مبـاشـرة معكم عشـانا بطريـقتي ومن مطبخـ سميـرة ـي :

السلام عليكن ورحمـة الله وبركـاته ،
هاد المـرة جـايبة لكن طبق بسيط وبمقـادير متوفرة في أي مكان ولكن بطريقة
جـديدة وكـأنك في مطعم راقي ، باش تبرعي لي زوجك أو وليداتك بأقل ثمن
وكنتمنى إن شاء الله يعجبكم هاد الطبق .

المقـادير :

فخاد دجاج أو بيبي ( مع الورك )
القليل من لحم صدر الدجاج
بصل
طماطم
بورو
توابل ( ملح ـ بزار بيض ـ عود قرفة ـ سكين جبير وخلطة توابل ديال الدجاج أو أي القليل من المروزية )
أعشاب منسمة ( ورق سيدنا موسى ـ زعتر سالمية …..)
ثوم


أرز
جلبانة
جزر
أسبيرج

الـطـريقـة :

ـ أولا غنبدا بالفخاد ديال الدجاج غسلتهم مزيان ( بالحامض والملح أو بالخل ) وخاص يكونوا
مقطعين مزيان يعني بلا تقطع ليك الجلدة ديالو وتخلي الوراك ديال الفخاد يعني الجهة الفوقانية
حيت غادين نعمروهم .

ـ دابا بحال في الصورة كتاخدي موس رقيق وماضي وكتبداي تبعي على العظيم حتى تحيديه
كامل ولكن بلا تقطعي الفخد ( راني صورت ليكم المراحل لأنني عرفت راسي ماغنعرفش نشرحها مزيان هههه)

ـ دابا درت التوابل الملح البزار وعاود عصرت عليه القليل من الحامض ودرت السكين جبير وشووووووووية
ديال راس الحانوت أو المروزية وممكن تديري خلطة توابل الدجاج اللي كتكون كتباع جاهزة أنا اللي عندي
ماكتعجبنيش مكترين فيها الكاري ومابغتوش يطغى لي على المداق بالجهد ديالو .. لأن بغيت كولسي يجي
خفيف لذلك تبلت الحد في القد ههههه

ـ وحتى قلت صافي وغنخليه في الثلاجـة شوية يرتاح وبان لي الطايبر اللي داير فيها واحد الخليط عجيب ديال
الربيع والثومة وأنا نزيد عليهم شوية واحد المعيلقة صغيييييورة هههههه
ـ غطيتوا وإلى الثلاجة خليتهم يتشربوا واحد جوج سوايع ..

ـ دابا من دازت الساعتين : جبت بصلة صغيرة ومطيشة قدهـا وحبة بورو
ونضفتهم مزيان وقطعتهم مكعبات صغيرة وبديت بالبصلة شحرتها مع الزيت
حتى طابت مزيان على نار خفيفة باش تطيب على خاطرها وبالتالي تطلق
الحلاوة اللي فيهـا عاد ضفت عليها المطيشة اللي منقية ومزيلة لها اللب
ومقطعها وخليتها نفس الشي حتى تعسلت مع البصلة .

ـ وباش تنضفي البورو مزيان ومايكونش فيه الأتربة والرمل اللي كيكون بين ا
الأوراق بالداخل حيدي بعدا الورقـة الأولى وقسمي ليه مؤخر الساق بالموس
على جوج X وديريها تحت الروبيني وفركي بيديك ونتي كتحلي الوريقات
وهكدا غاتكوني متأكدة أنه مابقى لك حتى ذرة تراب .

ـ دابا قطعي البورو مثلا على الطول وخلي وريقة بحال في الصورة
أنا غنوريك باش غتنفعك .
ـ كنقطعوا البورو صغير تاهو وكنزيدوه على الخضر يتشحر ( مع البصلة
ومطيشة )
ـ ودابا غتاخدي ديك الوريقة ديال البورو غتحطي فيها داك الورقية ديال سيدنا
موسى والمنسمات اللي عندك أنا عندي السالمية زارعاها ودرت جوج وريقات
وعويد ديال القرفة وعويد ديال الزعتر يابس ولفيتهم في وسط داك الورقة اللي حتفظنا
بيها ديال البورو وهي بوحد كطلقيها وكترجع تلوى ودوريها بالخيط ديال المطبخ
باش ماتفتحش ليك وهانتي عملتي مايسمى بالبوكي ڭـارني في المطبخ العالمي
كيندار للتنسيم المرق بمختلف أنواعه .

