موضوع مثبت من طرف faty bel 23.08.2019 
اليوم بغيت نشارك معاكم الغزالات وصفة التيراميسو اللي معتامداها من شحال هادي والاهم اني مكنديرش فيها البيض خضر كنتمنى تعجبكم الوصفة حينت انا مدمنة عليها ودايما كتصدق ليا 
ندوزو للماقادير 
غنحتاجو بسكوي الملاعق 2 علب ونصف جبنة فيلاديلفيا عادة كندير 3 قهوة سريعة الدوبان كريم فرش سائل كنطلعوها مع ساشي فاني ومتبت الكريم يمكن الاستغناء عن هاد الاخير يلا ماكان وكريم بتيسيير بيتي كندير 300 مللتر حليب فوق النار مع1 فاني و فاناء كنخلط صفر البيض مع 2 ملاعق كبار سكر ممسوحين و 2 معالق ك نشا ممسوحين تم كنضيفوهوم للحليب سخون مع التحراك حتى الحصول على كريمة عاقدة طريقة صنع الكريم كيفما كيوضحو الصور اول حاجة غادي نجهزو الكريم باتيسسير هاد المرحلة للاسف مصورتهاش تم نضربو جبنة فيلاديلفيا مع سكر كلاصي حتى يولي بحال كريم انا درت 4 معالق سكر نتوما ديرو على حسب الحلاوة اللي كتعجبكم وتاكدو باللي الكريم بارد عاد زيدو كريم فرش مطلعة وهاحنا حصلنا علا الكريم اللي غانخدمو بيه 
دابا ندوزو للمونتاج غنحتاجو ل بلاطو اول حاجة شوفو واش كيدخل التلاجة واطار او ممكن نستعملو مول دالجوج و نبداو ندوزو البسكوي فالقهوة ونصفوه فالبلاطو المهم غانديرو 2طبقات من البسكوي منسم بالقهوة و 2 من الكريم كيف مبين الصور 
ملي كنسالو المونطاج كندخلو التيراميسو ديالنا للتلاجة ومورا واحد 3 ساعات بينما تجمد الكريم نغطوها ب پلاستيك غدائي انا كندير داك اللي كنجمدوفيه لحم كنفتح البلاستيكة من الجناب حتى كتولي بحال الورقة وكنغطي بيها جميع الطورطات دياولي وملي كنكلعها من فوق الطارطمكتهزش معاها الكريم الله يرحم واليدين اللي علماتني هاد الفكرة 
jdvhlds, g]d] []h ,fh]r hgjthwdg
تبارك الله عليك اختي شحال درتي ديال اصفر البيض في الكريم باتيسيير وجبنة فيلاديلفيا واش درتي 3 علب ديال 250 غرام؟ وشكرا لك
ملاحظة راه الكريم يلا جاكم سائل متخافو راه كيجمد ملي كتبرد التيراميسو مزيان كيف كتشوفو فالصورة راه كان باقي جاري شويا من خدمت بيه 
التزيين دابة ندوزو لاخر مرحلة واللي هيا التزيين من بعد متبرد التيراميسو ديالنا مزيان انا عادة كنخيها تبات وتاني يوم كنزينها الا كنا غير مالين دار كنقطع الطراف عاد كنغبرهم بالكاكاو واما الا كنت غنحطها كامل كنغرها من الوجه بكاكاو هوا اللول وكنمسح جناب البلاطو بزيف فازك عاد كندوز الموس من جناب كامل كنحيد الاطار كيما كيبينو الصور 
وهكا كتكون التيراميسو ديالنا عند التقديم كنتمنى تكون عجباتكم اللهم ادمها نعمة واحفظها من الزوال 
كنتمنى اللي دخلات وعجباتها الوصفة تدعي معايا و اهل بيتي بالصلاح والهداية وربي يزرع بدرة الايمان الولام فقلب ولدي
الله اعطيك الصحة و يهدي ليك ولدك واتبتو على دينو
بغيت نسولك العلب ديال فيلاديفيا شحال كيوزنو
كنتمنى شي مشرفة دخل وتربط المشاركة التانية مع الموضوع حينت انا مبقاتش عندي خاصية فعديل المشاركة اه نسيت مكتبت بلي ف كريم باتيسسير درت 3 صفار البيض وجبنة فيلاديلفيا كل علبة كان فيها 175 غرام
جزاك الله كل خير
المشاركة الأصلية كتبت بواسطة نعمت 07 
تبارك الله عليك اختي شحال درتي ديال اصفر البيض في الكريم باتيسيير وجبنة فيلاديلفيا واش درتي 3 علب ديال 250 غرام؟ وشكرا لك الله يبارك فيك اختي انا عادة كندير 3 علب ديال 175 هاد المرة درت فقت 2 علبات ونص وباقي المقادير متغيروش اما البيض درت صفار 3 بيضات
المشاركة الأصلية كتبت بواسطة مروى المشيشة الله اعطيك الصحة و يهدي ليك ولدك واتبتو على دينو امين اختي الله يعطك الخير
267 مشاهدة وغير جوجات اللي ردو على الموضوع ميصحابنيش باللي الموضوع مغيعجبكم