رابط ط§ظ„ط¬ط²ط، الاول ها هو
https://www.anaqamaghribia.com/vb/sho…4#post10915484
بعد ما كبرات عفاف بنت كنزة
عفاف: مي لالة مي لالة, عافااك عاود لنا على حياتك منين كنتي صغيرة
كنزة تعانق ابنتها عفاف و تايدها: أه بصح أ ماما الله يخلييك
أم كلثوم: واخا أ لالة, إيوا صليو على النبي
كنزة و عفاف: اللهم صل على الحبيب مولاي محمد
تصمت أم كلثوم لولهة و تشرد ثم تتنهد: إيوا يا الحبايبات, شماش نؤولكم على زماني و فاين عشت. أنا خلائيت فالعام لي خلاء فيه مولاي الحسن على ماحكات مي لالة كان وأت الربيع و الخير. على ماحكاو ليلي الأابلة لالة رحمة الشريفة هي لي أبلت يما الله يرحمهم كاملين. سماني با سيدي لي مكرمني ربي بنظرة منو على اسم جداتو لي رباتو و عملوليلي سابع مايكون لكل حبيب إيوا ما علينا مناين بديت كنتدكر و نعأل عألت على راسي فوسط عائلة كبيييرة و أنا هي البنت الاولى د والديا. بابا بترقيق الباءين عمر الله يجلل عليه الرحمة كان مزوج بزوج نسا وحدة عئيمة معطاها ربي خلفة لالة شمس الضحى و كانت يما لي هي فالأصل بنت خالتها لالة غيثة و كانت مي لالة فخيثة و عمتي الغالية ماماين فاطمة الزهرا جداتك أ عفاف, و كانت عمتي مينة الله يرحمها و عمي الغالي مع مراتو لالة نفيسة و ولدو, إيوا و شي نسا كيجيونا تلى بيهم الزمان ملأاو لاين مشيو. مزال تنذكر دارنا الاولى بخوختها الكبيرة و صطوانها الواسع لي تيخرجك لبوز الدار و ريحة الزهر من شجر الليمون تتحيي الروح حايفين بها الطيور مرة مرة يشربو من الخصة. بيت مي لالة الكبير المفرش بالبهجة و سريرها د النحاس داك الجليسة عندها لابسة أحسن معندها فتكاشط الملف و الحرير و عاملة ذهبها و أبطة مريمة تتدوز الوأت و لا كتأرى إييه كانت امراة عارفة واخا زمانية أراات فالدار و تعلمت الله يرحمها فجناب البيت عندها كانت بيت الضياف واااسعة بلحوفها الموبر و طلايقها د الصوف و الزرابي الرباطية خواميها من الثليجة الحرة و عودها دالشوك عمر ريحة العود ماخطات داك البيت المشدودة حتى يحيو الناس إيوا و أبالتها كانت البيت لي فيها الراديو و فيها كانو الرجال تيجلسو عمي و بابا و حتى شي ولاد عمهم كانو أاراب لنا و كاين الموضع لي دوزت فيه كل الصغر عندي البرطاال داك البويت الصغيور فأاع الدار فييه تعلمت الطرز و فيه كنا كنعرفو أخبار المدينة من النسا لي كانو تايجيو يعاونو دادا ميمونة فشغال الدار إيوا و الكشينة موضع دادا ميمونة الخادم لي جات مع مي لالة فالدهاز إيوا و فاين كنا كنعسو حنا فالفوئي ز كان فيه كثرة الدرابز لي تيخرجو للرياض الوسطاني المشجر إيوا و كانو حتى الدويريات الصغار و الصقلبيات و البنيقات فاين كنت تنلعب أنا و فاطمة الزهرا. كنا محبوسات فالدار ماشي كيف هاد الوأت, حتى الشواف و لا عينين اليمامة كانت دادا هي لي كطلل منهم كنا حاجبات و حافظات للعادة في ثياب العز و السعادة, السطح منطلعولو إلا بالإذن د مي لالة لي كانت تتسير كلشي من بيتها و معاها عمتي مينة لي مسكينة كانت مهجورة من رجلها سنيين و منين. الحاصل,مزال تنعأل واحد النهار
تبتسم بعد أن رأت ابنتها و حفيدتها: نعستيوا
تخرج من الغرفة و تنزل للسفلي حيث زهور
أم كلثوم: زهور, سير غطي كنزة و عفاف و حتى نتين سير رتاح ليلك شويش حتال الصباح
زهور: واخا أ لالة تصبحي على خير
عفاف: با سيدي جا با سيدي جا
المكي: أهلا الحبيبة د فلبي أش خبارك لباس
عفاف: لباس, توحشتك
