السلام عليكم البنات
كيف دايرين ؟
الا جات على خاطركم اللي عندها معلومات تساعد هاد البنت المغربية ساكنة قريبة حدايا في لندن، القصة نعاودها بلسانها :
جرا عليا راجلي (مسلم حديث الإسلام ) من بعد عنف و شجار وشير عليا بالبورتابل مللي بغيت نتاصل بالبوليس ،حيد لي لاكارت من البرتابل، معطنيش الفرصة باش نتاصل بشي حد من معارفي او البوليس، مشيت نجري للتلفون تاع الدار حتى هو حيد ليه الخيط، دفعني مع الباب حفيانة ، بدا يخاصم و شدني من ايدي و جرني خرجني مع الباب ، قاليا مبغيتكش في الدار خرجي وضربني بالبورتابل، بديت نغوت على جيران العمارة :عفاكم تاصلو بالبوليس، عفاكم راه معديش باش نتاصل، عافاكم ماكانعرفش الرقم ديال البوليس . واحد جيران فوقي في لعمارة هما للي تاصلو بي لبولس ، راجلي غير شاف هاكاك أمشى تاصل بي لبولس حتى هو . دفعني مع لباب حفيانة بلا حوايج ، أنا من كترت لخلعة و دا ليا لا كارت باش نتصل بي أي حد كانعرفو باش إيجي واخا غير يهزني من شارع ( ماعندي حد من فاميلة ) من كترت لخلعة صافي مشيت نجري بحال هاكاك حفيانة عريانة ندق على جيرانا للفوق : عافاكم دخلوني عدكم غير نتصل من تيليفونكوم بي شي حد للي كانعرف ،عافاكم ماعاديش فين نمشي … راجلي سد باب الشقة… دخلوني مساكن ابقيت فيهم لي أني صافي ولليت في حالة هستيريا نبكي ، مسكينة جارتي شدت ليا بورتابل واخا بدون كارت لي حيد راجلي، جبدت ارقام منو تاع واحد ناس كانعرفهوم ريحة شحمة في شاقور ، ولكن مساكن قالو ليا هاحنا نجو عندك. بقيت نتسنى في لبوليس نبكي حفيانة لابسة لباس مكروز تاع دار و حجابي مامصاوبش ، كنت كانحس بحال إلى عريانة لي أني أنا ملتزمة كلبس لحاجات طويلة برة دار و حجاب طويل. ولكن دفعني مع لباب بلا والو… لمهم جا لبولس خاد أقوالي ، ورريتهم حالتي. مشاو عندو قاليهم قصة أخرى مختلفة. لمهم رجعو عدي قالو ليا غادي نمشو ندخلوك لي دار باش تهزي حوايجاك أتخرجي لأنه راجلك مابغاكش تجلسي في ممتلكاتو ، أبغى سوارت تاع دار. صافي مشيت معاهم لعندهم لمركز البوليس بقيت نتسنى دوك ناس ٤ سوايع باش جاو لأنه كان نص ليل. لمهم أنا دابا عند دوك ناس في مدينة أخرى ماشي في لندن ، داوني لي سبيطار على إيدي لي ددرني لي أنه شدني منها و جرني منها وطحت عليها وتقسح ليا لعظم. ولليت في حالة نفسية خايبة ، ولليت غير سارحة ومامركزاش غير خايفة لي أنه كان معايشني في خوف و رعب في الدار ،
كتبت هاد لقصة على لسانها هي و كتبت المهم،الهدرة كثييرة علاش و كيفاش ، المشكلة تانية أن فيزا ديالها قربت تكمل كان كايوهامها أنه غادي يدفع ليها لوراق باش يجدد الفيزا ولكن هو كان غير كايجرجرها حتى تكمل ليها لفيزا ويصيفاتها لي المغرب ، كان ساكت غير باش تحدي ليه ولادو من مرأة أخرى كانت معاه قبل منها، لي دار معاها نفس لحالة وباقين دابا في لمحكمة مداعيين.
عافاكم واش كاين شي حق لي لمغربية في بريطانيا، واش ممكن شي حد يساعدها ؟؟؟
lyvfdm td fvd’hkdh , ukt hg.,[K lshu]m lk tqg;l