بنات مخطوبين ومتزوجين ناس شرق واش تقال فيكم كلام جارح دخلو وفيدونا

شنو نقوليكم البنات وبصراحة شديدة جدااا
تجربتي كانت كالحلم وأعتقد أنها تنتهي الآن كالكابوس
زوجي تعرفت عليه من خلال موقع ادبي كنا نتناقش المواضيع وكانت ردوده رصينة وما الى ذلك من بعد تعارفنا على النت طبعا
كنا اصدقاء صداقة كلها احترام وتقدير ومن بعد قالي شخصيتك شدتني جدا وتعاملك يخلو من النفاق ومن بعد قالي الى تقدمت ليك واش توافقي
بصدق شديد انا كنت مضربة عن الزواج لدوافع دراسية اولا وثانيا لأني ملقيتش شي واحد تقدم ليا ويكون بمواصفات الراجل اللي انا كنقلب عليه
بعضهم يبغى يتناسب فقط مع الريافة وبعضهم من معارف بابا يبغى يزوج ولدو لبنت صاحبو وشي بغا يتسلى يخطب وصافي ويقوليك طلعي معايا واجي معايا ونا هادشي لا أقبله كمبدأ
أيوا المهم طيلة معرفتي به على النت كان نعم الرجل علم وتدين واخلاق عالية ماعمرو قالي وريني الفوتو ديالك حتى نهار جا خطبني في الدار
لقيت صعوبة كبيرة باش نفتح الموضوغ قدام دارنا ساكنين في مكناس دبا ايوا من بعد استعنت بخالي قدي في العمر وصديق متفهم ومن بعد هدر مع بابا بالسياسة وبابا انسان ديموقراطي عنده مخاوف لكن يقتنع بالمنطق وحتى ماما كانت متخوفة لكن تثق باختياراتي المشكلة في اخواني مقيمين في المانيا لما سمعوا برحال ضربتيهم بالبارود قالولي علاش خليتي كل اللي تقدموا ليك من قبل وبغيتي تزوجي بالسعودي اللي كيتزوجو كثر من وحدة قلت ليهم الناس فيهم وفيهم يعني مانحكموش على مجتمع بأكمله فقط لأنه في عناصر شوهات بيهم بحال بعض البنات في المغرب المهم اخواني رغم مخاوفهم لكن مايقدروش يغصبوني على شي حاجة وفي نفس الوقت كيقولو ليا انتي ستتحملين تبعات عنادك
المهم تعطل شوي التصريح ومحيت هو ماعندوش واسطة دفع 11 مليون سنتيم باش يخرج ليه في ظرف عام جاب والديه والعائلة ديالو درنا العرس ومشيت معاه باش نستخرج الاقامة + فيزا اقامة اخرى في برييطانيا محيت كان مبتعث هناك للماجستير المهم سافرنا جلسنا عام في بريطانيا كان رجل بمعنى الكلمة ورائع لدرجة المثالية رجعنا جلسنا شوي في المغرب باش نشوف والديا ومن بعد اواخر اكتوبر رجعنا عيدنا هنا في السعودية وكذلك للسكن هنا المهم الدار ديالنا كان خاصها تعديلات الصباغة وتغيير السراميك وتأثيث البيت وجلسنا عند امه لين يخلص البيت ومن بعد امه كانت صديقة وواعية ولبقة في الاول وكانت باغياتي نكون بحالها محيت ولدها ماراضيش بزاف على التصرفات ديالها محيت كتسافر بلا خبار اباه ايوا ومن بعد اكتشفت انها تدخن وكيعسلو هنا عادي السعودية وولدها تعصب فاش عرف المهم قالي ماتيقيش فيها لان شخصيتها ديكتاتورية انا على نيتي كنهدر بشكل عفوي مع الناس وكانت كتقولي ديما قوليليه يشري ليك ويدير ليك ويجيب ليك وهكا قلت ليها كلشي هادشي كيديرو لكن دابا ياللاه رجعنا وعندنا الدار نفرشوها منين يجيب لفلوس لكل هادشي ولما كايكون هو موجود كتقوليه تسايس على راسك وبشوية عليك يعني معايا هدرة ومعاه هدرة اخرى وكل مرة كتقولي راه بزااف ديال العيالات كيقولو ليا المغربيات فيهم سحور وزيد وزيد وكتقولي انا مكنتيقهومش وكتقولي المغرب منفتح وفيه التحرر كنقوليه داك المغرب اللي كتسمعي بيه هنا معاندناش تماك في المغرب السحر بحال الاسطورة وفي النهاية هو خرافة علاه يصحابليك اجي وسحر ولا راه المشعوذين عطا الله لكن داكشي كامل تخربيق وزيدون حنا ماشي السحور اللي صعيب صعيب هو فاش يموت الواحد اش غادي يقول لله وشنو غادي يكون المصير ديالو حنا كنخافو من الله وكل واحد علاياش تربى المهم فاش تسالاو ليها معايا وعارفات انني ماشي بحالها وماشي متكبرة على الناس بالعكس الناس بحال بحال علاش الواحد ينفخ راسه فقط لأجل المظاهر راه الجوهر هو الأهم والله فرق بين الناس بالتقوى ماشي شي حاجة اخرى كيقولك ما أفقر الناس الذين لا ثروة لهم إلا المال ومن بعد دابا بدات ليا في المؤامرات وبدات كتحرش ولدها عليا زعما قلت ندير النادي نفوج شوي على راسي بما إنه هنا الخروج غير في السيارة مكاينش تمشي على رجليك ونهدر مع ناس جداد على الاقل تعرفي انهم الى هدرو مغاديش تكون عندهم مصلحة وماكاينش شي خوف منهم وراجلي كان متحمس للفكرة وصلني ليوم الاول وفاش جا يديني وجد ليا قائمة ديال الاعتراضات انا مانقدش على سير وجا ودي وجيب مفهمتش شنو المناسبة ديال ديك الهدرة وسكت واليوم لاخور وصلني مزيان وعادي وفاش رجع يديني تقولي هزيتي بنادم وحطيتي بنادم اخر ياللاه دخلت الطونوبيل وبدا ينكر ويعاير بوحدو بوحدو وحتى مفهمنيش شنو كاين بغيت غير نفهم وقالي من هنا لفوق ماكاين لا نادي ولا حتى حاجة قلت ليه علاش قالي هكا بغيت انا اللي كنحكم قلت ليه ماشي اللي انت اللي كتحكم ولا انا اللي كنحكم راه زواج هادا ماشي حبس يعني خاصو التفاهم والحوار قالي هاه ماشي انا اللي كنحكم ووريني دبا كيفاش غادي ترجعي هنا صافي عرفتي والله على قهرة ياالبنات منقولش ليكم راه بحال شديتي مراية وكسرتيها ملقيت للي يجمع صدمتي ودبا مكيهدرنيش يدخل ينفخ ويخرج ينفخ ماشي هاداك اللي عرفتو ولا هاداك اللي دافعت عليه عارفة ان امه لا بارك الله فيها هي السبب لكن بزااف هادشي غرفتو ماعرفت ماندير راه الفقسة اللي فيا متصورهاش عييت ماندورها في راسي ملقيت لها حل وامه غادي تفرح مزيان بالانتصارات ديالها لكن انا شنو غادي ندير راه وخا بغيت نهدر معاه مكيشوفش فيا وهو من هادوك اللي دافعين كبير واش اعباد الله هو المخطئ ونمشي نحزرو قولو ليا الله يرحم ليكم الوالدين اش ندير لأني صافي فاض بيا
عذرا على اقحامكم في مشاكلي وشكرا للتفهم