طلب للأخت ذاكرة ساعديني

اختي وحبيبتي ام هبة هي خرجتي على شعرك بغيتي ترطبيه
راه غير وحدة وحدة عليه ما حيلتو للترطاب ما حيلتو لتغيير
اللون ما حيلتو للتقطيعة ايوا تهنيتي دبا هههههههههههههه
تنضحك معاك حبيبتي ما تخافي والو اول شيء هو النفسية
تكون مرتاحة وتكوني على يقين ان شعرك غادي يرجع احسن
وافضل من الي كان بالحق الى تبعنا النصائح وما تخلطيش
بين وصفة ووصفة تبعي طريق وحدة لان ماشي جميع الطرق
تتدي لمكة ، ما علينا لقيت الغالية اسينات حاطة لي طلب باش
نلتحق بالموضوع ديالك وجيت فورا .
المهم اول شيء هو تبدلي الشمبوان ديالك وثاني حاجة غادي
تاخذي فوطة وتغمسيها في ماء سخون وتخليها فيه حتى تشرب مزيان
وديري ماسك لشعرك باش الزغبة ترجع لها الليونة والنعومة والرطوبة بحيث
مع الترطيبة تتولي متقصفة وجافة ومهلوكة والماسك باش داوي هاذ الحالة
هو كالتالي :

بكل بساطة غادي تحضري مايونيس خاصة بالشعر

بيضة كاملة
كاس زيت مخلط بين زيت بلدية وزيت الكوك وزيت نوارة الشمس
طربي البيضة مزيان وانت تضيفي الزيت مخلط

حتى طلعيها مزيان والى شفتي باقي خاصها الزيت ضيفي
اي نوع زيت من الي ذكرت لك يعني حتى توقف لك المايونيس
عمليها في قرعة وخذي منها القياس الي غادي يقدك والباقي
عمليه في الثلاجة
من بعد تحكي نص بصلة بيضا وتاخذي فقط الماء ديالها في
القياس الي غادي ديري لشعرك من المايونيس
تعملي القناع على شعرك وانت تتحكي في بصيلات الشعر
يعني الجدر باش توغل لعمق الزغبة وتغطي شعرك بفوطة
الي استعملتي في الماء سخون من قبل تعصريها وتلويها على راسك
وتبقاي بهاذ الماسك لمدة ساعة ونص حتى 2 سوايع من بعد تغسلي
شعرك ويكون عندك شمبوان خاص بالشعر المتقصف وتغسلي مزيان
ما ديريش الملين اي الديميلور ابدا لانه مصنوع من نفس المادة الي
تتصاوب منها الترطيبة وملي ينشف شعرك دهنيه بزيت زريعة الكتان
وزيت الجنجلان طريقة بسيطة جدا هو تشدي كمية من زريعة الكتان
قد الجلنجلان سخنيهم في المقلة وطحنيهم في الطحان مع 2 معالق
زيت نوارة الشمس من بعد خليهم في قرعة ضيفي لهم كاس الزيت
العادية وخليهم مدة 48 ساعة من بعد خذي ليبا وكبي فيها الزيت
وصفيه مزياااان وخليه 24 ساعة اخرى باش يتصفى ومنو تبداي
دهني شعرك وهو ناشف .

وما نكرهش تصاوبي الغاسول المسقي الي غادي يهنيك من كلشي
تيرطب وينقي الجلدة ويغذي الزغبة رائع ، واصلا انا ما تنديرش
الشمبوان الا نقيطة ملي نهبط الغاسول باش تيبقى الشعر على طبيعتو
ومغذي ومقاد ، ايوا ديري هاذ القناع وان شاء الله تحسي باول خطوة
ومن بعد نتابع معاك باقي الخطوات
وبالصحة والراحة .