بلاطو الحلوة ليدرت فعيد ألأضحى المبارك

السلام عليكم أخواتي جبت ليكم الحلويات لي عملت فالعيد و أغلبيتها حلوايات مان عندكم الله يجازيكم بالخير نتمانا ينالو إعجابكم و أي إستيفسار راني رهن ألإشارة

بالنسبة لماقادير الحليوات بجوج لي فجناب فهي ديال ألأخت عمرة الله يجازيها بالخير : فها 2 بيضات* 1كاس زيت* 1كاس سكر*1خمارة*3معالق كبار بودرة الكاكاو*الدقيق حسب الخليط تاتكون خفيفة تاتلصق فاليد
للتزيين :شكلاط أسود* ڢرميسيل الشكلاط* كونفيتور المشماش *شوية ماء الزهر* الكوك
الطريقة :
نخلط المقادير ونكورها كويرات صغيرة وتدخل للفرن عندما تطهى نمرمدها في خليط كونفتير وماء الزهر ثم في الكوك و النصف التاني كانديرو ف الشكلاط أسود مدوب من بعد ف ڢرميسيل الشكلاط و نديروها ف كويغطات الحلوة

2 الفقاص باللوز : زلافة ديال البيض يعني تقريبا 5 بيضات* زلافة معمراش زيت*زلافة سكر*كاس صغير زبدة مدوبة*1 خمارة* زلافة صغيرة لوز منقوع فالما تقريبا 4 ساعات *نصف زلافة زنجلان*و شوية ديال النافع *الدقيق حسب الخليط
نجمعو العجين عادي بحال أي فقاس و نحربلوها و ديروها ف الطاوة وندهنوها بأصفر البيض مخلط بشوية قهوة سريعة الدوبان ونشرطوه بالفرشيطة و ندخلوه للفرن بارد و نشعلو ونخليو يطيب مان بعدما يطيب نخرجوه و نغطيوه بزيف فازك و نخليوه متلا إيلا درناه صباه حتا لليل ونقطعوه و نحمرو ويلا درناه بليل حتا لصباح ونقطعوه ونحمروه

3الحلوة ديال التمر ديال ألأخت وردة عربية غير أنا مزوقتهاش بالعقيق مكانش عندي
العجينة:250غ زبدة العبار لينة*100غ سكر كلاصي*نصف كاس ماء الزهر من نوع جيد*الدقيق الخاص بالحلويات حسب الخليط*قبصة ملح
الحشوة:500غ عجينة التمر*125غ لوز مصلوق و مقلي و مهرمش*2 معالق كبار زبدة لينة*1ملعقة صغيرة قرفة مدقوقة*شوية الماء الزهر

4 حلوة ديال الهيلال بالفرميسيل ديال الشكلاط: 125غ زبدة ليينة*60غ سكر سنيدة*ملعقة صغيرة خميرة الحلوة*قشرة حامضة محكوكة*2 معالق عصير حامض*60غ فرميسيل الشكلاط الدقيق حسب الخليط
نخدمو الزبدة السكر و قشرة الحامض مزيآن من بعد نضيف الدقيق و الخميرة حتا نحصلو على عجين رطبة نشكلو منها هلالات و نوضعم فطاوة مفروشة بورق الزبدة وندخلهم للفرن وللي بغا يديرها ف السكر ڭلاصي مان بعد ممكن
وكاينة باحلوة لي لكل كايعرفها و كاداليك حلوا ديال أصفر البيض ممرمدة ف الشكلاط و ڭوفريت محكوك

---

fgh’, hgpg,m gd]vj tud] HgHqpn hglfhv; g]dvj

مرحبا بأختي غير خودي و دوقي على خاطرك بالصحة و الراحة

بالصحة والراحة

تبارك الله عليك

تبارك الله عليك

تبارك الله عليك اختي حليوات فنين
عطاك الله الصحة

الله يعطيك الصحة أختي دعاء القلوب و سمحيليا بزآآآآآآآآآاف حيت خالفت قانون من قوانين المنتدى بالنسبة للكيكة لي حطيت ڭبيله من هنا القدام إن شاء الله غادي ننتابه وشكرا ليك بزآاف

تبارك الله عليك اختي

تبارك الله عليك اختي الله يعطيك الصحة بلاطو غزال ومتول

ما شاء الله اختي الله يعطيك الصحة
اختي كتبي المقادير باش مايتغلقش موضوعك