مثبت نجاة تادلة
03/10/2019
بسبوسة بالشابلير و الكوك
زلافة البيض (هنا الزلافة اللي عبرت بيها هزات ليا 3 البيضات)
زلافة الزبدة مدوبة (125غ تقريبا)
زلافة إلا ربع سكر سنيدة
زلافة كوك
زلافة الشابلير(هنا استعملت البسكوط مطحون)
1 ونصف خمارة الحلوة
قشرة ليمونة برتقالة محكوكة
للتزيين:
السيرو
2 كيسان صغار عصير الليمون
1كاس سكر
اللوز افيلي
الفواكه المعسلة
نعمل البيض و السكر و قشرة البرتقالة فزلافة و نطرب مزيان
نزيد الزبدة مدوبة و نخلط
من بعد نزيد الكوك
نخلط مزيان و ها العجينة واجدة
ندهن المولات ديال الكاب كيك بالزبدة المدوبة (هنا استعملت هاد الشكل و ممكن تستعملي أي شكل متوفر عندك
و ممكن تستعملي مول كبير )
نعمر المولات بالخليط حتى 3/4
نزين بالفواكه المعسلة في الوسط و نرش اللوز افيلي فالجناب
و ندخلهم للفرن يكون سخون و نخليهم حتى يتنفخو و يتحمرو
هدا شكلهم ملي خرجتهم من الفرن
نحضر السيرو بعصير الليمون و السكر و نخليه يبرد
و أول ما نخرج البسبوسة من الفرن سخونة نسقيها بالسيرو
من الأفضل نخليوهم حتى للغد باش يشربو مزيان عاد نقدموهم
ممكن استعمال بودرة اللوز بدل من الكوك
ممكن استعمال شابلير الحلوة يعني إلا عندك صابلي كنتي صايبتيه و بقا ليك منو طحنيه و استعملي منو زلافة و لكن في هاد الحالة نقصي من كمية السكر باش ما تجيك البسبوسة حلوة بزاف
هنا استعملت البسكوط لكن هدا ماشي شرط ممكن تستعملي الشابلير ديال الخبز عادي المهم يكون الخبز بالفورص أو بالسميدة ماشي خبز النخالة
ممكن تستعملي قشرة الحامض بدل الليمون و في هاد الحالة السيرو ديريه بالماء و الحامض و السكر طبعا…يعني كاس و نص ماء و نصف كاس عصير الحامض مع كاس سكر..
fsf,sm fhgahfgdv , hg;,; fhglvhpg hglw,vm
عافاك بغيت نسولك علا دوك ليمول تاع الالمنيوم لي استعملتي منين خديتيهم وسمحي ليا
رائعة الله يعطيك الصحة