عراضتنا المتواضعة لأختي وراجلها

السلام عليكم
غادي نبدا نعاود ليكم على هاد العراضة بحال الخبيرة ههههههههههههههه
في الصباح نهار السبت مع 8:30 عيطات لينا أختي وكالت لينا راه غادي يجيو يتغداو عندنا هي وراجلها، هوما ساكنين في مدينة بعيدة علينا
إيوا كنت غي بوحدي في الدار مع الواليدة، وهي مريضة باقا كاتعافا من واحد العملية دارتها، الله يشافيها ويشافي جميع المرضى
لمهم، نضت بزررررررربة درت بالدار جففت ومسحت لغبرة، مع حتى نهاية السبوع عاد تانجمعها هههههههه الخدمة وما دير
مع 9:30 مشيت وتقديت اللي خاص، 10:30 لقاتني رجعت للدار وشمرت على دريعاتي
جبت واحد مولاتي الحوتة فيها 2 كيلو ونص غسلتها وخليتها تستقطر، وجدت ليها شرمولتها ودرتها ليها
خديت طاوة ديال الفران وحطيت فيها عويدات ديال لكرافس، ولبسباس كنت قطعتو ودرتو يتسلق وستفتو فوق دوك لعويدات
وحطيت الحوتة فوق منهم وعمرتها بالفيرميسيل مع الشرمولة والزيتون دويورات والحامض مصير مقطع صغير، وفي جناب الحوتة درت معاها مطيشة دويورات وقطعت الحامض مصير طويل وزوقت بيهم الحوتة ودخلتهم الفران
وجدت شلاظة بسيطة كاتكون من الخيار، والفجل ومطيشة والخس والبصلة، كلشي قطعتو طويل ودرت ليهم ليقامة ديالهم
وشديت لبطاطا وغسلتها بقشورها وقطعتها ودرت معاها زيت العود والملح والإبزار واليازير طري وخلطت كلشي ودخلتهم للفران، باش نديرهم فجناب ديال الحوتة
صاوبت واحد الحرشة ديال الفران وكيكة عادية زوقتها بالشكلاط على ود العشية، المسمن كان عندي والحلوى والمملحات
قويت عليكم الهضرة، و خبيرتي مشات معا الواد و أنا بقيت مع لجواد ههههههههههههههه
نخليكم مع صور ديال الغدا، أما العشية نسيت ماصورت والو ههههههههههه
اللهم أدمها نعمة واحفظها من الزوال
ملاحظة: هادي أول مرة تانوضع موضوع في هاد القسم
هادي السلطة