المكي: الله الله يتوحشك الخيير و أنا كثثثر
كنزة تقبل يد أبيها: على سلامتك أ با
المكي: الله يسلمك أبنتي
كنزة لعفاف: نزل خلي باك سيدك يرتاح
المكي: و قلتلهاليلك خليها أ لالة أنامعيانشاي
أم كلثوم: المكي, مالك ماجي بكري
المكي: منجيش لداري
أم كلثوم: لا أ سيدي جي. كنزى ؤول لزهور تنزليلكم الغدا و تخليلي شويش فغطير أنا ماش نطلع نرتاح فبيتي
كنزة: ياك مانمشي معاك
أم كلثوم: ماناشاي زخافة سير عمل داكشي لي ألت ليلك
في المساء:
المكي يلبس جلبابه الوزاني الخفيف و يعدل من طربوشه الأحمر, أم كلثوم في سريرها: لاين ماشي بالسلامة
المكي: ام كلثوم نتينا فعار الله, ياك قلنا ليلك ماش نمشي أنا وكنزة عند دار الحاج علي عامل العراضة
أم كلثوم: راجل هشومة حتى هو بعرايضو سير أ خيي
المكي: بديتي ثاني
أم كلثوم: الله يخليك بسع مني راسي تيحرقني
كنزة: يا لاه أ با, ماما بلا متهول على عفاف را معاها زهور
أم كلثوم: إيوا سيروا, سلم معاك على عمتك ثريا إلى كانت
كنزة: واصل إن شاء الله
شردت أم كلثوم للحظات على أنغام الأطلال لأم كلثوم, حتى جات عفاف
عفاف: مي لالة, مي لالة
أم كلثوم: أجي أ الحبيبة مالك
عفاف: دادا زهور متتحكيليش حكايات مزيونة بحالك
زهور: راني قتليها بلا متصدعك بالحق مابغاتش
أم كلثوم: يا لاه جلس نحكيليلك نتي و زهور
زهور: واخا أ لالة
أم كلثوم: كبف ألت ليلك البارح,مازال تنعأل كانت عندي عشر سنين أالو الحرب بدات مع فرنسيس و عباو الشبان الفأرا مساكن يعاونوهم
فاس 1939
صوت طرق الباب
لالة شمس الضحى: دادا, سير سوف سكون
تفتح ميمونة الباب فإذا بها غضيفة الصبانة تلبس قفطانا قصيرا من ثوب خشن و تغطي نصفها ط§ظ„ط«ط§ظ†ظٹ بإزار و شعرها شبه حاسر و وجهها مكشوف
ميمونة: دني أ غضيفة
غضيفة: كدايرة لباس
لالة فخيثة: شؤون أ ميمونة كانت الله يرحمها من أصل أندلسي و كانت تتنطأ الكاف أ من موراها ضاعت هاد العادة لي ورثتها على جداواتها
ميمونة: الصبانة أ نانا
لالة فخيثة: إيوا عبيها للسطح راه ألشي منزل فالبيت د الصابون يالاه
ميمونة: واخا أ نانا
لالة شمس الضحى من البرطال : أزي أ غضيفة تشرب أتاي بعدا
غضيفة تجلس على عتبة البرطال: يعطيكم الخير
لالة غيثة أم أم كلثوم: أوم أوم أجي جلس فوأ الطيق منتيناشي فيك المكلفة, كاملنا ماش نموتو و نمشوي للتراب حنى كيف كيف
غضيفة بعينين مغرورقتين: الله يسهل عليكم و يصلح ليكم التريكة
شمس الضحى: مالك سفتك مهمومة؟
غضيفة تتنهد: أحياني ماشي داو ليا الدري من الدوار باش إكاجي و باه شد الركنة عأنا لي ندبب, الدوار عدنا كلشي خواه بسباب التوفيس
لالة مينة أمام البرطال: حنى فحمى الله و النبي, محنى علا على هاد الفالات قوم سير كبل شغالك, الله ينجينا من هاد المغض
بعد ذهاب غضيفة للسطح
لالة مينة: دادا أجي زول هاد اللحوف عبيهم لها فالسطح تصبنهم. و لالياتي تباغك الله عليكم, بقاتلنا غير العلة د العغوبية
لالة شمس الضحى: محناسي عصينا الله
لالة مينة: لال لا نتينا حبيتي طيح ليلي النأطة, أم كلثوم أجي بنت خاي تعلم ليلك ماينفعك حسن من هاد التنخبير…
كانت عمتي مينة حارة و أاسحة مناأصها والو من غير راجل بالحأ عمرها ما بينت بلي محتاجة لشي حد الله يرحمها مسيكنة
داك العام كان ضرب الجوع الناس لي مافحالهمش بالطبع و كل ما كنا كنسمعو كان تيجينا من غضيفة
.
غضيفة: الدنيا مكلوبة خارج هاد السوار ديال فاس بنادم كيكلع فالنتيفة و إيرني باش يطيب و ياكل.
