و جاي هاد السنة فالصيف و مع العمل فالوقت كيكون ضيق شوية
فباش نستغلوه مزيان قررت انني نوجد مجموووعة ديال الحويجات قبل ما يدخل الشهر الفضيل و اللي غادي تساعدني ان شاء الله فحياتي اليومية
منها مانضلوش فالكوزينة خصوصا مع الصهد والخدمة و كذلك اختصارا للوقت
باش يبقالنا الوقت و الجهد للختمات و قيام الليل و صلة الارحام ان شاء الله و الدعااااء ثم الدعاااء لنا و لابائنا و لاخواننا في جميع اراضي الاسلام
نبداو على بركة الله
تجهيزاتي التنضيفية:
اول حاجة بديتها هيا التخمال و التسياق و جبيد الركاني
بيت الجلاس::
وقفتو و حيدت الطلامط كاملين صبنتهم
و الزرابي حتى هما تحممو ههه
ضربتها بتسييقة و رديت كل حاجة لبلاصتها بعد ما نشفو الطلامط و الزربية 
و هاوا بيت الجلاس كملتو
هادي " قبل و بعد"
بيت الضياف::
وقفتو و شمشت الطلامط و غسلت الزربية خليتو واقف واحد 10 ايام غسلت السرجم و مسحت الطابلو 
و رديت كل حاجة لبلاصتها بعدما نشفت الزربية
الحمام::اعزكم الله
ضربتلو حكة اكيد بالمساند الرسمي لسيدات المغرب "جافيل و اومو"
متفرقات::
صبنت الكواش و الكويطات
او حاجة خويت البلاكارات و جمعت حوايج الشتا و ستفت حوايج الصيف
خملت المجورة اللي فبيتي
موراها هزيت البيت و مسحت الخشب و غسلت السرجم و سيقت و رديت كل حاجة لبلاصـتها
صورة نهائية للبيت
غسلت التلاجة و رتبتها
حكيت البوطاجي و الحيوط بهاد البرودوي
خملت الفيترينة و تحت البوطاجي
حكيت القراعي ديال الزيت و الشباكي ديال الخضرة
و هادو ميعنات شريتهم بمناسبة الشهر الفضيل
تم بحمدلله تنظيف المطبخ و ترتيبه
تجهيزاتي المطبخية:
جهزت مستلزمات العصير : الخوخ و المشماش و الشهدية غسلتهم و قطعتهم و الفريز مجمد و كويرات اللوز مطحون بسنيدة كنزيد عليه الحليب و ما زهر
حب الملوك درت فكل ميكة 2 كيسان عنبة منزوع النوى طبعا
الوصفة ديالو: 2 كيسان عنبة حب الملوك مجمد+ نصف لتر لبن+ سنيدة او سيرو و يطحن الكل
وهادا الحامض للعصير:
الطريقة: حامضة مجمدة نخليوها دوب و نقطعوها و نحيدولها النوى و نطحنوها مع لتر ما و سنيدة و دانون فاني
هادا عصير البرتقال درت بحرا هادو مبقاليش الليمون حتى يرجع مول الدار من السفر ان شاء الله و يجيب صندوق لرمضان:
جمدت الجلبانة فوقتها
فرقت الكفتة و اللحم فميكات
أيضا الكرافس و المعدنوس نقيتهم و قطعتهم و الحمص رطبتو ليلة كاملة و الغد فسختو و الى الكونجيلاتور
بالنسبة للمأكولات صاوبت البطبوط صغير ودرتو في المجمد
هادي مطيشة طايبة للمعجنات او البيتزا و الشوصون,,,,
و هادي الشرمولة ديال ملاوي بالشحمة :
صاوبت البيتزا و بقالي غير الفرماج حتى نجبدهم نسخنهم عاد نزيدو
درت بريوات اللوز حتى تبقى يومين لرمضان عاد نقليهم و نعسلهم
بريوات الكفتة و بريوات الحوت و الكروفيت
و هادي بلوزة وجداتهالي عمتي الله يخليهالي لاستقبال سيدنا رمضان
هادا مكان هاد الساعة غدا عوالة نصاوب باط بريي لميني طارط و شوية ديال الملوي و لكن ماكتابش نزلهم هنا
تبارك الله عليكم
و اللهم بلغنا رمضان غير فاقدين ولا مفقودين و ارزقنا العتق من النار اللهم امين
✩✩✩ lahv;jd td lshfrm hgj[id.hj hgvlqhkdm gskm 2024
ورمضان مبارك