مقرونية فالفرن بالصوصيص والبيشاميل

السلام عليكم حبيباتي الانيقات اليوم غنزل ليكم هاد الكراتان ديال المقرونية
كيجي غزال انا غنحط المقادير مع الطريقة بسم الله نبداو
كنقليو الصوصيص فشوية الزيت البلدية والرومية من بعد نقطعوه

فهديك الزويتة كنشحر البصلة والفلفلة وشوية الثومة حتى ينزلو

من بعد كنزيد مطيشة محكوكة العطرية وضامة البنة ليباط وشوية الربيع

فهاد الاثناء كنكون صلقت المقرونية وصفيتها

وجدت لاصوص بيشاميل تبارك الله كلشي كيعرف ليها

من بعد كنخلط لاصوص بيشاميل مع المقرونية وكنحتفظ بشوية منها

كندير طبقة ديال المقرونية فالكراتان

كنخلط الصوصيص مع لاصوص ديال مطيشة والفلفلة

وكندير لاصوص فالوسط كلها

وكنزيد الباقي ديال المقرونية وكنصب عليها ديك شوية البيشاميل
اللي احتفظنا بيها وكنرش الفرماج احمر من الفوق
وكندير طريفات الزبدة فالجناب باش يتحمر وندخلو للفران يتكراتينا

هاهو ملي طاب وتحمر جا بنين اممممممم راني مع الزربة
نسيت ما صورتو حتى كلينا فيه النص هههههههههههه

كنتمنى يعجبكم وتجربوه بالصحة والراحة