طورطة موس بالفريز ميييييامييييييييم

Oum Hedayah
26-11-2019

G]]

هاد الطورطة تتجي رائعة و خفيفة و لديدة و دئما تنديراها في و قت الفريز او حتي منين ما تيكونش تنجبد الفريز المجمد و تنخدم بيه و ممكن تديوها حتي بالخوخ راه نفس المبدء المهم ما نطولش عليكم نخليكم مع الطريقة

المقادير :

جينواز او كيكة

انا استعملة كيكة درتها في طاوة كبيرة و هاهية مقادير

2 بيضات كاس سكر كاس زيت حك دانون فاني اوفريز خنشة فاني خنيشة خميرة ديال الحلوة 2 كيسان دقيق

مقادير الحشوة نصف كيلو او نصف لتر كريم شانتي "انا تناخد ديال لعبار" 150 الى 200 غرام سكر صقيل حسب الدوق باش نطلعو به الكريمة

2 خنيشات فاني 6 اوراق الجلاتين نصف لتر فريز مطحون ب 100 سكر شويةديال الفريز مطحون مع ماء و سكر للسقوة بعض الفريزات للتزين مول او اطار الي غادي نحضرو في الطورطة

ملاحضة : كيلو فريز تناخدو منو فريزات زوينات و كبرات للتزين و نخلو الباقي نديروه مع100غ سكر سنيدة نخرجو منو نصف لتر فريز مطحون و البقي نديروه للسقوة

أو بواطة فريز نستعملوه للزينة فقط و 600 غرام فريز مجمد تندرو عليه السكر100 سانيدة و نخلوه حتي يترخي شوية عاد نطحنوه و تنعبروه من جديد باش ناخدو نصف لتر و الباقى نستعملوه للسقوة

كما العادة تنطربو البيض مع السكر و الفاني بعدها نتضيفو اليوغرت تم الزيت تم الدقيق مع خميرة و نعمل الخليط في مول او طاوة كبيرة باش تجي رقيقة وكبيرة و نقدرو نقطعو الشكل الى بغينا انا درتها في طاوة ديال فران الضو الدايرة ديال بسطيلة بعد ما يطيب الكيك ديلنا نخلوه يبرد

طريقة لاموس

تناخدو اوراق الجيلاتين و نفزكوها في اناء عامر بالماء واحدة بوحدة و ممكن تطويها و تخليها عشر دقاءق

في هاده الأتناء تناخدو فريز ديلنا سواء مجمد او طري نصف كيلو للموس و شوي زايد على حساب السقوة و تنزيدو عليه 100 غرام السكر و نخليوه شوية باش يبدي يطلق شوية الماء ديالو "من الأحسن نديره منين تنكون تنطيبو الكيك" بعدها تنطحنوه و تنرجعو نعبره باش ناخدو نصف لتر او نصف كيلو و الباقي غادي نحتاجوه للسقوة تنزيدو عليه الماءكاس عنبة ما عمرش و نزيدو شوية ديال السكر ونسخنوه فوق العافية و من بعد نصفيوه و نحطوه ف التلاجة باش يبرد

تناخدو النصف كيلو ديال الفريز و تنكبو منوا التلت في كاسرونة و نحطوه فوق نار مهيلة حتي يبدى يسخن عاد تناخدو اوراق الجيلاتين و تنعصروها من الماء و نتضيفوها و نبداو نحركو حتي تدوب كاملة و ترجع متل ماء الفريز ماشي نغليوها من بعد تنشدو هاد الخليط و نضيفوه لباقي الفريز و نخلطو مزيان و ندخلوه للتلاجة باش يبرد و ما يبقاش سخون او دافي

دبا غادي نخرجو الكريمة ديلنا و نبداو نطربوها حتي تبدي تشد راسها عاد نضيف سكر فاني و سكر كلاصي بشوية بشوية و دوق من الحلاوة و انت و دوقك ممكن تستعملي 200غ كاملة او اقل او ممكن تزيدي تنحيد زلافة من الكريمة باش نزينو بيها جانبا في التلاجة

منين نسالي من الكريم تنجبد الفريز و تنبداو نزيدوه على الكريمة بشوية بشوية و تنخدمو بالمعلقة الخشبية او سباتول من الفوق الى الأسفل او بحال الى تدوري يدك بشكل دائري من الأسفل الى الأعلى باش ما تهرسيش الكريم حتي تكملي الفريز و ترجعي الإناء الى التلاجة باش يشد راسو شوية الا حسيت بيه جاري باش الا مشيتي و كبيته في المول ما يسيلش من الجوانب

تناخدو الكيك ديالنا و تنقسموه بالشكل الى عندنا و تنحطوه في طبق التقديم او فوق شي حاجة تتسهل علينا اننا نحوله منها المهم تنسقو الكيك بالسقوة الى وجدنا من قبل و تانخدو الفريز الى خلينا في الأول و تنقسموه على الشكل الي في السورة عاى 3 بالطول باش نحطوه في المول بعدها تنكبو الموس ديلنا و ندخلو للتلاجة باش يبرد على الأقل 2 سوايع و من الأحسن اكتر باش يشد راسو تم تنخدو الكريمة الى نقصنا من قبل و نطليو بها وجه الموس و الباقي نديروه في جيب حلواني و نزوقو بيه و نضيفو الفرز بوريقاتو المهم التزين انت و ما تحبين ممكن تكتفي بالى بغتي

و بالصحة و الراحة

واخا راني كترت عليكم بالهدرة راها ساهلة ماتخافوش يكفي تنضمي المراحل فقط و الكيكة ممكن ديريا يوم من قبل و صدقوني راه الي تيكلها تيسولني واش شريتها

---

‘,v’m l,s fhgtvd. ldddddhlddddddddl

رائعة كما العادة بارك الله فيكي

شكرا لك على الوصفة الراااااائعة زوينة و تشهيتها واش كتجي كلاصي؟؟ تبارك الله عليك مع أحلى تقييم إن شاء الله نجربها

تبارك الله عليك احبيبة و الله يعطيك الصحة

ياسلآآآآآآآآآآآآم
مالقيت تاكلمه توصف اعجابي
الله يعطيك الصحه

طورطه فنه تبارك الله عليك نورا

المشاركة الأصلية كتبت بواسطة oum hedayah

تبارك الله عليك احبيبة و الله يعطيك الصحة

المشاركة الأصلية كتبت بواسطة المعكازة

ياسلآآآآآآآآآآآآم
مالقيت تاكلمه توصف اعجابي
الله يعطيك الصحه

سلام اختي نوال كيف دايرة م شي خفة سمحى لي الا شهتك راها خايبة كاع ما جات في المداق زونة عنداكي تبقاي تحكي و تخرجي البيبي كلو مزوق هههههههه راني نضحك معاك اش تتعاودى

الا اختي تديرها غير في التلاجة ماشي في المجمد

تبارك الله عليك