لحبيبات دياولي هاحنا وصلنا لدار 16 فتجمعنا ، تجمع الصحبة والإفادة، الله يخليكم لينا راكم منورين وكتفيدونا كاملين سواء لبنات جديدات ولا لقديمات لي هما عمارة الدار. للتدكير فقط للبنات لي جديدات اولى لي غيلتاحقو بينا ,مرحبا باي اخت بغات تلتاحق بينا پاش تتعلم تولي مدبرة و مقتصدة ، تزيد بالقدام باسرتها و دير مستقبل لوليداتها . هاد التجمع كناقشو فيه الاقتصاد من كل النواحي، التقدية، الماء، الغاز، الضو، الاهتمام بالجسم والشعر باقل التكاليف….. ومرحبا باي فكرة جديدة لي يمكن تفيدنا ونزيدو بيها لقدام. الاخوات لي والدين الله يصلح ليهم ولادهم ويفرحهم بيهم. لي مازالا مولداش الله يفرحها بالدرية الصالحة الحسنة الخلق والخلق. لي مريضة الله يشافيها ولي حاملة الله يفكها علا خير ومتنساش تدعي مع الباقين . نتمنا منكونش نسيت حتا وحدا ولي نسيتها تسمح لييا . سمحو لييا راه معنديش مع لكلام والاسلوب بحال سعاد تبارك الله ، راكم عارفيني كنعرف غير نحسب . يالاه اخواتي زيرو السمطة ، راكم عاد رجعتو من العطلة زاويين ، والمدرسة والعيد علا الابواب. جدول التحدي لهاد الشهر 
ghzpm hgjr]dm gglyvfhj hg[.z 16 lvpfh fhg[ldu lhz]m hgpa,
"اما بخصوص توفير و الاقتصاد في الماء و كهرباء بالنسبة للضو ، بدلو البولات العاديين بالاقتصادييين حاولو ماتشعلوش جميع بولات في مره وحده ، يعني خدمو غير المكان لي نتوما فيه من غير الضروره فقط ، بحال الكوزينة او إيلا كان لوليدات تايحفظو في بيت بوحدهم ملي تنعسو طفيو جميع بولات بالليل ، و حتى پريز ديال تلفزة و پرابول و بيسي و هادشي كامل مهم ماشي طفيه من تليكموند و تخليه ، لا زولي لپريز في مره من الحيط إيلا بقاو مبرونشي راه كايستهلك كتر من 3 ساعات في الليلة ديال الكهرباء بيسي إيلا مكان خدام فيه حتى واحد مكاين لاش يبقى شاعل نهار كامل مثلا إيلا كنتي بوحدك اختي في الدار إيلا دخلتي للكوزينة طفي ضو ديال الصالة إيلا خرجتو لشي بلاصة طفي كلشي تاني من پريز ديبرونشي كلشي عاد خرجي حاولو ماتخدموش بزاف الات الكهرباء في مرة وحده ، و مايكونوش مبرونشيين في بريز واحد !!!! حاولو تستغلو وقت لي تايكون في الضو رخيص مثلا بين 12 و 2 ديال النهار و بعد 8 ليل هنا في فرنسا كاتكون ستهلاك ضو رخص من الاوقات لخرين يعني هنا في هاد الوقت تقدري تخدمي ماكينة الصابون او شي آله خرى اما بالنسبة للماء ، حاولو تنقصو من استهلاك الما راه تايضيع عدنا بزاف مثلا في الدوش او الوضوء ، عوض متسناي الما سخون يجي و الباقي تايضيع عملي شي سطل تحت روبيني و داك الماء خدميه في شي حاجة مثلا غسلي بيه طواليط او الحمام نيت او لافابو او سقي بيها إيلا عندك شي غرس و نفس شي ملي تبغي دوشي و تغسلي ماتخليوش ما بارد يضيع على مايجي ما سخون او لا شري سطل كبير و دوشي بيه بحال لبلاد في الحمام يعني ديري سطل تحت روبيني و حلي ما سخون على آخر ديالو داك الماء بارد لي تايخرج غادي يتبعو ما سخون و غادي يجيك دافي ههههههه هادشي لي تاندير انا دابة و سطل ولا 2 يقدوك تغسلي كلك من راسك لرجليك و متنسايش تشري شي طاسه ولا سطيلة صغيره باش تهزي الماء هههههههههه اما الوضوء ، تقدري تسخني الماء في بوطه او إيلا عندك سخان الماء ديال الضو دغيا تايسخن ، هاكدا مايضيعش ليك الماء في الوضوء او الدوش اما غسيل الماعن من الاحسن تشري شي بانيو صغير عمليه في لافابو و غسلي فيه الماعن عوض ماتبقاي طالقة الماء و نتي كاتغسلي راه تايضيع كثر من لقياس هادشي لي تفكرت دابة في هاد الموضوع ، بنتي برزطاتني مخلاتنيش نكتب في خاطري مهم لبنات لي كانو معانا يزيدو يكملو إيلا نسيت شي حاجة و لي تفكرتها نجي نقولها ليكم اكيد " هادا ملخص كتباتو سعاد فالجزئ السابق كخلاصة للاجزاء السابقة
