سؤال وافادة للجميع

الله يرحم ليكم الوالدين ويفرحكم لما جوبني
بغيت نصاوب بعض الحلويات ومنبين كعب غزال وبغيت نديرهم فتلاجة اي لفريكو واش فكرة مزيانة اولا
حيت فيتلي سمتها ولكين ما طبقتهاش
ولكم منيى الف شكر و تحية

---

schg ,hth]m gg[ldu

ايه يمكن الحبيبة تحتفضي بها في المجمد

السلام عليكم أختي.كنتمنى تكوني فأحسن حال.أما بالنسبة لحلويات اللوز بحال كعب غزال أو دميلجات أو لبريوات لكن ميكونوش مقليين…..فمكاين حتى مشكل لدرتيهم ف congelateur لكن حلوة اللوز لكتحتاج لناباج أو لكتدهن بالعسل فخاص تطيبيها و ديرها حتى هي ف congelateur كتبقى زوينة و حتى تبغي تقدميها عاد جبديها على تساع و عاد دهنها بناباج؛لأنو الناباج إلا طول فلحلوة كيغير لمذاق دللوز ومقتبقاش لحلوة معلكة.
والحلوة دللوز أو الكوك لإجباري درها ف congelateur هي لمكتكونش طايبة فالفرن مثلا لكتعجنيها بحليب مركز محلى أو لعسل……..وكتغطس فشكلاط فخاصها دار ف congelateur حتى لوقت لحاجة عاد تجبديها وكتبقى زوينة؛ حيت لطولات برّا كتولي فيها طِّيبة بحال سمن…..كنتمنى نكون أفدتك وكنتمنى لك التوفيق إن شاء الله.

شكرا لك اختي rim 2024

شكرا لك اختي حنان على المساعدة
وعلى مجهودك والله يفرحك بليفيهالخير

آمييييييييييين حبيبة.الله يجازيك بالخير

البنات الله يحفضكم اشكون اللي كتعرف طريقة الهريسة لحقاش منقدروش انا وراجلي ناكلو الاكل بدون طبسيل صغير الحار او الهريسة وشكرااااااااااااااااااا

طريقة تحضير الهريسة
المقادير:
كيلو فلفلة حمراء وحارة (الافضل الفلفل الحار الصغير )
راس كامل من الثوم
نصف ملعقة صغيرة ملح
الطريقة:
نغسل الفلفل ونزيل لها فقط الجزء الاعلى اللي فيه العود الأخضرونحتفظ بالباقي بما فيه البذر.
نطهي الفلفل على البخارلمدة نصف ساعة مع فصوص الثوم والملح
وبعدما تُطها وتبرد نطحنها مع الثوم
من بعد نضعها في قنينة زجاجية نغطيها بزيت الزيتون ونضع على حافة القرعة قطعة مربعة من البلاستيك الغذائي ثم نحكم إغلاقها…ونضعها في الثلاجة.
تستعمل هاد الهريسة لتحضير السمك وفي تحضير السلطات الساخنة و كذلك في تحضير الصلصات.

الحبيبة الله يحفضك بغيت انسولك انا اشريت الفلفة حمراء جافة خديتها من عند الهنود حدانا تبيعوها واش اندير ليها نفس الطريقة عافك لما جاوبيني وشكرا

السلام عليكم أختي سمحيلي مجوابتكش راني مكنتش اليوم كلو فالدار.المهيم يمكن لك تحضري لهريسة بالفلفة حمرة يابسة.الطريقة كالتالي:
غتاخدي الفلفة لي قلتي عندك يابسة،تزولي ليها الزريعة و الراس،ترقديها فالماء و الخل البيض حتى ترطاب و من بعد تزيدي عليها حامضة مصيرة مقطعة ودوزي هدشي فطحانة ديال اليد يعني ديال الكفتة وديريها فشي إناء و تزيدي ليها:الملحة بزايد شي معلقة كبيرة+راس كامل ثومة محكوكة +كروية+قزبر حبوب مطحون+معلقة صغيرة كامون+معلقة صغيرة إبزار+تحميرة معلقة كبيرة وإيلا بغيتي تزيد شوية مطيشة حك زيديها+الزيت لبلدية كمية لكافية لتخلط لهريسة و على حسب واش كتبغيها جارية أو مجموعة شوية.
إيييييوا يا لالة صافي ديريها فقراعي زاج وغطيها بزيت لبلدية باش ميدخلهاش الهواء و إلى الثلاجة.إيلا كنتي غديري كمية كبيرة فمن الأحسن تعقمي لقراعي قبل و بعد ملإها بلهريسة ومتحلي القرعة حتى حتى تسالى الأخرى.كنتمنى الطريقة تكون واضحة.و الله المستعان
آه بغيت نقول ليك منين تكوني كتصايبيها ديري ليكات فيديك باش متحرقكش.