لكيصدق ليها الخبز تعطيني الطريقة

شفي احبيبة انا خبزي لي كلاه تيحمااااااق عليه ماشاء الله لا قوة الا بالله تيجي بحال الكيك

وطريقتي بكل امانة هاهي :

ديري الفرص القياس لي يكفيك انت عارفة وشوية ديال الخميرة ماتقلليش وماتكثريش من الاحسن الخميرة لي تتكون حبيبات انا تنفضلها وهي لي تنعمل
والملحة طبعا الماء يكون دافئ مشي سخون ومشي بارد

المهم خلطي كلشي عادي لكن خلي العجينة مرخوووووووفة يعني مشي قاصحة بحيث تبقا تلصق لك في اليد حاولي معها بالدليك غير شوية مشي بزاف وصافي خليها هكاك خفيفة تخمر في القصعة

من بعد قرصها في اللاطة لي غدخل مباشرة للفران يعني ماغتحتاجيش الطراح لالالا دخليه باللاطة ديالو للفران

ملاحظة غيعدبك شوية في التقراص وهدا هو السر في ان الخبز تيجي بحال الكيك ولكن صبري واستعيني بالدقيق يعني ديري الدقيق في اللاطة ودري شوية على الكمية ديال العجين لي غتقرصي فكل مرة وخليه اخمر مرة اخرى حتى يتضاعف الحجم ديالو وصافي سخني الفران مزياااان ودخليه ومتحليش عليه حتى تمشي ريحة الطياب وتعرفي بانه طاب ومابقاش لك خير اتحمر من الفوق وصافي باش ما يهبطش لك و يجيك الخبز منفوخ ان شاء الله تكوني فهمتني

من بعد ما تخرجيه وهو سخون لفيه في زيف ولفيه مرة اخرى في كيس بلاستيك وخليه حتى يبرد على خاطرو

عاد جبديه بغيتي تحطيه في الثلاجة وقتاش ما احتاجيتيه سخنيه من جديد وخليه في زيف وبسلاتيك حتى لوقت التقديم راه بحال الا عاد طيبتيه

بغتيتي ديريه في المجمد وفكل مرة تجبدي قياسك مشي مشكل غير الا كان جامد احسن طريقة انك تحطيه من المجمد مباشرة في الفران وهو بارد عاد شعليه هو تيسخن والخبز تيطلق راسو وتيجي بحال الا عاد طاب
وكيف العادة لفيه في زيف وبلاستيك وخليه حتى يبرد او حتى لوقت التقديم وحطيه