طلب مساعدة في تسيير المصروف

السلام عليكن انيقاتي

الصراحة انا ديما كنتبع معاكم غير من بعيد، او كنحاول نتبع بالنصائح ديال الانيقات الله يزاجيهم بالخير
حاولت هاد الشهر نطبق غير جزء من هاد النصائح، و الحمد لله بديت كنجمع راسي و خا غير شوية، مزال خاصني بزاف و لكن بشوية بشوية حتى نضبط اموري إنشاء الله.
نقدم ليكم نفسي :
أنا متزوجة سنة و نصف، ساكنة غير انا او راجلي، مزال معندنا وليدات، خدامين بزوج، تقريبا انا و راجلي الخلصة ديالنا بحال بحال يعني 4000 درهم، و لكن هو كيخلص من الصالير ديالو الطريطة 2024 درهم، او مصاريف الطموبيل، و السجائر، و ط§ظ„ظ…طµط±ظˆظپ اليومي ديالو، او شيحاجة لمصروف الدار، او مللي كدوز 15 يوم بعد الاول في الشهر كيدقاداو ليه الفلوس.
أما انا كذلك مدايراش قاعدة غادة عليها يعني كنصرف عشوائي، مصاريفي اليومية، او إلى عجباتني شيحاجة كنشريها، حتى مصروف الدار غير منظم، كلشي عشوائي. او حتا انا مكنشيط والو يعني مدايرين تحت منا والو.
و لكن هاد الشهر طرفت واحد 2024 درهم سديت عليها او كلت غنعتابر راسي كنشد غير 2024، او خاصني نظم حياتي باش نصرفو غير القياس.

او كنتمنى من الانيقات ميبخلوش عليا،او يعاونوني او يعطيوني سيستيم نمشي على اساسو

---

‘gf lshu]m td jsddv hglwv,t

50 مشاهدة او ماكين حتى شي رد
فينكم الانيقات.؟؟؟؟

سلام اختي انا غنحاول نفيدك شوية واخة حتى انا يالاه باديا مازال ماشديت ريتم هانتي قولي لراجلك نتي اللي غتشدي المصروف ديال الدار كامل،حيت الرجال عامة متيعرفوش يصرفو،قولي لي يعطيك 1000 درهم،و هو غيخلص تريتة و غتبقا ليه 1000 كنظن كافياه فالطوموبيل و المصروف اليومي.هاديك 1000 اللي غيعطيك زيدي عليها 1000 من عندك،هاهي 2024 حطيها فحساب توفير و نسايها ،و 3000 درهم اللي غتبقى فيها الخير و البركة انشاء الله قسميها كالتالي:500 بين الما و الضو و الانترنت،500 تموين ديال الشهر خودي فيها غير الضروريات من زيت و سكر و اتاي دقيق و حليب نيدو و مواد تنظيف و قطاني.ليباط …..لمهم التموين اللي كيصبر و خودي غير قياس شهر،بقات 2024 غتخصصي منها 300 لكل اسبوع
فيها خضر فواكه و لحم و حوت و دجاج و كفتة او داند او صوصيص على حسب شنو كتاكلو و ديما شري غير بقياس 2 افراد باش تلتزمي بالميزانية و تاحاجة ماضيع و ماتفوتيش ديك 300 درهم فالاسبوع،المجموع 1200 درهم غتبقا 800 حيدي منها واحد 500 درهم ديالك شري بيها لي برودوي اللي كيخصوك شهريا،طرونسبور الى عندك،تعبئة تلفون…المهم هاديك ديالك صرفيها كيف بغيتي واياك تنساي راسك.غتبقى 300 حيدي منها فلوس البوطة وحدة او جوج ماعرفتش شحال عندك الى عندك جوج عتبقى ليك 200درهم خبعيها ليعود يجي شي ضيف،او تحتاجو شي دوا الله يحفظكم،او تخص شي حاجة فالمصروف تخرج من الجنب هههه او بغيتي تصايبي شي حليوة ….المهم هاديك 200 خليها احتياط ديال المصروف.دابا نعطيكبعض النصائح باش ينجح ليك هادشي: بعدي من الاسواق الممتازة فيها قوة المغريات سيري عند الهري و سيري للسوق اى بغيتي تقداي،صايبي طابلو ديال الشهر فيه فطور غداء عشاء و تقداي ديما على حسب الجدول لا اقل ولا اكتر و شري غير قياس الوجبات اللي غتصايبي باش ماتخسريش بزاف،قلبي على شهيوات قتصادية على حسب دوقكم نوعي بهم،بعدي من السقاطةوداكشي ديال الشكلاط و البيموات و ماكلة الزنقة اللي كتهلك الصحة و الجيب،اي حاجة ممكن تصايبيها فالدار خصصي ليها وقت في نهاية الاسبوع و صاوبيها بحال الخبز،فرماج و شكلاط الدهن،الكاشير،الجبن،المسمن الحرشة الكيك كرواسة للفطور المايونيز الكيتشاب….المنتدى تباركلاه عامر بالوصفات و هادشي الى كنتي كتشريه ديما راه كيطلع بغسيل الفندق.حتى البسكوي صايبيه فالدار صحي و قتصادي و تفنني في الاشكال،الى كان عندكوم التوقيت المستمر واياكم من السناكات،ديو الماكلة ديالكم وجبات خفيفة تتجيو للدار و ديرو وجبة عائلية.هادشي اللي تفكرت دابا والله يوفكم للخير اختي،و نصيحة من عندي وفري دااابة ماحد لوليدات مازال ماجاو،باش تلقاو باش تكونو بيهم انشاء الله حيت ديك الساعة غيولي سيستيم ٱخر هههه الله يرزقك الدرية الصالحة في امان الله.