لالة نفيسة: أياس الخير يا لالة شهادشي؟
غضيفة: اييه و بنادم هلكو التوفيس و الطاعون لي ملكاو دواه حتى الجذري و السالمة طيحت عباد الله
أنا مكنتش عارفة شي حاجة من هاد الكلام داكشي علاش مشيت سأسيت مي لالة
أم كلثوم: مي لالة مي لالة
لالة فخيثة: دخل أ الحبيبة دخل
أم كلثوم: حبيت نصأصيك
لالة فخيثة: صأصي يا الحبيبة و ؤول مالأ
أم كلثوم: شنو هو الجذري و بوحمرون
لالة فخيثة: أياس الخيير, شكون تيعمر لأ راسأ بهاد البهوت
أم كلثوم: الصبانة
لالة فخيثة: الصبانة؟ سمعني أ الحبيبة أل ماحنيتي راسأ تنزل الذل متبأاشي تابعة يماك و مرات باك. نتينا راأ بنت الدار الأبيرة أجي ألس حدايا نعاينو شوشانا مرات موشي الحزان
داكشي لي كان و بئيت مع مي لالة حتى جات شوشانا اليهويدة واخا كبيرة مظاهراش فيها دايما مهلية فحالتها, وجهها كان بيض من الفضة و عينيها زورأ تؤول غير رومية هي كانت صفريوية
شوشانا: كيف نتينا يالحبيبة لباش
لال فخيثة: ربي يخليأ و يطول عمرأ
شوشانا: هادي الحفيدة أم كلثوم البيشورة دي ابنك
لالة فخيثة: إييه هي هادي
شوشانا: ملييح, قولي وجدتيلي الثوب لي ماش نخيط ليلك
لالة فخيثة: واااجد بالحأ ماشي ليلي ماش تخيطو لهاد الغزيولة
شوشانا: هاكاك واخا أجي نقبط عليك العبار
لالة فخيثة: ؤولي الحال إيف عامل على برة نتينا تتخرج و تشوف
شوشانا: شماش نؤولك الحالة دي المحاين بوفكران جيهة مكناس الويدان دي الدم و عاد زيد الجوع, عنداك يحسابليلك راك هانايا مأمنة كلشي كيف كيف
لالة فخيثة: نسأل الله السلامة و العافية.
الحاصل, داك العام حبلت يما بغيثة و منين كانت تتولد أبطات فحبل لالة فاطمة الزهرا بالحأ ولادتها كانت صعييبة سبأت رجلها و الأابلة وحلت داكشي دالله خرج الحي من الميت و سماو ختيتي على اسم يما, أنا مكنتش عارفة شي حاجة كنت تنلعب مع فاطمة الزهرا حتى جات لالة شمس الضحى عنأتني و بأات تتبكي حتى طاحت بالعظام. مزال عاألة على الجنازة د يما بكال حرف كانو خالاتي و حبايبي كاملهم إيوا و أنا كيف البهلة تنلعب و فرحانة محسيت بدأ الموت حتى خوات الدار و جات الشريكة ماماين الصديأ الله يرحمها و لهلا يطيحالها فوذن كانت صعييبة و دايما مناأشة مع عمتي مينة أما حتى لالة شمس الضحى كونت فواحد الأنت و تخلوات حتى نهار مشات الحج مع بابا و رجع بلا بيها…
..إيوا يا الحبيبة ألت ليك مناين توفات مرات با لالة شمس الضحى, جاو حباباتها من الرباط, هما عائلة كبييرة و حجرة ثئيلة بالحأ كانو خواتاتها عصريات بحال الروميات كيف أالو صحاب الملحون: السيأان مع الوجه باين لا ذرة لا لثام, إيوا و كانو كيعمرو ففاطمة الزهرا داك الساعة كانت ماش تزوج و كيؤولولها من حبس لحبس حتى عملت بالناأص و مي لالة الله يرحمها كانو جالسين على ألبها. واحد النهار مزال تنذكر أالك والو ماش يخرجوني انا و فاطمة الزهرا إيوا و بأاو على مي لالة و بابا حتى وافؤو و عملنا جلالبنا و خرجنا أنا كنت كنخرج مرة وحدة فالسيمانة هي نهار الحمام و طريئو أريبة ليلنا متصورش يا الحبيبة الرعشة لي أبطتني مزااال عاألة بالتفصيل على داك الدروب لي أطعنا كنت مبهوضة و غير تنشوف فالناس لي ماشين و ماجين بحال شي حمأة و كانت لالة نزهة تتشجع فيا و تؤول غدا منين غنقبطو الاستقلال حتى حد مغيبقى يتلافت فجيهة داك لي كانو حاجبات مخزونات الوقت راه ديال التفتح سمعوني أ حبيباتي راكم بحال بنيتاتي. مزال تنذكر من موراها كانت 1944 منين أدمو الوثيأة د الاستألال و من موراها كان ولد عمي تأبط يماه لالة نفيسة كانت ماش تموت
.
