السلام عليكم ورحمة الله، إعلان المسابقة ماشفتوش حتى فات العيد، و ان شاء الله انشارك معاكم بالصور ليخذيت وبعاداتنا فالعيد. هاد العام الحمد لله عيدنا فالبلاد (تابع لجماعة إيغرم إقليم تارودانت) وشرينا فيه الحولي ديالنا وديال خالي ليكان مازال ماوصل. حذفت صور الأضحية وهي على قيد الحياة لمحاذير شرعية بالنسبة لنهار العيد، كلشي كايفيق بكري وكانفطرو فطور خفيف، ورجال كايتوضاو وكايوجدو، حنايا كانديرو الغدا يطيب فالكوكوط(مع الما دالبلاد ماكايطيبش فيه اللحم دغية، كانديرو الغدا يطيب بكري وكانتهناو منو، وكانديرو مقادير 2 طواجن، واحد للغدا واحد للعشا،مع بالعشية كانقيلو كانضورو ماكاتبقاش لينا الوقت نڭابلو فيه لكوزينة وتطياب العشا) من بعد ما مشاو الرجال للمصلى كنت مازالا كانصاوب المسمن وماما كانت كاتعجن الخبز لي يكفي للنهار كامل. بعدما ساليت المسمن وجدت الكيسان داتاي ولي خص للفطور. وغير سمعت الرجال راجعين من المصلى مشيت عند صاحبتي (جارتنا) للسطح ديالهوم كايطل على الطريق مناين غايدوزو فاتجاه المسجد. ‘كلشي’ الناس كايطلعو للاسطح، واخا مايكونش السطاح كايطل على الطريق الرئيسية، المهم يتسنطو للادعية. ملي كايرجعو الرجال من المصلى ‘كلهم’ كايرجعو على رجليهم وبخطى خفيفة وكلش فابهى حلة، والاطفال مع الاباء والاجداد ديالهم، منظر كثر من رائع، والنساء فالاسطح كايقلبو على عائلاتهم من بين الرجال وكايفرحو بشوفتهوم، الرجال كايكملو الطريق حتال المسجد وكايطلعو لسطاح ديالها، وكايكملو قراءة الاذكار وكايختمو بالدعاء و النساء لي فالاسطح كايهزو ايديهم وكايكولو آمين، ملي كايكمل الدعاء النساء كايجريو لديورهم قبل مايوصلو الرجال للأزقة ويتخلطو معاهم. 
بعدما سالا الدعاء وجدت الباقي للفطور ووجدنا فين ايتعلق الحولي ودين غايتذبح والسطولا دالما، الجناوا..ودرنا الما يطيب ليغايسعملوه فالمصارن.. وفانتظار شي حد من العائلة يجي يذبح للحاولي ديالنا مع بابا ماكايذبحش. فطرنا.. 
من بعد جا ولد عمي وولادو وجارو والاطفال، وكلشي كايساين ايمتا يخرج الطحال باش يهرفو عليه ولكن كانكون ليه بالمرصاد ^^. من بعد ماكايتذبح الحولي كانحطو اتاي والحلوى وكانديرو التصاور، 
(الصورة الثانية ملي ذبحو الحولي تاع مرت عمي الله يرحمو) من بعد كانمشيو "لشاريج" بلاصة منين كايسڭيو ناس الما دشريب، كايتجمعو فيه النساء بعد الذبيحة وكانسڭيو منو بالسطولا وكانغسلو لكرشا وراس والمصارن، وداك المحتوى دالكرشا كانكبوه فالاحواض ليدايرين بشجر دزيتون، او شجر داللوز. ولكن هاد العام غسلنا الدوارة غير فالدار. من بعد شوينا الكبدة والقلب. 
