بريوش مقطن وغزال ومثالي للكوتي تفضلووووو

اليوم درت واحد البريوش الصراحة لأول مرة نجربو ولكن ربي ماخيبنيش
وجا هآآائل خفيف ومقطن بزاف وجيت نشاركم بهاد البريوش الرائع لي ماغادي يبقى يخطاني
المقادير
كاس كبير حليب تقريبا نصف لتر ناقص منو كاس صغير
بيضة
4 معالق كبار سنيدة تقريبا كاس عنبة ماعامرش
2 فاني واحد خمارة كيماوية
80 غ زبدة رطبة
ملعقة كيبرة خميرة حبوب
و 2 زلايف تقريبا ديال دقيق يمكن أكثر أو أقل على حسب نوعية الدقيد
ربع ملعقة ملح
شكلاطة مذابة للحشو

الطريقة

كانخلطو البيض سنيدة الخميرة حبوب ولفاني والملح ونزيدو الحليب الدافئ
ونخلطو مزيان ونزيدو الدقيق و هنا المهمة الصعبةإيلا عندك العجانة سعداتك
ويلا لا بحال شمري على دوك ليديدات وعجني ديك العجينة مزيان هي كاتكون جارية وكاتلصق وصعيبة في العجن
ولكن أنا عجنتها بحال طريقة السفنج تستعملي يديك رجليك المهم عجنيها مزيان هههه
وملي تعجنيها شويا تبداي تزيدي الزبدة اللينة شوية بشوية
وكادخليها في العجين وصفي ملي تسالي رشيها بالدقيق وخليها تخمر واحد ساعة
أنا كاندفي الفرن وندريها فيه
وملي تخمر كاترشي كمية مزيانة ديال طحين سرحيها بالدلاك
و سرحي فوقها شكلاط دايب نسيت ماصورت المرحلة صافي لويها وقطعيها
وستفيها في المول وخليها تعاود تخمر مزيان أنا دهنتو بخليص صفار بيضة نقيطة حامض ونيسكافي و دخلتو الفران
ملي طب دهنتو بالكونفيتير وزوقتو بالكاوكاو مهرمش
جا رائع ومقطن وخفيف
غير نصيحة خليه يبرد مزيآآن عاد قطعيه أنا زربت عليه وخسرتليه لا فورم
المهم راه كايجي واعر نتمنى يعجبكم

لا تبخلن بدعواتكن لي حبيباتي
في أمان الله

fvd,a lr’k ,y.hg ,lehgd gg;,jd jtqg,,,,,