الله يجازيك بالخير أختي عندك الحق هاد الساعة ماكين لا احماد لا محماد ههههههههه، غير هو جميع الراس خاصو شي باندة كبيرة باش تزيرو مزيان هه، غير كنضحكو أختي.
شكرا على النصائح او غنحاول انشاء الله ندير للي فجهدي .

السلام عليكم ورحمة الله وبركاته حتى انا ايدي متقوووبة كنحاول نطرف والو عندي امي كندور معاها 500درهم اختي 200 راتب شهري ديالي 3000 درهم كنت كندير كريدي في الصيدلية ولكن حيدتو تقريبا اوا شى لي بقا كيمشي في والو بغيت نحل حساب لولدي كل شهر مكيبقا والو في 10 في الشهر الرصيد 000

ههههه والله ماكدبتي ياختي خسران لفوس فيه النشاط ولكن كيرجع بالندامة من بعد شكون فينا اللي ماطاحش فازمة واحد النهار؟ غير هو كاين اللي داير فليسات تحت منو كيرجع عليهم وقت الحزة و كاين اللي مصفيها بحالنا، هههه تانا بعد المرات كنضعف ملي كتعجبني شي حاجة ولكن ولليت كنزير راسي و كنكول ماشي وقتها دابا،من بعد،من قبل ماكان عندي كسار فاش كنت ديال راسي ماكاين غير حرك الفلوس و فاخر الشهر نمشي نحزر بابا و مسكين مكيبخلش عليا،ولكن دابا تزوجت و عندي بنيتة و انا اللي مسيرة الدار وهادي سؤولية خاصني نقد بيها.واخا مازالين عندي شي ثغرات ولكن انشاء الله نتجاوزهم.الله يوفقك اختي

اختي متخمميش كلشي عندو الحل عطيني تفاصيل اكتر باش نقدر نساعدك متلا شحال كيتخلص زوجك واش كاريين او شاريين،واش نتي اللي شادة المصروف شحال فعمر ولدك….

واحد الفكرة اخرى نسيت ماقلتها ليك،اعتمدي تظام الاظرفة،ييعني غادة تجبدي فلوس الشهر كاملين من البنك،حطي فلوس التوفير فالحياب،و خودي اظرفة كتبي عليها كل حاجة لاش مخصصة مثلا ظرف ديري فيه 500 درهم و كتبي عليه < تموين> ،الاظرفة الاخرى كتبي عليها الاسبوع الاول،الثاني….وكل ظرف ديري فيه ميزانيتو،الضو الما و التلفون و الطرونسبور كدلك،و و كل حجة ماتفوتيش ليها القدر ديالها اللي في الظرف،و الى شاطت شي حاجة زيديها على فلوس الاحتياط.

إنشاء الله اختي دكشي للي غادية ندير، مشكورة حبيبتي

الصراحة مللي كتولفي تهزي كريدي من الحانوت او الصيدلية، راه هديك حتى هي بلية كبيرة، من الاحسن متبقايش ديريها نهائيا، حيت ديما شهر كيبقى يخلص على الشهر اللي فات، او عمرك متزيدي القدام.