ومن بعد طلينا على الكوكوط واش وجدات، فرشت البيت فاين غانتغداو، وكانعرضو على اسر الأعمام، هو كايكونو عارفين ولكن عادة نعرضو عليهم (فالعادة ديالنا لغدا دنهار ط§ظ„ط¹ظٹط¯ كايتجمعو عليه عائلة الاب، والعشا دالعيد كايتجمعو عليه عائلة الام)، وملي كايجيو كل اسرة كاتجي بازياء جديدة والاطفال كايتنافسو شكون ليشراو ليه ولديه لباس وبلغة جديدة، والحديث حول الذبيحة..كل اسرة كاتجيب معاها الطاجين ليصايبات، ملي كانتجمعو، كانعطيو الصينية للي كايعمر اتاي ديما، وكانفرقو الحلوة … وكلشي ضاحك وناشط، ملي كانشربو اتاي كانحطو الغذا، والبنات ليكايتسخرو، الامهات كايڭلسو، 
بعد الغدا كانعمرو اتاي عاود، وفالاخير الدعاء والعروسات كايبوسو راس حماتهم وكايڭولو ليهم "المسامحة"، هاد الغدا كايسالي مع العصر، ملي كانصليو، البنات كايلبسو ملاحف جداد وكايخرجو يدورو فالجنان، او اي بلاصة بغاو، والاطفال كايشريو المونادا والفانيد والحلوة وكايديوها لواحد البلاصة وكاياكلوهوم وشي يدوق شي، ملي درنا بالعشية مشيت شفت الجريدة دمرت عمي، ومشيت مع حفيدتها تعطي للبهايم ديالهوم (اعزكم الله) ياكلو. 
فالليل بعد صلاة العشاء تجمعنا عند خالي (حنا وخوالاتي وخالي آخر، وولادهوم واولاد ولادهوم وعريساتهم..) ومرة اخرى كل اسرة كاتجيب طاجين ليصيبات، وكانكلسو على اتاي والنشاط، بالنسبة للبنات والاطفال هاد النهار عندهم الحرية يتعطلو فالزنقة حتال اي وقت بغاو، مع الحركة كثيفة والناس كايبقاو سهرانين على برا، ومع البلاد كاين الامن وكلشي ناس عارفين بعضياتهم. وبعد المرات كايديرو "احواش" وكايتجمعو عليه. 
بعد ط§ظ„ط¹ظٹط¯ درنا الكرداس، بالنهار كانطلعوهوم للسطاح وبالليل كانهبطوهم علا ود المش لايقرب ليهوم ^^ 
نهار ثالث عيد قطعنا الحولي، والراس، وجابت لينا حفيدة عمي ‘إفراسن’ والفلفلة من الجنان للكسكسو، ولكن ماما دارتو بالباقي من الدوارة ليشاطت من الكرداس. 
هادا هو وصفي لعاداتنا يوم العيد، ان شاء الله تعجبكم عاداتنا ليشاركتها معاكم، واخا كايكون فيها الاختلاط والسلام بالايدي مع اولاد الاعمام والاخوال والعائلة عموما،اللــــــــــــــــــــــــــــــــــــــه يسمح لينا ويهدينا ياربي. وعيدكم مبارك سعيد وكل عام وانتم بالف خير.
lahv;jd td lshfrm hgph];m kihv hgud]
الله يا ختي شحاااال زوييييييييييينة الاجواء عندكم عيد حقييييييييييييقيييييييي ههههههه هنيئا لكم باللمة مع الاحباب والفرحة والله يديمها عليكم وتعيدو وتعاودو في جو مليء بالفرحة والسعادة
اجواء اغزاله ، ماشاء الله
يا ختي تبارك الله عليكم فرحتيني في غربتي
تبارك الله عليكم شحال زوينة الاجواء العيد تما
مشاء الله عليكم غزاااال هادشي تبارك الله كاينة اجواء العيد بامتياز. حنا فتقدنا هادشي فالمدن الكبرى.
تبارك الله عليكم اجواء مختلفة على المدينة ومع الاهل والاحباب كل شي كايدوز زوين شكرا خليتينا نعيدو في بلادكم من خلال الصور
ماشاء الله اجواء قمة فالروعه شكرا ليك بزاف الي عيشتيني معاك هالاجواء الغزاله الي مفتقداها شخصيا تمنيت نكون معكم ونحس باجواء الجوء ونقيل معاكم نهار ياربي تسعدكم وتخليكم ديما مجموعين يارب
اجواء رآآآآآآآآآآائعة يآآآآآسلام على لمة الاحباب لله لا يحرم حتى واحد منها ولك الف شكر مني
تبارك الله ما شاء الله تقرير أكثر من رائع شكرا ليك بزاف