الحداكة والتاويل والعقل الرزين يدية في يديكم نتعلموهم الجزء2

تبعو معانا نصائح الهام لهومة الله يعطيها صحيحتها أمين
ٍالاخوات اللي مرونة ديورهم غنمشي معاكم بيت بيت زنقة زنقة ههههه غنمشي معاكم من الكوزينة للصالون لبيت النعاس و كلشي و نتمني نلقا تفاعل و كلشي يساهم معانا و يعطي تجاربو و نصائحو

باش ديورنا يكونو مقادين خصنا اول حاجة

التخلص من الحوايج اللي زايدين في الدار اي ال****يب بحال بلاكار قديم …طابلة مهرسة …شي طبسيل مهرس…ايلا عندك 3 او 4 من ش حاجة خلي غير واحدة قضي بيها حتى تبلا وشري واحدا اخرى والامر كدالك بالنسبة للحوايج تصدقي بالحاجة اللي صغارت عليك وعلى ولادك وعلى راجلك واللي بلات دريها شيفونات ..
حيت هاد الشي مع الوقت كيولي مرض كنبقاو نقوولو مع راسنا هاد الحاجة نقد نستعملها شي نهار وتجمعيها وتبقاي تجمعي بحال القندس حتى توحلي ولكن خاس نتغلبو على هاد الامر راه الشرويط والماعن عطاهم الله المهم بالنسبة ليا اللي زايدا تخرج من الدار حينت الدخشيش في الدار كيخليك توحلي مني تبداي تخملي وتعياي وما تبقاي عارفا مين تبداي و التخلص من ال****يب كيخلق مساحات رحبة كتسمح بتدفق الطاقة اللي غادي تخليك تحبي التنظيف
يا الله بداو التطبيق واللي عندها شي حاجة زايدا تصدقها او لا ترميها ايلا ما كانتش صالحة

تاني حاجة كل حاجة تشد بلاصتها
يعني كل بيت يكون فيه فقط اثات الخاص بيه بدون زيادات ماشي تلقاي شي داخل في شي
وكلشي يتخبى ف البلاكارات ايلا كان ممكن ونخليو فوق الماريو ديال بيت النعاس خاوي لانه كعطي منظر زوين حسن من داك العرام ديال المانط وصيكان السفر
المانط يدارو في صنادق اللي ف الصالون ولا في شي بلاصا في البلكار او تشريو دوك الميكات اللي كيمصو الهواء راه تيكونو فمسيو بريكولاج والصيكان يدار فيهم حوايج الشتا ايلا كان الصيف او حوايج الصيف ايلا كان البرد
وحتا الماريو غادي يخفاف من الداخل وغاد كون عندنا مساحة كبيرة فين نرتبو الحوايج
وتقبلو تحياتي واحد شوية غنجي ليكم لبيت النعاس و نقولكم كيفاش يبقا متول

---

hgp]h;m ,hgjh,dg ,hgurg hgv.dk d]dm td d]d;l kjugl,il hg[.x2 d[df d[d;l ,hgurl

دائما مع الهام لهومة المبدعة هههههههه
دابا نجيو لبيت نعاس يكون فيه غير
الناموسية الكوافوزات البلاكار ويمكن تزيدي تلفاز ايلا كان البيت كبير واخا انا صراحة ضد هاد الفكرة التلفازة تبعنا حتي لبيت نعاس ههه انا دايرا فيه جليسة و طبعا الكونة غادي تكوني مظطرة ديريها ايلا كانت عندك التربية صغيرة وما كانش عندو البيت ديالو
بالنسبة الماريو قسميه جيهة ديري فيها حوايج الراجل وجهة ليك وجهة للولاد
السراول بوحدهم والقوامج بوحدهم والتيشورطات بوحدهم والجلالب والتريكويا ت
الطواقي والكاسكيطات في المجر
الملابس الداخلية في المجر الشيلان ف المجر
فوق الماريو خاوي الكومود نديرو فوقها ش ديكور ديال الفخار مبخرة او فازات صغر او صنديقات او مصحف صغير … .

