شكون فيكم خدات ديبلوم الفصالة والخياطة بمركز التعاون الوطني

a;,k td;l o]hj ]dfg,l hgtwhgm ,hgodh’m flv;. hgjuh,k hg,’kd hgthagm pdhm

إجابة على التساؤل ديالك أنا قريت الخياطة و الفصالة العصرية بمركز التعاون الوطني" لكنه كان عبارة عن قسم في أحد المراكز الاجتماعية – المبادرة الوطنية – " للموسم 2024/2019 و خذيت الديبلوم منو مدة الدراسة سنة فقط، الدراسة بالعربية،
شروط التسجيل: كما أشارت إلى ذلك أختي ام سمية جزاها الله خير 2 تصاور وفوطوكوبي لاكارط وليكستري، ورقة الغياب، ملف عادي، 3 أظرفة متنبرة.وواجب التسجيل 15 درهم فقط. يعني 15 درهم لي خلصنا في السنة كاملة.
المعلمة ديالنا كانت تتقول لينا، شفتو الاقسام الاخرين لي حدانا كلهم تيخلصوا للشهر ما بين 50 و 150 درهم للشهر، حسب التخصص، حيث هما جمعيات،… تتقول لينا أنتوما تابعين للتعاون الوطني، تابعين للدولة، … و تتقول لينا بأنها تتجيها خلصتها من الدولة من الشهر للشهر… تتقول لينا ما تعطيوني ما نعطيكم.

أما بخصوص تساؤلك على جودة التعلام،فكما قالت أم سمية خص مراقبة من الجهات المعنية.
فبأستثناء دروس الصاية، و الله إلى تعلمت من الاستاذة غير المصطلحات الخاصة بالفصالة فقط – حيث بهذه المصطلحات قدرت نفهم و نتواصل مع الدورات في الانترنيت- أما شي تعلام فالله و كيلنا و حسبنا.

كانت ديما تكتب الدرس تقولينا طاي سطوندار ديال المغربيات 44 .الوقت لي تسولها شي وحدة فينا على كيفاش تطبيق الدرس على طايات أخرى أو طاي صغير تتهرب من الأجوبة بشتى الوسائل، و ديما تقول لينا سمحو لي طلبني المدير ملي كنت داخلة مع الباب نمشي نشوف آش بغا ما تبقا ترجع حتى يسالي الوقت.
بالفقصة ديال التهرب ديالها من الاجوية و كل وحدة فينا باغا تطبق شي حاجة لنفسها التجأت إلى الانترنيت فوجدت الاخت نور شمس و الاخت التائبة إلى الله الله يجازيهم بخير عاملين دورتين و شكيت ليهم همي و هم أخواتي ممن يدرسن معي، و هما يقول لي غير بقاي متبعة معانا و راك إن شاء الله تولي مزيان. بالفعل تبعت معاهم و وليت تنأمبريمي الدروس ديالهم و نديهم للبنات في التعاون الوطني و تنستغلو الغياب المتكرر ديال الاستاذة عند السي المدير و تناقشو دروس الاخت شمس و التائبة إلى الله غير تتدخل تنجمعو و نطويو ههه هههه ههه.
من بعد غادي نكتاشفو بتصريح من الاستاذة- بلا ما تشعر- 2 الحوايج أن الطاي ديالها هو 44 و هو الوحيد لي حافظة هههه هههه ، و أنا الأب ديالها كان شيفور لشي شخصية عربية و هو لي خدمها.

