سلطة رائعة من مطبخي مرحبا بكل الأنيقات

أم أســـــامة

أنيقاتي العزيزات ليوم جبت ليكم هاد السلطة لي جات زوينة شكلا و مذاقا و لي عاوناتني فيها لوستي الله إيخليها ليا ،نبداو على بركة الله بالمقادير :
2 بطاطات مقطعين مربعات
2 جزرات مقطعين مربعات
500 غ مقرونية مصلوقة في ماء مملح
زلافة ديال المايونيز
2 حكاك درة
2 حكاك طون
زلافة جلبانة مصلوقة
للتزيين غانحتاجو :
أوراق خس
قطع طماطم
بيض مسلوق
باربة محكوكة
سوريمي
أوراق معدنوس

الطريقة :
كنخلطو جميع الخضر مع المقرونية و الطون و الدرة و كنضيفو ليهم المايونيز و كنخلطو مزيان و كندوقو الخليط ديالنا واش خاصو شي ملح أو عصير الحامض باش إيجي بنين ثم كناخدو طبق التقديم و كنفرشوه بالخس و كنعملو الخليط يالنا في شي مول مناسب لطبق التقديم و كنقلبوه في الطبق و كندهنو ليه وجهو بكوش خفيفة من المايونيز و كنتبتو على الجناب الباربا محكوكة و كنزينو الوجه بقطع الطماطم و كنحاولو نديرو وردة بالبيض و كنزينوها بأوراق المعدنوس و كنوضعو قطع السوريمي في الجناب و هاهي السلطة ديالنا واجدة و أستسمح لعدم تصوير كل المقادير و تفاصيل التزيين .

كنتمنى هاد المرة تعجبكم السلطة ديالي كيفما عجبات ضيافي
في أمان الله