لنصحح بعض العبارات في كلامنا.

السلام عليكم ورحمة الله، كيفكم اخواتي، بغيت نشوف رايكم فواحد القضية يمكن ليكم حتى نتوما تكونو فكرتو فيها شي مرة.
هو فبزاف دالمرات ملي كانمشيو نتسخرو، اولا ملي كانبغيو نشريو شي حاجة ماكانتابهوش 100% للكلام ديالنا وكانديرو بعض "الاخطاء" ليكانقترح نبينوها فهاد الموضوع، كل وحدة تصحح كلمة كانستعملوها وماكانتابهوش ليها. وفهاد الموضوع أيتذكرو اسماء منتوجات عربية او اجنبية ليحنا ماشي ضدها وا إنما غادا تذكر فسبيل الافادة.
ممكن نكون تطرقت لهاد الموضوع بطريقة غير مفهومة، انا انبدا ببعض الكلمات وليمتافقا معايا فالفكرة ديالي توضع حتى هي كلمات نصححو بيها التعابير والطلبات ديالنا.
مثلا، كانمشيو للحانوت وكانطلبو "تيد" وكايعطينا مول لحانوت "أومو" وكانزيدو مع الطريق، هذا كايبان لي تناقض، إلا كنت بغيت نيت "تيد" نستفسر علاش ماتعطاش لي "تيد" اولا إلا ماكانش عدو غير ماركة اخرى ديك الساعات نقبل بغيرو، اذن إلى بغيت باش نصبن، نطلب "صابون دالغسيل" بلا مانذكر اسم المنتوج إلا إلى نيت بغيت شي منتوج بعينو.
مثال آخر، كانطلبو "كلينكس" والصحيح اننا نطلبو موشوار او منديل.
مثال آخر: "بيمو"، بيمو اسم شركة، فالمقابل خاصنا نطلبو بيسكوي..
مثال آخر: "كنور">>>>>ضامة البنة.
هاد القضية نطبقوها إلا كنا بغينا شي حاجة بغض النظر عن اسم منتوج بالضبط، فحين إلى بغينا شي منتوج بالتحديد نطلبوه باسم المنتوج لا بالنوعية.
نتمنى اني نكون وصلتلكم الفكرة ديالي، ولي كاتشاطرني الرأي تضيف اسماء كانڭولوها من غير مانتابهو انها اسماء شركات لا نوعية المنتوج.
وشكرا على المتابعة.

---

gkwpp fuq hgufhvhj td ;ghlkh> g,.[d ;ghlkh

اه فعلا حنا بقوة ماكانت الماركة المعنية هي الرائجة ومحتلة السوق ولينا نعمموها على اي منتوج اخر انا اللي جاني فبالي هو دانون ممكن نقولو ياغورت او اسم الشركة اللي بغينا او كاوبيل كانقولوها للشكلا غبرة

نعم اختي, كلامك كبير، شكرا على الكلمتين، فعلا فسياق الفكرة.

شكرا أختي على الموضوع هادشي عاد عندنا أكتر من عادي كبرنا عليه فمتلا نيدو عوض حليب غبرة و سينيال عوض معجون الأسنان نيسلي عوض حليب مركز

شكرا احبيبة على المشاركة ديالك.

اختي تعودنا نقولو هادوك المصطلحات حيت تيجيونا ساهلين و مزروبين و المقابل تاعهم تيجيك تقيل في اللسان و فالنطق اما سهل
مثال ..
_ عطيني مسحوق الغسيل
_ عطيني تيد
طبعا التانية اسهل و تتجيك معا هضرتنا عادي لي ولفنا ها , اما الجملة الاولى و الامتلة لي عطيتي تتجيك بحال اللغة العربية اولا لا هدي وجهة نظري

مولينيكس = جمييييييييع أنواع الطحانات الكهربائية
طيفال = جمييييييييع أنواع المقلة الغيرقابلة للإلتصاق
توفيتا = جمييييييييع أنواع الفنيد الرطب
صابون الكف = جمييييييييع أنواع صابون الحجرة
زيت لوسيور = جمييييييييع أنواع زيوت المائدة
خميرة الزا = جمييييييييع أنواع الخميرة الكيماوية

بالمفهوم المغربي طبعا

ههههههه

هانتي ڭلتيها، "حيت ولفناها" وأكيد إلى ولفنا راسنا نڭولو المقابل ديالهم غاتجينا عاود ساهلة، مسألة ولف وصافي، نڭول 2 كلمات عوض وحدة حيث مقتانعة بافضليتهوم بالنسبة لي احسن من اني ديما نتبع داكشي ليولفنا.
وشكرا احبيبة على رأيك المحترم.

كلمات فمحلهوم، شكرا اختي على المجهود، فعلا هما عبارات كثار.