شكراً لكل أنيقة ولعقبة لكم لبداية كانت بطبيبة ل كنت معاها قالت لي را غادي تولدي في 5 سبتمبر ولمشكل أنها خرجات كونجي وخلاتني تالفة ما عرفت أشمن سبيتار أولى كلينك غادي نقصد لمهم كنت ناوية نهار الاتنين 27 نمشي عند دكتورة نيان فاطمة الزهراء لي نصحوني بها الأخوات في المنتدى كان عند بالي مازال لحال ولكن نهار الأحد 26 في صباح لقيت لوسخ بحال لعلامات ديال العادة الشهرية قلت را وقيلة مازال لحال شي سمانة حيت هادشي لي كنت كنسمع خرجت داك نهار ودرت مزيان في القسرية كملت دكشي لي خاصني في لحويجات و مشيت مرجان خدت لكوش و شي تخربيق أخر اوى مع لفجر تحسبت مع ضلوعي بدا كيشدني واحد لوجع شوية خفيف لكن ما خلنيش ننعس نضت جففت دار وجمعتها وبغيت غير امتى يصبح لحال وملي مشى راجلي خدمة طاح عليا ديم وخفت لبست جلابتي ومشيت لدارنا مع 9 صباح فيقت أختي حيت كوفورا مشينا صالون دارت ليا لصيغ وبردت ضفراني وهادشي فيا لوجع و ما معتقاش (سكران وحادي حوايجو) تسنيت راجلي حتى جا و مشينا عند الحاجة لي في حي تسير حيت قريبة ليا وكنت بغا نسولها واش غنولد طبيعي ولا سيزريان ساعة صدمتني ملي قالت ليا راك ا بنتي غادي تولدي ليوم في الليل أو غدا في صباح وفي نفس لوقت فرحت حيت قبلات تشدني و نولد عندها طبيعي أنا كنتيق فيها حيت والدة عندها مرت خويا وكانت في لمستوى رجعت لداري جبت ساكي وسديتها ورجعت نتوجع في دارنا ما بغيتش نمشي عندها ديك ساعة باش ما يبقوش يقلبو فيا كل ساعة وهادشي ستفدتو من أنيقات المنتدى تزاد لوجع وطرح بدا كيحماض وأنا صابرة وشربت دوا لي "عطاتني باش يخفف الألم ولكن هادشي ما كيقضي فيه لا دوا لا هم يحزنون غير صبر و دعاء والقران رجعت عندها مع 1 ديال صباح قالت ليا باقي يالله محلولة ب-2 سبعان وبغات تشدني لكن فضلت نرجع لدار ما كليت ما شربت ما نعست بقيت غير جامدة في بلاصتي وكنتوجع وندعي في صباح بدا صبر كيتقدى هزيت ساكي ومشيت عندها دخلني واحد لصال قلبتني لقات 4 سبعان وخلتني ، كنت كنقول أنا ما غديش نغوت أنا غادي نستحمل ولكن في صراحة را وجع لا يحتمل ما بغيتش نخلعكم ولكن أنا كانت لحالة ديالي صعبة شحال من وحدة دخلت موريا وولدت قبل مني حيت أنا ما بغاش ببيبي يتقبل ولوالدة ما بقتش تحلت قالوا ليا بقاي على جنبك الأيمن بقيت كنتوجع درجة ما بقاش عندي جهد باش نغوت وليت كنضرب غي في لحيط بإدي طولت بزاف وكنسمع ناس كيدعيو معايا على برا مرة كتدخل عندي مرت خوية ومرة ختي ومرة راجلي حتى شدني واحد لوجع قلت صافي هادي لموت وهي تبان ليا لحاجة لبست طبلية وكيوجدو في لمقوصة ولماتريال ما خفتش بلعكس فرحت بغيت غير نتفك ، وقفت ليا ممرضة عند راسي كتدفع بايدها من لفوق ولحاجة كتجبد من قدام و دارت ليا فنتوز ولغراز في لحضة أنا كنغوت ولحاجة كتقول ليا قولي لحمد لله وأنا كنحمد لله خرجات بنتي و حطتهى لي فوق كرشي إحساس لا يوصف تفكرتو دابة وبكيت غسلوها وجابوها ليا بستها ولبسوها خرجوها لبابها و بقيت حتى خيطت ليا و كمل سيروم لي معلقين ليا وشربوني لحليب سخون وتمر ودارو ليا تلج وخنشة على كرشي عاد لبسوني وخرجوني في كروسة بت عندهم أنا وماما وفي الغد فطروني وبدلو ليا وبيبي وخرجت بسلامة نبغي نشكر لحاجة لي حاربت معايا ودارت كل مجهودها باش نولد عادي والبنات لي معاها لله يجازيهم بالخير سمحو ليا طولت عليكم وعلى هاد المجهود لي درت باش نعاود لكم دعيو ليا غي مع ياسمين ديالي الله يخليها ليا ويحفظها لبابها ما تخافوش را كلشي كيفوت وكيبقى غير تعاويد خاص غير صبر وإيمان وتوكل على الله الله يفك واحيلكم على خير والله يرزقكم الدرية الصالحة
ihkd v[uj ,[fj g;l rwm ,gh]jd fhgjtwdg hgllg
على سلامتك احبيبة ومبروك والله يخلي لك ياسمين انا كنت كنتمنى نولد مرة وحدة طبيعي لانني والدة ب 2 قيصريات بلا مانعاود ليك والطبيبة قالتلي ولادتي كلها غتكون قيصريات لكن الحمد لله على كل حال
نسيت ما قلتش لكم أنا ولدت مع 18h30 نهار 28/08/2o12 وما تنساوش بنيتي ياسمين من الدعاء
سلام عليكم الحمد لله على سلامة أ الله يخلي ليك كتكوتة ديالك يا رب
بكتني يا ختي معك مبروك عليك لعقبة لينا يا رب ب- شي فكاكة سهلا اترزق كل منتضرة
سلام عليكم الحمد لله على سلامة أ الله يخلي ليك كتكوتة ديالك يا رب
الله يخليها ليك يارب ويحفظها ويجعلها من الصالحات المصلحات ان شاء الله عكوبة لجميع المنتظرات ياربي تحل حزامهم وترقهم من حيث لا يحتسبون وانا منهم بالذرية الصالحة السوية السليمة ولكل حاملة ياربي تفكها على خير وتبثت حملها إلى حين وقته يا رحمان يارحيم
على سلامتك اختي و ربي يخلي لك ياسمين اختي بغيت نسقسيك فين ولدتي شنو هاد الحاجة واش قابلة فدارها و لا كلينيك ولا شنو؟
الحمد لله على سلامتك وسلامة بنتك الله يحفظها ليكم من كل مكروه ويجعلها من الصالحات
على سلامتك