hg[.x hgehkd lk rwm leg rww ld u,dam
طرق الباب
لالة مينة: دادا , الباب ماماشيش تفتح بوحديتها
ميمونة تفتح فيدخل شاب وراء الباب و يغلقه ثم يصرخ :موالين الداار
ميمونة: أ وندي واش نتا لباس راه حنيم الحاجبات هادا
الشاب: أ الشريف راني ماجي لهم بواحد الخبار
ميمونة: شنو هيا كون كون أ وندي
لالة مينة من خلف حجاب: مالنا على هاد فضيحة العغض شكاين
الشاب: ولدكوم سيدي عمر قبطوه
لالة نفيسة من قلب الدار: الله الله على وليدي الله و طاحت بالعظام بأات تتركل حتى جابولها العود الأماري و عمتي مينة جالسة عليها: خلاص مالو فسبيب البغلات راه مفاوم ولد خاي تباغك الله علييه دابا يخغج
لالة نفيسة: سكت الله يعطك فلت أ العانس تتشفى فيا
لالة مينة: يا ك شاهدة أ يما شكتقول إيوا واخا
لالة فخيثة: سير سير راه مسيأنة معاألاش
لالة حليمة أم الصديأ و كانت حبلى بيه داك الساعة : وا بدل ساعة بأخرى الله يخليك راه مسيكنة ماشي على برجها
الحاصل, جا عمي و بابا فكو المشكيل إييوا و رجع ولد عمي غير بالطليب و الرغيب. هي هديك كان عمي الغالي ولد أخر خرج من داك الدار سبؤو ه زوج عمامي أبل مانخلاأ بالحأ هو مامشاشاي لفاس الجديد أو تحول بسباب مشاكل النسا هو مشى للدار البيضا و داك الساعة كانت بشانها استأر فيها و وولدو كان مع داك الخلية د اليد السوداء مع الزرأطوني الله يرحمو. على محال نرجعو ليلي كف ألت ليلك كنت عايشة مابين السفلي و الفوئي وأت الأراية فالمسيد د البنيتات د الحومة لي كان عندو باب من الدار وأت الشغال بوحديتو و و وأت الطرز و وأت أتاي كل حاجة بسماأها و تاوليها حتى العشويات كانو د تبراد الألب. علمتني دادا ميمونة الشغال و الشأى و عمتي لالة مينة علمتني الطرز و عاونتني حتى طرزت شواري كامل. كانت الدار غارأة فالسكات ما عدا النهار لي تيسبأ الحمام كان حفلة عندنا كل وحدة و شنو تتعرف تعدل و كل وحدة تتأسم داكشي لي صايبت و كل وحدة تاخد حأها كيف تتأسم عمتي لالة مينة في بوز الدار كنا كنغسلو وجوهنا من هاد الدوا نعاود الأخر و الدوا د الشعر و كلشي الحاصل كان كلشي متناغم كيف الدأات د داك الخصة
-لالة مينة: و طلقوا غيوسكم حنا أ نباتو هنا, يالاه معايا أ أم كلثوم حبيبة نسبؤوهم للحمام
الحمام داك الساعات بالنسبة ليلي هو الجحيم النار الحمرا كيف خلاتها عالية مجاهد كنا نعومو فحمام الصفارين. كان فيه 3 د الجلسات تنعاينو الرجال يخرجوا و من بعد تندخلو و الجلاسات لي كانو يا إما فئيرات من النواحي أو خدم تعتؤوا الحاصل من الجلسة الاولى لي باردة و لاخرة فاترة و الاخيرة لي هي جهنم و فيها البرمة د الما و الصداع على الما واخا كنا تنكريو الحمام حنى كاملنا كحريم و لكن فاليامات الاخرة و لينا ألالات تنمشيوا عادي و المدابزة دايما عمتي مينة مناأشة فالحمام و لكن الحاجة المزييونة هي مناين تنخرجو تنجبروا دادا ميمونة الله يجلل عليها الرحمة موجدة لنا النوا بالحليب و الزهر تنشربوه و نتمدوا حتى نمشيوا للدار و مور الحمام حفلة أخرى كل وحدة تتعدل منصوريتها و تكشيطتها و تساوي العطور و البخور لراجلها ما عدا عمتي مينة مسيكنة لكانت كييف الصحرا الناشفة إلى ما لسعت ما تهنى..على محال هادي حياتنا مانين كنا هانيين و صغار كنا تنأراو فالمسيد د الدار و لكن مع خطاب لالة عايشة -الله يرحمها- الناس تحركات و ولات حابة تعبي بنيتاتها للمدارس .و جا النهار لي عمتي الغالية ماماين فاطمة الزهرا سمعت للخطاب د لالة عايشة و حبت تدخل بنيتتها للمدرسة
فاس أبريل 1947
لالة الغالية: يما راه ماشي معقول حنا نبقاو هكدا غايسين فالجهل و الظلمات
لالة فخيثة: شوق سير أبل ما تسمع شي حاجة طعنأ , راه غير كلام د الراديو هدااك و زايدون سيدي محمد خالف العادة و شهر وحدة من حريمو حبيتي الأرويين يعجبو هادشي ماش نشوفو
لالة الغالية: معصاشي الله أ يما راه الوطن بدا كيخرج من قرون الضلال و الظلام
لالة فخيثة: سأت الله يعطأ فلت أ لالة نتينا عاصية خصأ العصا
