الحريرة بطريقتي وبالصور خطوة بخطوة

مبروك عليكم رمضان يدخل عليكم بالصحة والهناء والله يعاونكم على صيامو

البارح النهار الاول نتاع رمضان وضروري من لحريرة،صورتها ليكم وخصوصا للمبتدئات وخاصة المتغربات

اوا نبداو على بركة الله،واي سؤال انا رهن الاشارة

كنغسلو القزبر،المعدنوس والكرافس ونخليوهم يستقطرو

كناخدو واحد 7 حبات مطيشة نغسلوهم ونقطعوهم بقشورهم ونطحنوهم في مولينكس مع شوي ماء

ونصفيوهم في الكوكوط

كناخدو شوي فول ونديروه في زلافة ونضيفولو الماء ونخليوه جانبا

كنحكو بصلة صغيرة

وكنزيدو طريفات نتاع اللحم

والفول بعدما نغسلوه

الحمص(كنوضعو بسينة ونكبو فيها الحمص يابس ونغطيوه بالماء ونخليوه ليلة كاملة ،في الغد كنصفيوه من الماء ونوضعوه في اكياس وندخلوه المجمد )

الكرافس مربوط(كناخدو 2 اعواد من الكرافس )

1 م ك عامرة مزيان مطيشة الحك

2 كنور ضامة البقري

القزبر والمعدنوس لي قطعناه رقيق(تقريبا زلافة صغيرة)

العطرية:ملح،ابزار،سكين جبير،تحميرة(غير شوي)،زعفران،1/2 م ص كروية،1 م ص عامرة كبابة

(او كتشريو عطرية لحريرة واجدة،انا كنبغي نديرها بوحدي )

والماء غليان باش تغلى الكوكوط بزربة

صافي منين تغلى الكوكوط كنقسو عليها العافية ونخليوها طيب مدة ساعة

كنوجدو التدويرة:كناخدو الماء ونضيفولو شوي دقيق ونخلطوهم مزيان وندخلوهم الثلاجة

وهاهي لحريرة منين دازت ساعة,كناخدو لكرافس ونحاولو نعصروه مزيان ( انا قسمتها نصف درت في علبة وخليتو حتى برد ودخلتو المجمد)

كنشعلو عليها العافية ومنين تبدا تغلى كنضيفو حفينة من الشوربة ونحركوها

كنجبدو التدويرة من الثلاجة وغادي تلاحظو ان الدقيق بقا لتحت الماء طلع،غير حركوها

نبداو نضيفو الدقيق والماء شوي بشوي وحنا كنحركو حتى نحسو بيها بدات تتقال ونحبسو

ونخليوها كطيب وحنا كنحركو مرة مرة باش ميلصقش الطحين لتحت
حتى مكتبقاش تبان ليكم الكشكوشة(تقريبا 15د)

وهاهي واجدة ،نتمنى تعجبكوم وتجربوها

hgpvdvm f’vdrjd ,fhgw,v o’,m fo’,m hggi jfhv; jfhv; hggi ugd; o’,m fo’,m ugd;

رمضان مبارك الله يدخلو عليك بالصحة وطول العمر