:: للمرضعات الصائمات ::

رمضان مبارك بإذن الله تعالى على جميع المسلمين والمسلمات ، يارب تقبل منا الصيام والقيام وصالح الأعمال وأعنا على طاعتك وحسن عبادتك اللهم آمين .

بالنسبة ظ„ظ„ظ…ط±ط¶ط¹ط§طھ كيصعاب عليهوم شويا الصيام لأن الجهد كلو كيمشي فالرضاعة وعاد يلا كان السهير وشي طفل آخر محتاج للرعاية كاتولي المرا مسكينة تكمل النهار غير بالدعيوات، وهذا حالي والحمد لله

ولكن الحمد لله لقيت راحتي على هاد المسائل نتمنى للي جرباتهم ينفعوها كيما نفعوني كيدوز النهار عندي عادي وهذا اولا بفضل الله تعالى مجييييب الدعاء
وتانيا :
– بالنسبة لوجبة السحور كانداوم على السحور باللبن والتمر وجبة جد مفيدة وكافية باش تمدني بالطاقة اليوم الموالي، حتى أبو العيال ولا كيتسحر بيهوم وعجبوه

– فالفطور كل نهار ورزقو ولكن المهم للي بغيت نقووووول هو الكروية مابقاتش تخطاني فأتاي، يعني فاش كاندير بريريد ديالي ديال اتاي حتى نطفي عليه ونلوح فيه معيلقة كروية حبوب ونشربو عادي، سبحان الله هي مقآآآومة للعطش بحكم المرضعات كيحسو بعطش شديد خلال الصيام، والكروية كاتبرد وكيولي العطش بنسبة قليلة فاليوم الموالي, واخا ماداقها مازوينش ولكن كاندوزو على ود الفوائد ديالها, وهادي حتى هي أبو العيال ولات كاتعجبو و كيشربها

– واخيرا وليس آخرا وجبة هربل ( اولا المفلق كيما يسميوه شي ناس ههه) جد جد مفيدة لادرار الحليب، سواء فالعشاء او السحور او الفطور وقتما قدات المرا تاكلها فهي مفيدة كاتشبع وكادير الحليب بعد فضل الله ورحمته, وبطبيعة الحال ابو العيال مايجيش حتال هادي ويخليني بوحدي

هادو كاني تجاريبي التلات للي غادي نكمل عليهوم رمضان كامل بحول الله وقوته لأن فعلا لقيت فيهوم راحة وفرق كبير وخصوصا الشهية عندي قليلة فهادو كفاوني، عرفت راسي طولت سبحان الله ماكانعرفش نختاصر