ـ دابا نرجعوا لنصيبنا اللي كنا كنصبوا فيه ، كتبقاي تقلي حتى كيتقلاو مزيان
العناصر ماكلين وكيبداووا يتحمروا عاد زيدي شوية ديال التومة على حسب
ذوقك ومطيشـة الحك لا بغيتي ولكن راس الملعقة فقط ، عاد تبلي بالملح والبزار
والسكين جبير .

ـ دابا خديت نصف هاد الخليط وخليتوا على جنب في واحد البول .
ـ ورجعت ومرقت على الباقي بماء مغلي وتخلي داك المرق كيطيب
شوية مع إضافة داك البوكي ڭارني اللي دناه بالبورو والمنسمات .

ـ دابا خديت صدر الدجاج ( بالقدر اللي غيعمر لي الفخاد اللي عندي )
قطعتوا ودرتوا في الكاس باش غنطحنوا .

مني تطحن مزيان كنتقلبي لفيه في عصب أو أي خويط كتحيديه وضفتوا
على النصف اللي حتفاظت بيه من العمارة ديال الماطيشة والبصلة ولبورو
وممكن تزيدي واحد القبيصة الملح بحسب الدجاج فقط ( أنا مادرتهاش )

ـ دابا جبدت الفخاد من الثلاجـة وعمرتهم بهاد الخليط وخليت شوية
الفخد ماعامرش 100% لأنه غادي يتطرطق لعمر بزاف .

ـ خيطهم بالراندا هههههه والطرز الرباطي ههههه زعم خيطي لهم
الـفتحة باش ماتخرجش العمارة وحـاولي باش يبقاووا مقادين .

ـ دابـا نحطهم في المرق ونخليهم يطيبوا واحد العشرة الدقايق
ومن تفوت ناخدهم لصينية ديال الفران ونضيف عليهم من المرق
باش نبقى نسقيهم ويتحمروا بلاما ندهنهم لا بزبدة لا بزيت .

ـ دابا نخليووا الفخاد تكمل طياب وتتحمر في الفران . وندوز
للخضر باش غنرافقوا .

ختاريت الجزر والأسبريج باش يجيووا الألوان متناسقين ولأنهم
كاينين عندي ، ماشي شرط تقيدي بيهم ديري اللي عندك .
ـ الجزر نقيتوا وخليت ليه شوية من القبعة هههه وقطعتوا
على جوج درتوا في المرق اللي بقى عندنا في الكوكوط حتى طاب .

ـ والأسبيرج تاهو نقيتوا وسلقتوا .وسوطيتوا في مقيلة مع شوية الزيت العود
ومليحـة .

ـ ومن بعد حيدت الجزر ودوزتوا في مقيلة بحال شكل الأسبيرج باش يجي كيبري .

ـ دابا منين يتحمر الدجاج كندير داك المريقة اللي كانت معاك تثقل في مقلاة باش
تجي هي لا صوص باش غنسقي .

ـ وطحنت جلبانة مسلوقـة تاهي ودوزتها من صفاية باش تجي صلصة ناعمـة .
ـ نطحن الجزر الأجزاء اللي مافيهاش العريشات مع القليل من المرق اللي طابت
فيه . واللي بقى لي من المرق نطيب فيه الأرز أنا درت أرز كامل ( ممكن تزيدي
فيه الماء باش يقدك ) ولما طاب زدت عليه شوية جلبانة وخليتهم .

ـ دابا كولشي واجد بقى لنـا غي التقديم المونطاج هههه
أنـا ها صور تقديمي كندير ضوير ديال كل صوص بواسطة
ملعقـة وكنحط في جنيب زليفة ديال الروز ولاصوص ديال المرق
المعقدة تحت أو فوق الفخد ممكن تحطيه واقف ( قطعي ليه التحت
باش تولي عند قاعدة يوقف عليهـا وما تنسايش تحيدي الخيط قبل
ماتقدميه راه عيب تحطيه هههه )
وكنستف الخضر على شي جنيب وهكدا هاهو مقدم غزال ومشهي
وطبق كامل فيه كولشي ..

lfJhaJvm lu;l uaJhkh f’vdJrjd ,lk l’foJ sldJvm Jd :

• سـميـرة,
• nezbouj,
• جنات17,
• ام للا ياسمين,
• souka nit,
• ام اشراق واميرة,
• issra09,
• omm zaynab,
• om reda w nada,
• مريتا,
• قوتي في صمتي,
• أم الأميرة 1