المسمن فالكونجيلاتور

السلام عليكم البنات عافاكم و الله يرحم ليكم الوالدين شي وحدة تفيدني كيفاش نحتفظ بالمسمن ااخاوي و المعمر فالفريكو و خا غي ديال اسبوع كنتمحن معاه فرمضان و قلت علاش منديرش ديال اسبوعبأسبوع و نتهنى واحدة المرة طيبتو عادي و ملي جبتو نتخنو فالبوطا قصاح لي عندها شي سر ديال الاحتفاظ تقولو ليا الله يرزقها كل ما تمنات فخاطرها و رمضان كريم بالصحة و الهنا و مغفرة الذنوب يا رب

---

hglslk thg;,k[dghj,v

حتى يبقى لمسمن جديد في المجمد خاصك تخدميه بالزبدة اكثر من الزيت
وتفرقيه كميات صغيرة باش تخرجي قياسك وتحطيه في بلاستيكات المجمد وتسديهم مزيان وتدخليه في مكان بعيد على باب المجمد وبدون ماتطويه باش الى تجمد مايتهرس
وفاش تبغيه ديري المقلة الثقيلة على البوطة حتى تسخن عاد تخرجيه من المجمد وحطيه مباشرة في المقلة وبقاي قلبيه وفاش يسخن قدميه مباشرة والى شفتيه ناشف دوبي القليل من الزبدة وندهنيه وهو في المقلة وهذ لمسمن يبقى في المجمد حتى ل6 شهور مايوقع ليه والو شرط يكون بعيد من الباب وماتدخليه حتى يبرد والى خرجتيه وسخنتيه ماترجعيه والى رجعتي استعمليه غير للرفيسة
والمسمن العامر يبقى مزيان في المجمد لمدة طويلة حتى هو شرط ماتكونش فيه الشعرية للصينية لانها كاتقسااح وتولي بحال لبلاستيك
وماتخرجيه حتى تسخني الفران وحطيه في طاوة مدهونة ودخليه يسخن وحطي معه طاسة عامرة بالماء باش مايجيك ناشف
وبالصحة والراحة

شكرا بزاف على الجواب أختي الله يجازيك بخير .مقلتليش وش نطيبو عادي حتى يتحمر عاد نذخلو المجمد اولا غير نص طيبة يعني غير اشد فراسو و يبقى ابيض صافي و نديرو فبلاستيكات حيت نهار جبتو و سخنتو و قصاح كنت طيبتو عادي يعني كان ديجا محمر

اللي بغيتي كلهم يمكن تديرهم
انا كانطيبو حتى يتحمر باش غير نسخن ونحط وحتى ولدي عزيز عليه لمسمن والملوي كاتصاوبو ليا واحد السيدة غير يخرج ويسخن بحدو

شكرا الله يحفظ ليك وليدك و تشوفيه كيف تمنيتي

بالنسبة لي اختي كنفضل نطيبو عادي و ملي نبغي نسخنو كنجبدو على تيساع حتى يطلق و نسخنو شوية فالمقلة و كيجي فنن تقول عاد طاب
و حتى المعمر نفس الطريقة غير الى كان ديال الفران كنسخنو فالفران نيت
عواشر مبروكة اختي
تم نقل الموضوع لقسمه المناسب

شكرا اختي غفرانك ربي و رمضان كريم علينا جميع و الله اختي بغيت غير نقص عليا التعب فالمطبخ و ندير مسمن ديال اسبوع او جوج كاع و هاكا تبقا لي وقت باش نختم القران على خاطري

انا كنطيبو نص طياب و نديرو في الكونجلاتور و عاد نجبد ونسخنو و يكن تحمار تقولي يالله طيبتيه

اختي احسن طريقة للاحتفاظ بالمسمن هي تطيبيه نص طيبة يعني بمجرد يشد راسو صافي تحيديه باقي متحمرش و فاش يبرد ديري قياسك فميكة و ديريه فالمجمد و نهار تبغيه جبديه قبل بوقت يترخف و طيبيه فالمقلة بحال اللي راه باقي عجينة يعني رشي المقلة بالزيت و هو كذلك و حمريه عاد جربي هاد الطريقة و دعي معايا بالفكاكة الساهلة

شكرا اختي عربية انيقة الله يفكك على خير و بسلام نتي و الببي ان شاء الله