عندي واحد الصاك و كنحط فيه كاع الحاجات ديال الضياف بحال الفوطات ديال اليدين و ديال الاستحمام ( مكنبغيش نعطي الفوطة ديالي هههه) و ليزور و غطاء الخديات وبيجامة و نهار كيجي عندي شي حد تنجبدو بكل سهولة بلى مانتلف و نبقى نقلب

ديما بيت النعاس ما ندكسوهش بالديكور و التخربيق ديما يبقا سامبل حيت الحاجة البسيطة كتكون زوينة و ما تقيلاش فالشوفان

ديما خودي صابونات ديال الريحة بحال صابونة دوف خودي شحال من وحدة خليها هكاك صحيحة و خشيها فالماريو وسط الحوايج و خودو كميميصات و ديرو كميميصة ديال الخزامة و كميميصة ديال الورد و خشيهم تا هوما وسط الماريو و شوفو الريحة ملي تفتحو الماريو ديالكم

بالنسبة للطقم ديال بيت نعاس تيجي معاه واحد الغشا ديال المخدة صغير اغلبنا ما كنستعملوه خودوه و غسلوه فالماكينة غي شي خمسة الدقايق و ديروه فالنشافه غير شوية مزال يبقي نادي يكون شوية راغن ايوا و خودوه و عمروه بشي بارفان مزيان و بخروه انا كنبخرو بالمسكة الحرة احنا تنگولو ليها تيدگت انتوما ليكم الاختيار و ديرو وسطو واحد اربعة اعواد ديال الند وخودوه ديرو هاداك الغشا فبلاستيكة و سدو عليه مزيان و دخلوه فالفريگو و خلوه 3 ايام و خرجوه و حطو الغشا وسط المخاد ديال بيت نعاس او تحت الفراش و تمتعو بالريييييييييحة الجميلة ايوا شفتكم ناعسين تندوي غار بحدي حرام عليكم ما كاين تشجيع دابا نبكي

الهام لهومة
دابا نجيو للكوزينة وهادي هي اصعب مكان خاصو دائما التنظيف والتنظيم بشكل يومي المهم هادي بعض الخطوات باش تكون الكوزينة مرتبة واللي عندها شي اضافة مرحبا

اولا البلاكارات مهمين فهاد العملية ايلا كانو مزيان وايلا ما كانوش بحال في ديور الكرا يمكن الواحد يستعن بالطاجيرات ديال الفيرفورجي كيتصاوبو عند السدور
البلاكارات ندرو الطباسل ف جهة والكيسان ف جهة والبرارد والطيرموسلت بوحدهم والطناجر
الزجاج بوحدو والبديع بوحدو والاينوكس بوحدو
الفراشي والمعالق ايلا ما كانوش المجورا شري المجورة صغار ديال البلاستك وديرهم فيه
فوق البلاكار نعملو طوجنات صغار ديال الفخار ديكور
وايلا كنتي غادا تحطي فوقهم الماعن د اينوكس ديال العراضات غلفهم بالبلاستك الغدائي حينت دهون الطياب صعيبة ف التنظيف
بالنسبة للقطاني و ليباط ديروهم فدوك البواطات ديال البلاستيك االقريعات ديال العطرية من الاحسن نجمعوهم في شبكة كبيرة و ندخلوهم للبلاكار باش نجبدوهم بسهولة
ادوات التنظيف تحت لافابو ومن الاحسن القراعي ديال اوني والخرقة باش نغسلو الماعن يدارو التحت يتخباو
ديري شي ساعة تكون فيها فواكه في الكوزينة
ايلا عنك الشرجم ديري ليه شي خامية بتوب خاص بالكوزينة
لي عودة ان شاء الله

اوا تاعت غي لي يخليكم في الزنقة مبغيتوش تخليوني نحل الدار عينكم غي فالقصرية

مبروك العتبة الجديدة تكون انشاء الله فحال الاولى او احسن وشكر متجدد ل مجدولين و فاتي و الهام وكل انيقات الحداكة والتاويل

