البنات المغتربات فكل انحاء العالم عتقوني الله يجازيكم بالخير

السلام عليكم

---

hgfkhj hglyjvfhj t;g hkphx hguhgl ujr,kd hggi d[h.d;l fhgodv

السلام عليكم
قصتي قصة كبيرة منين غنبداها ومنين غننهيها الله يخليكم ساعدوني
انا تعرفت على شاب من مصر وتزوجنا بتوكيل وجيت لمصر من شهرين ونصف والاوضاع فمصر كيف تتعرفو الشرة الي كان خدام فيها قفلة حيت اجنبية بعد التورة وكل متيعمل مشروع تيفشل ومن تزوجنا الاوضاع سائت اكتر
المهم دابة قال تيفكر يسافر لبرا وتبقلب على شي فرصة باش يخرج وقال هو غيبدا من اول وجديد وقال بلي حنا لزم نتفارقو حيت هو كل مشاكل الدنيا تجمعات عليه ومبغاش يضبمني معاه واتا شاكة بلي هدشي غير خطة المهم حالي ميعلم بيه الا الله سبحانه انا لي تعرفت عليه وانا لي ختارت واهلي كانو رافضين والنتيجة هاهيا انا منقدرش نرجع المغرب وحتى الى قدر الله وتفارقنا منقدرش نرجع ومنقدرش نبلغ اهلي بلي صار الله يخليكم نصحوني اش غندير والله التعاس مبقاش يجيني

اختي الله يفرج همك و يصلح ليك الاحوال
واش عندكم اختي شقة ديالكم جالسين فيها
اوى قولي ليه يمشي يقلب على خدمة سواء فمصر او خارج مصر و انتي جالسة فدارك حتى وكان ربي يفرجها عليه
اختي انا كنشوف هادي غير سبة اما الى جا كل راجل مر بمشكلة و جلس من الخدمة يطلق مراتو كون راه العيالات كلهم طلقو
المرا خصها تصبر على راجلها فالسراء و الضراء حتى يحن عليه الله
عرفتي اختي العقلية ديال المصريين راه مختلفة علينا هما لازم الراجل يتعب و يدمر حتى يتزوج المراة و زيدي عليها الشبكة و المهر و القائمة و كلشي و لازم يشوف اهلها باش يدير ليهم الف حساب
هو كان لازم عليك يجي للمغرب و يتكرفص مزيان و يطلعو الوالد و بنزلو باش يعرف قيمتك ماشي ياخدك بالساهل المهم لوقع وقع لازم تهضري معاه و تقولي ليه سير خدم و انا جالسة فداري حتى يحن عليك الله و نلتاحق بيك ان شاء الله اما الى شفتيه راسو قاصح و بغى يرميك ديري زيارة لبابك و يجي يتفاهم معاه راه كيخافو من الرجالة بحالهم و كيديو ليهم الف حساب علاه انتي شايطة ياخدك شهرين و يرجعك لداركم
غير دعي اختي سيدي ربي فقيام الليل بزاف و استغفري بزاف و الله يفرج همك اختي و يسر ليك الامور و يهدي ليك زوجك و يبقى شملكم مجموع ان شاء الله

اختي الله يفرج همك ويفك كربتك امين ياربي
اختي والله تاحاسة بيك وهازة ليك الهم ولكن اختي هادا غير بارك يتسبب على اي راجل يوقع في مشكل يقول لمراته نتفارقو ماشي معقوووووووول
خاليه اختي يمشي يقلب على الخدمة واخة يبني اي حاجة الخدمة ماعايبش المهم هو يضبر على راسو
وانتي وقفي معاه حتى دوز هاد الازمة
والله يفرج همك

شكرا لك الختي بزاف على ردك والله ريحني اه عندنا شقة خاصة وعندو مشروع صغير تيرد لينا باش نعيشو ولكن هو بغى اكثر والاكثر لي خلاه يدير هكا انا مكرفستوش فاللول باش يعرف اشناهيا الزوجة الله يهيده وصافي شكرا لك اختي

بصح انا كلات ليه ههادشي وبلي غنصبر على كولشي حتى فكرت نقلب على خدمة وهو رفض نخدم الله يصاوب وشكراليك الحبيبة

اوى اختي مادام عندك شقة ديالك جلسي فيها و قوليه يمشي للخارج يقلب على الزيادة لبغاها و انتي عيشي بمدخول المشروع و صبري و دعي بالليل و النهار يهديه الله و يرجع لصوابو
القناعة اختي كنز لا يفنى
ماشاء الله عندو دارو و عندو مدخول وخا شويه الحمد لله و الشكر لله وخا الواحد ياكل كل يوم الخبز و الزيت العود حتى الامور تتفرج ماشي مشكل راه كاع العيالات صبرو
انتي خليه يدير لبغا يمشي للخارج او يبقى فمصر قوليه انا غادي نجلس فداري و لي عطيتيني باش نصرف راه غادي يقديني ان شاء الله ربي الحمد لله كيدير البركة فاي حاجة المهم الانسان يكون قانع
غير هو اختي نصيحة مني الى نضرتك لراجلك مدبدبة احسن اجلي انك تولدي معاه شويه حتى تعرفي راسك من رجليك و تعرفي علاش ناوي
انتي غير بقاي تصلي قيام الليل و تدعي ربي يهديه و يفرجها عليك
و الله يسر ليك اختي الامور و يفرجها عليك يارب

ربي يفرج عليك همك اختي ويدير ليك تاويل ديال الخير وصبري معاه حتى تعرفي علاش هو ناوي

الله يسير ليك اختي

الاخوات وفاو و كفاو راه كلشي قدام عينيك غير خدمي عقلك فاي خطوة ممكن ديريها.. دخلت نطلب ربي يفرج همك و يرزقكم حلال و يهدي بال الزوج ديالك