يدخل عمر
عمر: أ مالكم على هاد الصداع
لالة فخيثة: لا لا والو أ حبيبي مشي ترتاح الغالية طلعتلها السخانة و يذات تتخرف
لالة الغالية: لا أ خاي حبيت نقول شي حاجة
لالة فخيثة: شعندأ ما تؤول سير سير
عمر: خليها أ يما
لالة الغالية: حبيت نقري فاطمة الزهرا مادام باباها قابطينو فالحبس مع الوطنيين من هادي شحال غايب أنا لي مكلفة بيها
عمر: من حقك أ ختيتي, يدي فيدك
لالة فخيثة: سمعني فاطمة الزهرا ئيف ما أان الحال بنت باباها أما أم أألثوم بنت هاد الدار و الله و فاتت العتبة من غير الدروس د المسيد عند لالة زهيرو ندبر معاأ ها السخط ها الرضى
إيوا خرجت عمتي الغالية لدار ناسها و أرات بنتها فمدرسة د الوطنيين كانت فيها ثريا السأاط و تعلمت اما أنا من داكشي لي تعلمت الله يسمح لمي لالة و يرحمها…
أم كلثوم: نعستي يا الحبيبة؟ زهور عبيها لموضعها
زهور: واخا أ لالة تصبح على خير
زهورّ: تلقى الخير
عفاف: لالة, لالة مكملتيليش داك النهار ملي مشات عمتك و لالة ماماين بابا و بقيتي نتينا فالدار
أم كلثوم: أ لالة و لالة الصلاة ع النبي علييك, نكمل لحبيبتي: كيف قتلييك مناين مشات عمتي لالة الغالية و بنتها فاطمة الزهرا بقييت أنا و ختيتي غيثة و خاي الصديأ لي صغار, ماكان عندنا ما يتعمل خاي تيخرج و أنا و غيثة كنبأاو مع عمتي لالة مينة. إييوا مدازشياي بزاف د الوقت جدتي بدات تتعيى و هدها التعب لحقتاش الجهد دايما صعييب تيخلي ليلك غير المرض. داك العام كمنت أفلت عشرين عام لالة فخيثة تأطعت ورأتها من الدنيا:
فاس 1949
لالة مينة: يما حبيتي شي حاجة نمكنها ليلك
لالة فخيثة مكانتش أادرة حتى تكلم عملت لها الإشارة باش تمكنلها التسبيح
اعمامي كاملهم كانو حاضرين و حتى رجل عمتي الغالية لي جا داك الساعات من الحرب, كلشي تيأرى فكتاب الله و جدتي مرة مرة تتشهد. انا كنت جالسة فوأ السرير معاها أنا و عمتي مينة. منين طاح الليل كلشي مشى و بئيت معاها أنا و عمتي. من بعد عينيها وساعوا و صدرها بدا تيتنفخ لسانها تطلأ بالحر د الموت و ربايب وذنيها نزلوا انا مشيت كلمت عمتي الغالية من البيت و جات حتى هيا حضرت ليماها مازال تنعأل أالت لعمتي مينة: مينة نتينا لي ماش تبأى من مورايا و تحافظ على الدار أنا عارفاها بلي ماش تخلى و محال تطول الله يرضي عليأ و يأملأ بالعأر الرجيح, شوشانا اليهودية مازال عندها شي دمالج فعنأ راجلها خلصوهم و جيبوهم
عمتي مينة ماصبراتش و بأات تبكي. لالة فخيثة صافي حسات بلي مابأى لها أد مافات شهدات و بأات تتستغفر حتى طلعت لها واحد الجلالة على عينها كانو خوضر رجعو بويض و ترخات داتها و طاح ليلها التسبيح من يديها. كانت نازلة واحد الرحمة فداك الساعة و وجه لالة الله يرحمها كان مبشور علييه الراحة. عمتي الغالية هي الاولى خرجت لبوز الدار و بدات تنوح و صاحت صيحة خلات الطيور لي فالشجر يطير و كلشي فاأ و نزلو لااو لي عطا الله عطاه عمتي لالة مينة من داك الليلة تأاست بمس ولات تبكي حتى طيح بالعظام. الحاصل, جاو الجيران كانت داك الساعات الخمسة د الصباح ماتت مع الفجر. جاو الغسالات و دخلت معاهم حضرت لكلشي و عطاوني حوايجها و المشط و الخرقة لي عوموها بيهم كانوا حاضيات الله يرحمهم النأطة د الما ماضيع كان شريفات. إيوا منين طلع الصباح مشى بابا لسوأ الحنة يعلم الصحافين إيوا و أبل الظهر بشويش خرجت الجنازة و لهلا يوريك يا الحبيبة لي أيطوها العظام و باات مسيكنة تتبكي عمتي الغالية الأفيطين ولا عندها طراف طراف و حباباتها حتى هما بكااو لي يأدهم. خرج التابوت تابعينو الرجال بصوت واحد كيذكر الله و حافو لمولاي دريس تما فاين صلاو عليها. حتى من شوشانا اليهودية و لالة زهيرو معلمة المسيد بكاو إيوا أ ماشي رفيأتهم و كاملهم من بلاد وحدة مناين جاو جدودهم مطرودين لا متاع لا سيدي زكري والو كل ما ملكوه خداوه الكفرة بالله ما علينا, حنا مكنا كنطيبو حتى حاجة كلشي تيجيبوه