ولادك ماشي مشكل يلعبو و ضروري غيرونو ليك السيجور و لكن عوديهم علي النظام ملي يساليو اللعب ديالهم يجمعو اللعاب ديالهم و يقادو بلاصتهم واخا باقيين صغار ولفيهم هادشي من دابا انتي راجلك ما تيكونش فالدار السيمانة كلها خصك الجمعة و السبت و الاحد اللي تيجي فيهم راجلك تكوني مقادة كلشي خودي ورقة و ستيلو و ديري جدول ديال الشقا و ساليه فالصباح راه ايلا قابلتي الانترنيت ما غتقادي والو ديما الشغال قاديهم فالصباح بمري و غيشيط ليك الوقت ارا ما تكونيكطاي فيقي فالصباح بكري نيشان سيري للكوزينة ديري المقراج فوق النار لاتاي او للقهوة و او الحليب سيري للحمام غسلي وجهك و مشطي شعرك و رجعي للكوزينة و جدي الفطور ديري اتاي يتشحر و ما تبقايش واقفة عليه وجدي الخبز……….. حطي الفطور فوق الطبلة و سيري فيقي الوليدات يمشيو للحمام يغسلو و ……. فهاد الاتناء حلي الشراجم و هزي الاغطية لوحيهم فالنوافد بلا ما تجمعي البيت و سيرو فطرو من بعد لبسي وليداتك و ايلا كانو كبار شوية عوديهم يلبسو بوحدهم و سيفطيهم للمدرسة او الحضانة و رجعي للدار لبسي طابلية ديالك و قادي السيجور و شطبيه دوزي دابا للحمام اعزكم الله.الحمام ديما تكوني حاطة فيه قرعة يكون فيها خليط من جافيل والصابون وسنكروا وثقبيها من الفوق ويكون معاها شيفونة باش غا تحكي.غا ترشي الخليط و تحكي دغيا لافابو وتواليت وتمسحي لمراية بشي فوطة صغيرة لي حتى هي خليها في الحمام ديما وغا تجفيه فقط بجفاف العمود.مغاتفوتيش فيه 10 دقايق.مضليش تحكي تما.حكا خفيفة من بعد ما شطبتي غرفة الجلوس و جففتي الحمام شطبي الكولوار
من بعد دوزي للكوزينة ديري الماء يطيب الا غا تحتاجيه لنصيب الغذاء.مسحي الطبلة هي الاولى وقديها.من بعدها دوزي للبوطاجي رجعي كل حاجة لبلاصتها ونتي كتجمعي فالماعن لي خاسهم يتغسلو في الحوض.مسحي البوطاجي.من بعد بداي تنصبي الغذاء ديالك.ايه دابا غا تنصبيه باش يطيب على خاطرو وباش تستغلي الوقت محدك في الكوزينة.نتي كتنصبي وفي نفس الوقت كتغسلي الماعن.ماعن الفطور والماعن لي غا تخدمي.اي حاجة ساليتي بيها غسليها في البلاص.وقلنا مضيعيش الوقت عرفي كيديري تستاغليه.مضليش تحركي في الغذاء ولا واقفا على البصلة تسنايها تشحر…مغاتفوتيش نصف ساعة مبين الغذاء وغسيل الاواني…من بعد غا تجفي الكوزينة ودوزي للبيت النعاس ديالك و ديال اطفالك بيتك جمعيها وشطبيها ومسحي الغبرة متفوتيش فيها 10 دقايق.غرفة الاطفال كذلك تجمعيها وتشطبيها ومتفوتيش فيها 10 دقايق حتى هي.وديري فبالك ديما انه الا علمتي ولادك هما يجمعو حوايجهم ويقادو بيتهم غا يجيك كلشي ساهل و منضم و كنتمني يعجبك هاد البروگرم راني كتبت جريدة ههههه

الجدول لي كنظم بيه وقتي في أغلبية الاحيان وسيرتو الى مشا الريزو ههههههههههه
https://www.anaqamaghribia.com/vb/sho…=394979&page=2

الله يبارك فيك أختي فيزيكا واشتي خلاوني تاوليت نقلب على البنات كيغاندير ليهم نخبرهم بالجزء 2 وريزو مقطوع ههههههههههه

مبروك علينا العتبة الجديدة الله يجعلها عتبة خير بالمزيد من التألق و الحداگة و التاويل حبيبتي مجدولين انتي هي ام الابداع و انل كنشكرك انك اتحتي ليا المجال نساعدكم بافكاري البسيطة نتمني نكون خفيفة علي قلوبكم

هواحد الجدول أو برنامج للاكل بسيط وضريف وراه مفيهش الكوليستيرول

	الفطور	الغدا	العشاء بكري
الاتنين	فرماج + خبز+ أتاي	طاجين بالخضرة والدجاج	دانون +لوز وكاوكاو
التلاتاء	ليمونة +تمر+أتاي+خبز	طاجين بصوص والكفتة+شلاضة	الحريرة +التمر
الاربعاء	دانون + تمر +خبز	القطنية + شلاضة	مقيلة بالحيمات طراف+شلاضة
الخميس	بيضة مصلوقة+ أتاي وخبز	طاجين اللحم بالخضر	حسوة والتمر
الجمعة	زيت العود+الخبز + أتاي	مرة كسكس مرة تردة مرة بيتزا مرة بطبوط بالخضر والدجاد أو الطون	بلبولة باللبن أو كسكس باللبن او شلاضة بالخضر
السبت	كاس حليب +تمر +خبز	طاجين باللحم والخضر	شوربة العدس
الاحد	أملو +خبز+ أتاي	الحوت في الفرن +شلاضة	بيض ومطيشة