Ganache

السلام عليكم
بالنسبة لجناش الشوكولا
كنلقا وصفات كيكون فيها الشوكولا + كريمة الخفق نفس القياس بجوج
حنا في المغرب عدنا كريمة الخفق غالية بزاااف
بغيت نعرف وش نقدر نعوضها بالقشدة، كاينة قشدة كتكون تا هي سائلة وش تنفع ؟؟
شكرا

و السؤال حطيت في موضوع آخر يمكن ميبانش ليكم
بالنسبة لعجينة السكر من بعد ما نغلف بيها الحلوة
وش نقدر نخبعها في الثلاجة عادي مكتقساحش
حت ما غا نجبدها تا لبعد 24 ساعة
و منقدرش عاد نوض نصوبها في يومها

---

Ganache ganache

و سؤال آخر
بلاستيك المزخرف اللي كنحطو عليه الشوكولا و كيلصق فيها
عند من كيتباع و شنو نقوليه سميتو ؟؟
أنا من مدينة الجديدة

السلام عليكي اختي، ان شاء الله تلقاي الاجابات لتساؤلاتك، حتى انا عندي نفس الرأي، كريم فريش كاتجيني غا الية فحين بزاف دالوصفات كاتكون من المكونات ديالهوم، يعني كاتفقصي ملي كاتلقاي ديك الكريمة هي ليغاتكون مشكل ^^ إلى عقلت كاتوصل حتال 40درهم، وكاينا ماركة اخرى ماشي سائلة كادير 6 دراهم!! معرفتش منين جا الفرق!
بالنسبة لتجربتي مع عجينة السكر، من بعد مدرتها فوق الكيك، خليتها فالثلاجة كثر من يوماين، ماقصاحتش لي، كانت مزيانة.

نعم اختي ديك القشدة السائلة تنفع حبيبتي غير صوبي بها أما عجينة السكر مايوقع ليها وألو أما ديك لبلاستيكة ديال شكلاط كتباع عند لي كيبعوا المواد ديال الحلوة نسيت سميتها نتفكرها ونرجع عندك

شكرا Merine و ام يوسف وسعد
شحال من حاجة كنعجز عليها حت كنلقا فيها الكريمة السائلة Whipping cream
و عدنا غالية هنا، لكانت كتعوض بهذيك القشدة الرخيصة ب6dh تكون مزيان حت تا هيا سائلة

ملقيتش هذيك البلاستيكة
وش عندك شي فكرة فحالها نقدر نحصل منها على الزواق على الشوكلاط

سؤال آخر عارفة صدعتكم
سمحولي
بخصوص الملونات، أنا عندي بودرة كنزيدهم على عجينة السكر من بعد ما كنعجنها و نسالي ياك ؟؟

و بخصوص اوراق جيلاتين كاتبين في واحد الوصفة مرطبين في الماء و مكاتبينش شحال قياس الماء، شحال ندير الوصفة فيها 2 اوراق جيلاتين ؟

كريمة الخفق راها القشدة الطرية ويمكن نعوضوها بدانون بيرلي او دانون كريمي
بالنسبة لكاناش انا تندير الحليب عادي والشكلاط و الكاكاو المر وتنحصل على كاناش بدون كريم
بالنسبة للعجين السكر ديريه وخليه ف الثلاجة و فاش تبغيه خرجيه وخليه حتى ياخد درجة حرارة المطبخ وخدميه بيديك باش اطبق وغيكون واجد للاستعمالات
والبلاستيك المزوق راه تتقوليه بلاستيك المزوق تاع التزيين الحلويات تيعطيه لك تيكون عند مول الحوانت الكبار و ايضا لي تيبيعو لاوازم الحلويات وايضا سوبير مارسيات

كي دايرة ديك الكريما تاع 6 درهم معمرني شتها متنعرف غير الهولالا و والقشدة الطرية وهما ب 40 درهم

شكرا على الردود

القشدة ديال 7 دراهم فحال هذه تقريبا مبقيتش عاقلة على شكلها بالضبط
كاينة زرقا و غوز
https://www.yess.ma/1455-thickbox_def…he-socrech.jpg
و كاينة واحدة لاخرى ب11 درهم
https://www.yess.ma/259/creme-fraiche-chergui-200g.jpg

أما هذوك اللي غاليين فسميتوهم whipping cream الكريمة السائلة
https://www.goodfood.com.vn/data/prod…2271115375.jpg

القشدة هي الطبقة المتكونة على سطح الحليب الكامل الدسم
بينما الكريمة هي الجزء الكريمي في الحليب الكامل الدسم و كدار في الحلويات بالخصوص
قريت نقدرو نعوضوها بالحليب كامل الدسم لمكناش غادين نخفقوها

سؤالي كان عن القشدة اللي فالصورة الاولى حت ماشي عاقدة
سائلة فحال الكريمة

ديك القشدة لي ب6 دراهم كاتكون فواحد الحك بحال تاع جبلي، ومكتوب فيها قشدة الطرية وشفتها فاسواق السلام (مع ماركات اخرين غاليين)، وكاتكون عاقدة ماشي سائلة وخذيتها شحال من مرة ولكن كنت ملي كانبغي نجرب بيها الكناش كانذوب الشكلاط عاد كانكبها عليه وكايتكور الشكلاط وكايطلق الزيت ولا الما ولا معرفت لمهم كانكب داكشي. ومابقيتش كانزعم على الكناش، حتى داز شحال ومع المنتدى عا ا اد فهمت بلي خاصهوم بزوج يكونو سخان وتكون الكريمة سائلة.
ڭلتي فواحد الرد بلي كاتعوضيها بالحليب، ممكن تڭلوليلينا شحال دالحليب مع شحال دالشكلاط والكاكاو، وشكرا

بالنسبة لسؤالك على فكرة تزوقي بيها الشلاط بدون داك الورق، درت واحد البحث فالنت ولكن مالقيتش شي فكرة، فحين واثناء مشاهدة بعض الصور جاتني واحد الفكرة وهي كالتالي:
انكي تشدي واحد المستطيل دورق دالسولفوريزي او من الپلاستيك وتاخدي شكلاط بيض ذوبيه ونصو تلونيه بشي ملون مثلا برتقالي (بالصفيفرة مثلا) والنصف الآخر تخليه بيض، وديري منو خطوط افقية وعمودية (ويكونو غلاض شوية) وتخليهم يبردو عاد تكبي عليهم الشكلاط اسود دايب بحيث يغطي مساحة المستطيل كاملة، وتخليه حتا يشد شوية وقطعي منو شكيلات، عادا خليه يجمد مزيان. وهاهم بعض الصور ليسهلو عليك الفكرة ليڭلت ليك (فهاد الصورة الاولى راه ورق التزيين هاداك يعني ماشي صنع يدوي غير باش نوريك فكرتي وصافي)

وفكرة اخرى هو انكي ديري خطوط عشوائية بالشكلاط بيض وملي يجمد كبي عليه شكلاط اسود وها واحد الصورة قريبة للفكرة
نتمنى تعجبك فكرتي لي بسبابك "اختارعتها" و ان شاء الله نجربها حيث حتى انا ماعمري خدمت بورق تزيين الشكلاط وهاهو البديل ^^ فانتظار افكار اخرى من الاخوات