الناس حتى النهار 3 عاد عمل بابا صدأة عليها هو و عمامي و فالنهار 3 عمتي مينة أبطات المفاتح د الدار و عمتي الغالية رجعت لدارها متألة بشانطة و صنادأ رفدوهم الحمالة كلهم اثواب رفيعة و حوايج غاليين مع شي حاجة د الذهب أسموها بيناتهم و عطاو لمرات باب شي حاجة و خديت أنا شرتلة و غيثة دمليج. بأت عمتي لالة مينة هي المكلفة بالحريم لي عام على عام تينأص و النسا تيخرجوا منو حتى من غيثة تزوجت و الصديأ مشى عند عمي للدار البيضا. بئيت أنا لي كانو تينعتوني غير بالعانس و لا البايرة كيف عمتها و عمتي و بابا و مرات با مع دادا ميمونة لي مزال تنذكر ماتت من مور جدتي ب6أشهر بحال إلى كانت رفيأتها هنا و لهيه سبحان الله… من داك النهار تأفل باب لالة فخيثة و مبئينا تنذكروها غير فالأعياد و لا من الجمعة للجمعة حتى من صاحبتها شوشانا عباها ولدها عندو لفرانسا في العام لي تزوجت فيه أنا من مور الاستألال ب4 سنين
كييف أتلك رحلت شوشانا اليهودية داك العام لي تزوجت فيه كنت مازال ما تزوجت و لكن بدينا تنخرجوا و تنشوفوا الدنيا أنا و عمتي لالة مينة و كانت معانا دائما شوشانا هي لي تتخرج معانا و تدخل. داك النهار خرجنا من الدار و كنا أاصدين الملاح نحوفو لعندها و عاد نمشيوا للئيسارية
فاس 1961
لالة مينة: الالة و هاد الملاح نهاغ على نهاغ تينأص يا ربي السلامة
أم كلثوم: إيوا ما سمعتيش داك النهار سعدة صاحبة شوشانا أاتلك الناس تتمشي لشي بلاد ديالهم عاد صابوها
لالة مينة: بلاد ديالهم؟ سكت سكت هادي هي بلادهم راهم من هنا و لهنا داكشي غيير بهلان
في دار شوشانا كان راجلها جالس مألأ فبوز الدار و هي تتخيط فواحد الثوب بيض بحال إلى مخبعا فييه شي حاجة و حداها بزاف د الصرات تتجمعهم فالشانطات
شوشانا تتصنع: شلام, أش خباركم لبااش؟
لالة مينة: شوشانا نتينا عاغفاني معندي مع الترهبيين ؤول مالك؟
موشي راجلها تيتنهد و كي جاوب فموضعها: لالة مينة حنا ماشي نمشيوا من هنا
لالة مينة مصدومة: شوشانا جااوب ؤول شكااين ماش تمشيو عليينا حتى نتوما. تخلييو بلاد د جدودكم و حبايبكم و تمشييو
شوشانا: وا حبابنا لي عباونا لهادشي العزييزة, ألبي راه دم من هاد السفر ماحبيتشي نمشي ماحبيتشي نخلي بلاد دي جدودي
و طاحت تتبكي أنا عزاات عليا بالحأ عمتي محنتشاي و كانت دايما تتؤول اليهود راهم يبكيو فالعرس بالبحوط..
موشي: شماشين نعملوا كلشي مشى و حنا ماشي نمشيو عند ليشيرنا لفرانس. كيف تتعرف الوقت تبدلات و جا الاشتقلال و لكن حتى حد مامجال يشوفنا حجب دي بن بركة شعييب و محمد الخامش ربي يرحموا الوقت ولات خايبة هادشي لي قال الحجاان لي ماش يمكنلنا وريقاتنا
الحاصل, داك العشوية دوزناها مع شوشانا و صحاباتها كانوا هما النسا لخرات و الكبارات من جيل عمتي و جدتي لي رحلوا. و من الصدف كانت أول مرة و اخر مرة شفت واحد الجنازة عندهم و مع الأسف ماكانوشاي أدرين يكملوا المراسم لحأتاش كانو الرجال ناءصين و كلهم كانو حازنيين على خسارة داك السيد لي كان نأايري و حتى على فراء بلادهم. كانو تنوحو و يؤولو: بوه بوه علييه خلى خبيزتو فالتاقة و مشى الاخرة جيعان..من داك العهد ما بءى الملاح كيف كان بداك الديور لي فييه و الرجال و النسا بلباسهم لي معروف مزاال تنعأل على شوشانا بكسوتها الكبيرة لي مطرزة بالنطع و الحراز المخدوم و شربيلها. إييه أ الإيام.. كانت أول ليلة ليلي تنتعطل برا الدار أنا و عمتي منين جا بابا توادع مع موشي لحأتاش كان صاحبو بزااف و بأى معانا فواحد الموضع جيهة جنان السبيل حتى شفنا الطونوبيل لي جات عباتهم مزال بين عيني شوشانا ألبطة حماتها لي كانت امرأة كبيرة و تتؤول لها: محبيتش نمشي, خلييوني خلييوني أنا هنا فبلادي. ترابي في فاس شوفو فيا بوجه العجييج أنا حبيت نبقى فالبلاد دي جدودي و مناين طلعت صوتها بكاني و هي تتؤول: يا غربتي فبلدان الناس و الثوب لي لبستوا هو لي عراني أنا المغرب بلادي و هي أرض دي جدادي .
