة حقيقية ماشي مرڭرين
لو مكانتش مالحة ديري فيها رشة ملح تفي بالغرض