واحد المرة شريت الثوب و نا نقول ليها أستاذة بغيت نعملو تونيكة عاونيني في الفصالة قالت لي خوذي العبار على راسك و نا نعوانك في الفصالة. دغيا واحد صاحبتي خذات عليا العبار، قالت لي صافي مابقا حال حتى للغد، و خا كان باقي الحال ههه هههه، المهيم جرجراتني شي 4 أيام حتى اهداها الله و بدات الفصالة و الكل في حالة ترقب قصوى – حيث ماشي الطاي 44 هاذ المرة الطاي 36 هههه ههه- تتشوف في المقاسات ديالي و تتقول لي ما قستوتش مزيان أجي نعاودك، إيوا بدات تتقيسني و تتطراسي مباشرة الثوب حتى سالت و بدات في القص، سالات جمعاتو حزماتو و قالت لي عندكم الماكن في الدار يالله سيري حتى لداركم و خيطيه.
صافي و هي تخرج من القسم
قالو لي البنات و الله إلى بان لينا الارقام لي كانت تحط كبيرة بزاف، قلت ليهم حتى أنا كذلك، و نا نحل الثوب و لاقيتو بالفنايت و نا لبسو يا للفضيحة و يا للعار الطاي 44 عاد إلينا من جديد هههه هههه ههه،" الكتف هابط حتى قرب للمرفق أما الخلف فبوحدو دار عليا كامل ههه هه " بقينا نضحكو صافي قررنا نعاودوه بطريقة التائبة إلى الله. و لحسن حظي أن التونيكة فصلاتها لي كبيرة و عريضة" .فاستغلينا فترة غيابها الطويلة عن القسم، ووضعنا المقاسات على الباترون ثم عاودنا حطينه داخل الثوب و قصينا التونيكة تحامينا عليها ههه هههه هههه شي يحلب و شي يشد من القرون هههه هههه. حتى كملناها و نبتناها بالفنايت عاود ثاني و لبستها فجات هي هديك.

حاجة أخرى عمرها ما بغات تنسا لي و هي أن في درس القميجة كان الشرح ديالها بواسطة باترون خاص بالشركات- أنا في ديك الساعة كنت متغيبة حوالي شهر ونصف بسبب اجتيازي لإحدى المباريات- المهيم أنني ملي دخلت تنسول البنات آش درتو في مدة غيابي قالو لي القميجة فقط قلت ليهم شرحو لي قالو لي باقي حنا ما فهمناش و لي رسمات فينا شي باطرون تقول ليها أستاذة غلط عاوديه، و حنا أكثر من شهر و حنا نعاودو و ما فهمنا والو، و نا نضحك معاهم قلت ليهم غير مشيت عليكم أنا الاستاذة بالنيابة صافي تلفتو ما بقتو فهمتو والو، و درت فيها بطلة و نا نمشي السبورة نشوف داك العجب لي معلق فيها و نا تنحاول نفهم، شوية بان لي أن الباترونات لي واضعة الاستاذة ماشي ديال طاي واحد ، حيث الخدمة ديال الشركات تتبنى على ان الطاي الواحد تيعملو ليه واحد الرقم يعني تيكون داك الرقم مصاحب لجميع أجزاء الباترون: في الكم في الأمام في الخلف … فقلت للبنات شكون فيكم فايت ليها خدمات في شي شركة ، لي قالوا حنا ، قلت ليهم أجيو تشوفو، فقلت ليهم آش تتعني هذه الارقام لي مصاحبة مع هذا الباترونات فمباشرة قالو لي أن كل جزء من الباترونات تيتعلق بشي طاي يعني الطايات مختلفة. ديك الساعة بداو البنات تيغوتو داك شي علاش ما بغاش يخرج لينا الباترون، فعرفناها من داك النهار أنها لا علاقة لها لا بالخياطة و لا الفصالة و إنما محشرة على المهنة.

دبا عندي الدبلوم تنحشم نوريه لأي شخص حيث عرفت داك العام ضيعتو ما بين الذهاب و الاياب بدون فائدة، مشى هباء منثورا و كانت عندي التزمات و مصالح أخرى ديك الساعة و ضحيت بيها في سبيل تعلم الفصالة، لأكتشف أن أحسن مكان للتعلم هو الانترنيت لأن البنات تيعطيو و تيقدمو فيه كل ما عندهم في سبيل الله، و لا ينتظرن جزاء و لا شكورا ." أنا حاليا قلبت على الرومي" سبحان الله ما بقيت نفهم فيه والو" و توجهت للبلدي بفضل الله و عطاء أخواتي في الانترنيت لي سخرهم لينا رب العزة و الملكوت
الله يجازيهم علينا خير الجزاء،
و الله أسأل أن يُحرم أجسادهم عن النار
الله يدخلهم للجنة بدون حساب و لا سابقة عذاب
اللهم آمين

و سمحي لي على الجريدة راك فكرتيني في الذي مضى و قلبتي عليا المواجيع ،غير قريت التعاون الوطني و قلت شي ضحية من صحاباتي هذه تتقلب على صحاباتها هههههه هههه هههه