و عرفت من مور زواجي بلي تكرفسوا و تمحنو فالطريأ حتى وصولو لفرانسا و من تما عباوهم لإريس ديالهم و شوشانا بأات دايما معلأة بالبلاد حتى مناين جات عروستها هي و ولدها و مشيت شفتها عرفتني غير من داكشي لي حكات لها و مزال معاها دابا نييت علاءة مزيونة. إيوا و داك الشهر انا نييت تملكت للمكي منين شافتني يماه فواحد الحضور و خطبتني في ألب دارنا و تولى بابا شغالنا
عفاف: و مقلتليش أ ميمة كيف عمل جدي حتى تزوجك
أم كلثوم تبتسم ضاحكة: إيوا يالحبيبة شماش نؤولك, كانت إيام خيير و فرحة و ألوب هانية- بما أننا تكلمنا عن عرس كنزة فلا داعي للإطالة في الحكي- و لكن المشكل لي كان هو لوايساتي ثريا و خديجة شربوني المرااير مكنتشاي جابرة شي مشكيل مع المكي لي تفاهمت معاه و توالمنا من الاول و حتى مع حماتي و لكن هما خلاوني ماش نحماأ أنا و السعدية نوطتي
فاس منزل المكي:
ثريا: دادا عبوش سير قول لداك المغصوبة د أم كلثوم تقوم راه الشمش ولات توسطات بوزالدار هادا راه سميتو التنخبير غيير مزوجة تبقى ناعسة
أم كلثوم من الدربوز: إيوا نحمد الله و نشكروا لي مزوجة و زماني لي مفششني و كيئولي لهلا يمحنك
خديجة: إيوا مالو لخاطرو هاهايوات نتينا حياتك دازت غير فالملاح مع اليهوديات زعما ماماشيش تعلم واخا غير شويش د تكهانت ضبعتي خاي مسيكن
أم كلثوم: إيوا يحسبها عليك الله, أنا بعدا صبت زماان و زماان نييت كية لي مجبروش
ثريا: إيوا كيتك اللهم جلاس العناية فدار با و لا زواج لي منصيبشاي فيه حتى دويرة و نسكن مع لالياتي و من الفوق مزال عاكرة بلا ولاد ماش تخلي خاي لا خلفة
خناثة: إييه الله يمسخكوم, و ءرو عليكم مرات خاكم بئيو واحلات عندي هنا ربايبات الهم
كانت إيامي معاهم كل صباح نكيير حتى نهار تزوجت خديجة و مشات لصفرو و السعدية نوطتي تحولت للرباط بئيت مع ثريا و لكن تفاهمنا واخا بائي شويش د النئاش و لكن غير تحولنا لهاد الدار و رجعن حبايب
ثريا تبكي في بيتها: الله يا ربي و كتبتي عليا راني راضية بقسمتك و قابلة بهادشي و لكن راني كبرت و مشى عليا الركب. الجيل لي جا يصيبني هنا حدا يما و مكرهتشاي شي زمان يسترني راني ماش نموت هنا كيف الجيفة, نهار تموت يما مكين لي ماش يعرفني مشى الزمان لي فيه الحباب و كنا ملمومين
أم كلثوم تدخل و تعانقو: لهلا يحوجك أ حبيبة راك عزيزة عندي الله شاهد إلى حتى انا محبيتشاي نمشي من هاد الدر والفتكم ز لكن خاك عمل رجلوا فالكانون و نينا عارفاني انا واحلة فروحي و هادا الوأت لي نوجدو فيه ملازمشاي تكون نكدانة
ثريا: سمحلي أ خيتي أم كلثوم راه الصغر و الجهد واعرين و مكانشاي عندي العقل
أم كلثوم: مكين باس, وا ؤوم ؤوم عاونني فالرحيل و لا حبيتي تعمل السبة بش ماتعاونش
إيوا الحاصل جيت هنا و ولدت كنزة و جات زهور داداك من العروبية غير صغيرة و تربات عندنا . كان المكي فرحان أد حؤو فالدنيا و سميناها كنزة على سميت جداتو العارفة بالله لالة كنزة الشريفة. و عملنالها السابع أ الحبيبة كيف سابعك. و بدات تتكبر و خرجت حبلى عاود و لكن فالشهر الاول د الحبالة مزال تنعأل ف71 جات عندي ثريا
أم كلثوم: زهور فتح الباب
فتحات زهور الباب و دخلت ثريا وجها مصفار و ذابلة
