تيراميسو بالفريز ولا اروع

حبيت نتشارك معاكوم هاد التيراميسو اللي هو من المطبخ الايطالي تيجي غزال فالمذاق وماتشبعوش منو
المقادير :
بكية savoiardi او les boudoirs
500g جبنة الماسكربوني
كاس صغير سكر سنيدة
2 معالق كبار الماء
1kg الفريز يكون طري ومغسول مزيان
6 بيضات
6 معالق كبار سكر
شوي عصير البرتقال
وشي حبات الفريز للتزيين

اول حاجة نقطعو الفريز الى انصاف ونطحنوه فالخلاط الكهربائي بلاما بلا والو هو غادي يطلق الما تاعو

ناخدو طنجرة ثقيلة وغارقة شوية ونوضعو فيها كاس السكر وجوج معالق الماء ونحطوهم فوق النار ونبداو نحركو مزيان حتى نحصلو على كراميل

من بعد مباشرة والكراميل باقي سخون نضيف عليه الفريز اللي طحنا وغير يبدا يغلي نحسبو 10 دقائق ونطفيو عليه

وناخدو شي صفاية ونصفيو داك الفريز باش يولي رطب وناعم

من جهة اخرى نفرقو ابيض البيض على الاصفر ونطربو ابيض البيض مزيان حتى يولي بحال الثلج ونخليوه على جنب

وفي اناء اخر نضع اصفر البيض مع السكر ونطربوهم مزيان تم نزيدو عليهوم الماسكربوني

تم فالاخير نضيف ابيض البيض ونخلطو بشوية غي بالمعلقة باش مايطيحش

مني نصفيو الفريز نزيدو عليه عصير الليمون انا زدت شي نص كاس صغير باش يخفاف شوية
ثم ناخدو البسكوي ونغطسوه فالسيرو ونحطوه فشي قالب يكون غارق شوية الى بيتو التيرامسو يجي فازك خليوه يشرب مزيان السيرو انا خليتو شوية ناشف

ومن بعد نضيفو نصف كمية الكريمة ونبسطوها مزيان ونعاودو نديرو طبقة اخرى من البسكوي تم نعاودو نغطيوها بالخليط اللي بقا وناخدو شي حبات الفريز مقسومين على جوج ونزوقو بيهوم من الفوق على حسب عدد القطع اللي بغينا وندهنوهم بشوية المربى باش يعطي شوية اللمعان ونغطيوها وندخلوها للثلاجة اكبر وقت ممكن من الاحسن تبات انا درت هاد الكمية كبيرة ممكن تديرو نصف المقادير

و بالصحة والراحة

دعيو معايا ومع لوستي اللي مابخلاتش عليا بهاد الوصفة الله يرزقها الصحة والعافية ويصلح ليها وليداتها ولكم بالمثل

في امان الله

jdvhlds, fhgtvd. ,gh hv,u

هدا احبيبة تيجي حسن من ديال القهوة غي جربيه على حسابي راه ريحة البيض ماتتحسيش بيها نهائيا حيت فيها الكراميل والفريز