للتذكير بالنسبة للبنات الجديدات معانا و حتى لينا حنا اللي نسات فينا بالنسبة للتقدية ،اولا تعلمو تخدمو بالورقة و ستيلو و عملو لاليست ديالكم قبل ماتمشيو تقداو ديرو دوره في الدار كاملة و شوفو شنو ناقص و كتبوه ، باش تسهلو عليكم بعد المرات حاجة كتسالي قبل من لخرى ، ديرو شي وريقه و لصقوها في الثلاجة و كتبو الحاجة ملي تسالي ، مثلا شي حاجة ديال الحمام او مواد التنظيف ….. كتبيها نيشان في الورقة ملي تسالي ملي تمشيو تقداو حاولو تاخدو غير داكشي لي عندكم في لائحة و ماتزيدو عليه والو ماتبعوش مغريات و لوينات ، يعني شري غير لي خاصك في لاليست و خرجي حاولو تبعدو من السقاطة : حلوه ،شكلاط ، مونادا ، شيبس …….. تقدرو تعوضوها و تصاوبوها في الدار ، على اقل واحد يعرف آش تياكل تعلمو ديما تقراو المكونات و تأكدو انها مافيهاش جيلاتين او ليكود 400 e خصوصا عصائر و مشروبات ، كلاص و حلويات و دانون إيلا كان شي صولد و تخفيض تقدرو تاخدو المنتوجات لي كاتصبر بحال مواد التنظيف او مواد الاستحمام و حتى القطاني او دقيق ، يعني الحاجة لي كاتصبر و تقدر تدي ليك حتى لعام شريها بكثره و خبي في ستوك ، هاكدا غادي تهناي منها واحد المدة تقديه ديال الشهر هي هادي يعني هادشي لي تايصبر كثر غادي يبقى ليك منتوجات الحليب و الاجبان و الخضر و الفواكه ، هادشي خوديه مرة ف 15 او 20 يوم ، و الجزار إيلا عندك كونجيلاتور تقدري تاخدي ديال شهر و إيلا غير فريكو العادي شري ديال 10 ايام او 15 يوم قسميه في الثلاجة على حسب عدد الايام و الاشخاص ماتكثروش من اللحم راه غير لبنة و المذاق ، حاولو تكثرو من الخضر و فواكه و مره مره عوضي بالقطاني عوض اللحم حاولو ديما تقراو تاريخ صلاحية المنتوج و شوفو تاريخ لي يكون طويل و يدي ليكم اطول مده ممكنة هادشي في اغلب تايكون في كراطن لي تحت هههههههه ديما تانهز كرطون لي فوق و ناخد من لي تحت تايكون فيه تاريخ طول بالنسبة للخضر و الفواكه ، شري لي تكون طرية و قاسحة شاده في راسها باش تدي ليكم كثر هادشي لي جا في بالي دابة ، إيلا تفكرت شي حاجة خرى نكتبها ليكم لبنات لي تفكرات شي حاجة تكتبها باش تعم الفائدة ملخص كتباتو سعاد فالجزئ السابق كخلاصة للاجزاء السابقة
انا الاولى نبارك لك افتتاح الجزء الله يجعلها عتبة خير وصحبة طيب
فهاد لويكاند مشينا تقدينا ، وجبنا : 24 ليتر ماء، 2 كيلو بصلة،معجون الاسنان 2، ماطيشة سوريز,البيض 12،سكر، 2 ليتر حليب ،ياغورت 4 ( للكيكة والرايب)،شامبو وديميلور، 2 صابونات، ليباط، صابون الاواني، كيلو دقيق بيض وكيلو فينو ،روز، معطر ، جيل دوش (الرجال)،عواد القطن للادن، هادشي لي تفكرت، وخلصنا فيه 39€. دزنا لجزار خدينا جوج كيلو غنمي( قسمتو علا 6) دجاجة ( علا 3)، كيلو فخيضات الدجاج (علا 2) وخلصنا 26€ دزت للحوت وخدينا جوج دوراد متوسطين ب 12€ الخضرا ماجبتهاش هاد لمرة حيت باقا عندي من التقدية لي قبل . لمهيم راني واصلا ل 213€. الله يبارك ليكم فرزقكم
هانا جيت الا عندي شي بلاصة رجعت شيدت المصروف هادي 15 يوم نجرب على الله نطفرو ههههه
المشاركة الأصلية كتبت بواسطة مي عويشة 
انا الاولى نبارك لك افتتاح الجزء الله يجعلها عتبة خير وصحبة طيب باراك الله فيك مي عويشة، هادا شرف لينا تجي لهاد التجمع
المشاركة الأصلية كتبت بواسطة ام ادم وياسر هانا جيت الا عندي شي بلاصة رجعت شيدت المصروف هادي 15 يوم نجرب على الله نطفرو ههههه مر حبا بك ام ادم ،خاص غير لعزيمة وشويية بشويية حتا تنجحي فالصرف
السلام عليكم البنات لبس عليكم كيف عملين مع الاقتصاد حنا يالله جينا من المغرب وتبعنا الفكتورات وشهرين ديال لكرا هههه