ثريا من الصطوان: الله أ خيتي أم كلثوم, الله واش صابنا
أم كلثوم أنا شهقت و تخلعت أبل ما نسمع والو: شكاين أ ثريا؟
ثريا: خاي مولاي احمد قبطوه العسكر أ حبيبتي و عباوه للعادر
من الدوخة أنا معألتشاي حتى برت الأابلة لالة الطام جالسة عند راسي و غير فأت أتلي البرك في راسك راه طاح ليلك التلاد
..إيوا منين وليت شويش لباس أبطت الكار و تحركت للرباط أنا و جارتي لالة مهاني لي كانت فنفس الوأت تتجي للسعدية. إيوا أ لالة حبيبتي مشينا و كنت بحال شي وحدة عمرها شافت الدنيا. داك الساعة كنت أليل فاين تنخرج للمدينة الجديدة عند شي حبيبة من الفاميلة, كنمشي فالسيارة و نرجع فيها. أما دابا مشيت مع لالة مهاني و نزلنا في الأامرة و خدينا طاكسي بيض للباب الحد و شحال داز بينا من طرأان و طولها علينا كيف عرفت فالتالي لحأتاش داز من أكدال و ناحية الصبيطارات تما كانت مدينة أخرى عاود و العمارات بويض أعنزو ليلك العنأ و الناس مفتحة بزااف. تشوف المراة متؤولها غيير رومية بلباسها إيوا وصلنا لباب الحد و من تما دخلنا فالزنائي و الدروبة لي كانو متيجيو لفاس فوالو هنا الدرب واسع و كبير و مصبوغ بلوينات مبهجة مع الغرس أبالة كل باب. على محال وصلنا لسيدي فاتح كانت ساكنة أبالتو السعدية و غيير دخلنا تعانأنا و بأت تتبكي مسكينة حتى سخفت. إيوا صبت تما حماتي و لوايساتي بزوج و المكي هو و راجل خديجة تيجريو و يصأصيو و كانو حتى فاميلة السعدية لي منين جيت نحأأ و نشوف جبرت مرات عمي لالة شمس الضحى تتجي ليماها و خواتات شمس الضحى الله يرحمهم وأفوا معاها وأفة د الصح مشاو للدار البيضا مع الرجال و ألبوا فدرب مولاي الشريف و صأصاو حتى صابوه مأبوطط مع صحاب داكشي د الماركسيس و ماركسيين على محال كان المتعوس فالسياسة إيوا و بأاو تيطلعو و ينزلو حتى حولوه من غير محكوم و حددولو الحكم ف خمس سنين من بعد ثمن سنين لي دازت بلى حكم. 8 سنين حنا كاملنا دوزناها فالعذاب و ما حنا في فاس ما حنا فالرباط. ثريا و لالة فخيثة جلسو معاها و أنا و المكي و خديجة كل سيمانة ماشن ماجين حتى مرضت لي كنزة و بئيت تنخليها غير عند لالة أم هاني هي و زهور حتى دخلت للمدرسة عاد تفكيت. هو منكدبشاي عليك أ حبيبتي أنا كانت من الجنة و الناس كل سيمانة ماشيية للرباط و فرحانة بالدوران أنا و ثريا فالئيساريات و الأولياء مكاينشاي شي والي ماشفناهش من سيدي اليابوري حتى لزاوية سيدي الغازي. هو واخا كانو منزلين العساسة على دار السعدية متدخل و تخرج حتى يفتشوك و ديما مراأبين و كنا حتى حنا واأفين معاها لحأتاش حتى حد ما بأى كيجي من غيرنا راه 8 سنيين عمر د كنزة داك الساعات. إيوا منين تحكم نألوه فداك خمس سنين من العادر لبولمهارز عاد جابوه لحبس لعلو. نهار مشيت نشوفو بكيت على لوي كيف ولى من مولاي احمد لي غيير سميتو كفات فالحومة أاري و مفأه و إابط الشهادة د فرانسا ولا كيف العظم و نسل. إييه دوز الهم لكحل حتى هو. و داك الحبس مايدخلو غير الصكع تشوف هم الناس تنسى همك لي كان عندي أنا هو الولاد مخليتش علييهم حتىحاجة و مجابشاي الله
.
عن طريق : samsung – GT-I9300
المشاركة الأصلية كتبت بواسطة maryem17208 
ههههههههههه الى كان والله ما نحرمك منه شكرا على المرور اختي